Menningar-Staður
Félagsheimilið Staður á Eyrarbakka

07.01.2018 10:12

Guðmundur ráðinn verkefnastjóri Biblíufélagsins

 

 

Eyrbekkingurinn Guðmundur Brynjólfsson djákni til hægri.

Les hér úr helgri bók í Hjallakirkju sunnudaginn 7. maí 2017. 
Séra Baldur Kristjánsson fylgist með.

Ljósm.: Björn Ingi Bjarnason.

 

Guðmundur ráðinn verkefnastjóri Biblíufélagsins

 

Elsta starfandi félag landsins, Hið íslenska Biblíufélag, hefur ráðið Eyrbekkinginn Guðmund S. Brynjólfsson djákna og rithöfund sem verkefnastjóra félagsins, en átta sóttu um stöðuna.

 

Í starfinu mun Guðmundur kynna Biblíuna og menningarleg og trúarleg áhrif hennar í þjóðlífinu, sjá um daglegan rekstur félagsins og útbreiða Orðið. Hann mun halda utan um safnanir fyrir systrafélög í þróunarlöndunum, halda fyrirlestra, sjá um ýmis konar útgáfu til kynningar á ritningunni og annað það sem til fellur og stjórn felur honum. 

 

Guðmundur hefur yfirgripsmikla þekkingu á Biblíunni bæði frá guðfræðilegu og bókmenntafræðilegu sjónarhorni. Guðmundur hefur próf í guðfræði/djáknafræðum, sem og B.A. gráðu og meistarapróf í almennri bókmenntafræði frá Háskóla Íslands. Auk meistaraprófs í leiklistarfræðum frá Royal Holloway University of London.

 

Guðmundur hefur sinnt stundakennslu við bæði Háskóla Íslands og Listaháskóla Íslands og einnig unnið að fræðistörfum á sínum sérsviðum. Hann er höfundur margra bóka og hefur hlotið Íslensku barnabókaverðlaunin og unnið til Grímuverðlauna sem leikskáld. 

 

Hann mun eftir sem áður þjónusta Þorlákshafnarprestakall sem djákni í 50% starfshlutfalli en verkefnastjórastaðan hjá Biblíufélaginu er einnig 50%. Guðmundur hefur þegar tekið til starfa.

 

 




Skráð af Menningar-Staður.

07.01.2018 08:48

Mugison fær listamannalaun í heilt ár

 

 

Örn Elías Guðmundsson, - Mugison.

 

Mugison fær listamannalaun í heilt ár

 

Örn Elías Guðmundsson, betur þekktur sem Mugison, er í hópi þeirra tónskálda sem fá listamannalaun í heilt ár. 
Úthlutunarnefndir Launasjóðs listamanna hafa lokið störfum vegna úthlutana listamannalauna árið 2018. Þær starfa skv. lögum (57/2009) og reglugerð (834/2009) um listamannalaun, þar sem kveðið er á um að allar umsóknir fái sanngjarna umfjöllun.

Til úthlutunar eru 1.600 mánaðarlaun, sótt var um 9.053 mánuði. Árangurshlutfall sjóðsins er því 18%, ef reiknað er eftir mánuðum. Alls bárust 852 umsóknir um starfslaun frá einstaklingum og hópum. Umsækjendur voru samtals 1.529. Úthlutun fengu 369 listamenn.

Starfslaun listamanna eru 377.402 kr. á mánuði samkvæmt fjárlögum 2018. Um verktakagreiðslur er að ræða. 

 

Listann í heild má nálgast hér. 




Skráð af Menningar-Staður

06.01.2018 11:26

Hátíðahöld á þrettándanum á Selfossi

 

 

Hátíðahöld á þrettándanum á Selfossi

 

Jólin verða kvödd á Selfossi með glæsilegri þrettándagleði laugardaginn 6. janúar.

Gleðin verður með hefðbundnu sniði og sér Ungmennafélag Selfoss um framkvæmdina.

Að vanda verður farin blysför frá Tryggvaskála kl. 20:00 að brennustæði á tjaldstæði Gesthúsa þar sem kveikt verður í þrettándabálkesti.

 

Jólasveinarnir kveðja og álfar og tröll mæta á svæðið. Þá verður glæsileg flugeldasýning í umsjón félagsins með stuðningi Björgunarsveitar Árborgar.

 

Gaman væri að sjá sem flesta bæjarbúa í trölla-, álfa eða jólasveinabúningum.

 

Þeim sem taka þátt í blysförinni er bent á bílastæði við Ráðhúsið, Krónuna og Hótel Selfoss. Nokkur bílastæði eru við Austurveg en á leið göngunnar að brennustæðinu er fjöldi góðra bílastæða við leikskólann Álfheima og Vallaskóla, við Sundhöll Selfoss og Fjölheima. Vegna blysfararinnar lokast Engjavegur frá Reynivöllum að Rauðholti og er fólki bent á að leggja í nálæg bílastæði. Má nefna að mikill fjöldi bílastæða er við íþróttahúsið Iðu og Fjölbrautaskóla Suðurlands auk góðra bílastæða við leikskólann Hulduheima. Þá eru og bílastæði við Selið en eins og áður segir er mælst til þess að bílum sé ekki lagt við Engjaveg á milli Reynivalla og Rauðholts.

 

Þar sem fjöldi ungra barna sækir þrettándagleðina er þeim tilmælum beint til fólks að vera ekki með flugelda nærri blysförinni eða við brennuna.

 

Fólk er hvatt til að fylgjast með fréttum ef veðurspáin lítur illa út.


Skráð af Menningar-Staður

06.01.2018 08:34

Merkir Íslendingar - Skúli Thoroddsen

 

 

 

Merkir Íslendingar - Skúli Thoroddsen

 

Skúli Thoroddsen sýslumaður og alþm. fæddist á Haga á Barðaströnd 6. janúar 1859, sonur Jóns Thoroddsen, skálds og sýslumanns, og k.h., Kristínar Ólínu Þorvaldsdóttur húsfreyju.
 

Skúli var einn af fjórum Thoroddsenbræðrum sem misstu föður sinn ungir frá skuldugu búi hans en komust þó allir til mennta vegna seiglu móður sinnar og með góðri hjálp frá mági hennar, Jóni Árnasyni þjóðsagnasafnara. Hinir bræðurnir sem allir urðu þjóðþekktir, hver á sínu sviði og komust í góðar álnir, voru Þorvaldur, dr.phil. náttúrufræðingur í Reykjavík og Kaupmannahöfn; Þórður, læknir og alþm. í Keflavík og Reykjavík, faðir Emils tónskálds, og Sigurður, landsverkfræðingur og yfirkennari Menntaskólans, faðir Gunnars Thoroddsen forsætisráðherra.
 

Eiginkona Skúla var Theodóra Thoroddsen skáldkona og er frá þeim kominn fjöldi alþm. og annarra þjóðþekktra einstaklinga.
 

Skúli lauk stúdentsprófi í Reykjavík 1879 og embættisprófi í lögfræði frá Hafnarháskóla 1884. Hann varð bæjarfógeti og sýslumaður á Ísafirði 1884, var vikið frá um stundarsakir vegna Skúlamálsins svo kallaða 1892 sem að upphafi var vegna mannsláts á Klofningsheiði milli Önundarfjarðar og Súgandafjarðar. Skúli fékk lausn frá störfum á eftirlaunum þremur árum síðar.
 

Skúli rak verslun á Ísafirði 1895-1915, var kaupfélagsstjóri Kaupfélags Ísfirðinga 1888-1901, stofnaði og var ritstjóri Þjóðviljans frá 1886, var sjálfseignarbóndi og starfrækti prentsmiðju á Bessastöðum á Álftanesi 1901-1908 en var búsettur í Reykjavík frá 1908.
 

Skúli var alþm. Eyfirðinga 1890-92, Ísafjarðarkaupstaðar 1892-1903 og Norður-Ísafjarðarsýslu 1903-1916 og forseti Sameinaðs Alþingis 1909-11. Hann var í hópi áhrifamestu stjórnmálamanna Heimastjórnartímabilsins, eindreginn málsvari Landvarnarmanna og sjálfstæðismanna eldri og sá fulltrúi Sambandslaganefndarinnar 1907 sem hafnaði Uppkastinu sem þjóðin síðan hafnaði í sögulegum kosningum 1908.
 

Meðal afkomenda Skúla THoroddsen er Katrín Jakobsdóttir, núverandi forsætisráðherra Íslands.
 

Skúli lést 21.maí 1916.


Morgunblaðið - Merkir Íslendingar.


Skráð af Menningar-Staður.

05.01.2018 07:03

Þurfa að gera betur í markaðsmálum bænda

 

 

Ásmundur Friðriksson, alþingismaður.

 

Þurfa að gera betur í markaðsmálum bænda

 

• Fundað um lambakjöt á Hellu á laugardag • Boðið í veislu
 

Markaðsmál sauðfjár­bænda verða í brenni­depli á fundi sem hald­inn verður í íþrótta­hús­inu á Hellu á morg­un, 6. janú­ar. Lamba­kjöt er verðmæt vara er yf­ir­skrift fund­ar­ins sem Ásmund­ur Friðriks­son, þingmaður Sjálf­stæðis­flokks­ins í Suður­kjör­dæmi, stend­ur að en marg­ir eru með í mál­inu, svo sem bænd­ur í héraði, IKEA, Kjöt­komp­aníið og Markaðsráð kinda­kjöts. „Við þurf­um að nálg­ast mál­in af bjart­sýni því ef rétt er á mál­um haldið eru mik­il tæki­færi í ís­lensk­um land­búnaði. En það má gera bet­ur á markaðinum, sam­an­ber að nú koma tvær millj­ón­ir ferðamanna til lands­ins á ári en sal­an á lamba­kjöt­inu eykst ekki. Ein­hversstaðar eru ónýtt tæki­færi,“ sagði Ásmund­ur í sam­tali við Morg­un­blaðið.

 

Efla ný­sköp­un

Vandi sauðfjár­bænda komst í frétt­irn­ar síðastliðið haust þegar slát­ur­leyf­is­haf­ar gáfu út að skerða þyrfti afurðaverð til bænda vegna mik­illa óseldra birgða. Rétt fyr­ir ára­mót samþykkti Alþingi til­lögu um að verja 665 millj­ón­um króna til að koma til móts við sauðfjár­bænd­ur, en stuðning­ur við hvern og einn bygg­ist á ýms­um for­send­um.

 

Hluti af aðgerðunum felst síðan í ný­sköp­un og vöruþróun. Í því efni seg­ir Ásmund­ur Friðriks­son áhuga­vert að horfa til þess góða ár­ang­urs sem hafi náðst. Í versl­un IKEA í Garðabæ selj­ist nú til dæm­is lambaskank­ar og lok­ur með lamba­kjöti afar vel – og lambafita sé notuð tl þess að steikja klein­ur sem selj­ist vel. Þá sé Jón Örn Stef­áns­son í Kjöt­komp­aní­inu í Hafnar­f­irði að gera góða hlut og selji kótelett­ur sem seld­ar eru á 5.990 kr. kílóið. Þeir Ásmund­ur og Jón Örn muni segja frá þess­ari markaðssetn­ingu á Hellufund­in­um, sem sé mjög áhuga­vert mál.

 

Snert­ir alla bænd­ur

„Efni fund­ar­ins snert­ir alla bænd­ur, ekki bara þá sem eru með sauðfé held­ur líka þá sem eru með nauta- og svína­kjöt, kart­öfl­ur og græn­meti. Suður­landið er stærsta land­búnaðarsvæði lands­ins og hér eru mik­il­væg mál til um­fjöll­un­ar,“ seg­ir Ásmund­ur um fund­inn sem lýk­ur á því að öll­um er boðið í veislu. Því þarf fólk að skrá sig fyr­ir­fram á vefn­um bbl.is en þegar hafa 300 manns stimplað sig inn.

Morgunblaðið.


 

 




Skráð af Menningar-Staður

04.01.2018 17:30

Gleðilegt nýtt ár

 

 

 

Gleðilegt nýtt ár.

 

Vestfirska forlagið óskar Dýrfirðingum heima og heiman sem og öllum vinum og velunnurum farsældar á nýja árinu með þökk fyrir viðskiptin á árinu sem liðið er.

Á árinu 2017 komu út 8 bækur hjá Vestfirska forlaginu. Þökkum öllum í þeim stóra hópi fólks sem skipa metnaðarfulla áhöfn forlagsins og öllum hinum fjölmörgu sem komu að mannlífs- og menningarlegri starfseminni forlagsins með einum eða öðrum hætti á árinu 2017 sem og fyrri árum.

Vestfirska forlagið að Brekku á Þingeyri.

 

Hallgrímur Sveinsson, Þingeyri
Björn Ingi Bjarnaosn, Eyrarbakka


 

 
 

.

.



Skráð af Menningar-Staður.

01.01.2018 10:02

Gleðilegt nýtt ár

 

 

 

Gleðilegt nýtt ár

 

Gleðilegt nýtt ár

Þökkum liðin ár
                            

                   Félagsheimilið Staður á Eyrarbakka
                                       
                                  Menningar-Staður

 

                                  Alþýðuhúsið á Eyrarbakka
                                

                                  Vinir alþýðunnar


 




Skráð af Menningar-Staður.

31.12.2017 11:14

Áramótabrennur í Árborg 2017

 

 

 

 Áramótabrennur í Árborg 2017

 

Kveikt verðu í áramótabrennum á eftirfarandi stöðum í Sveitarfélaginu Árborg þann 31.desember nk. ef veður leyfir. Sveitarfélagið hvetur alla til að fara varlega kringum brennurnar og minnir á mikilvægi þess að allir hafi öryggisgleraugu sem eru að skjóta upp flugeldum.

 

Brennur eru á eftirfarandi stöðum

–          Á gámasvæðinu, Víkurheiði á Selfossi kl. 16:30

–          Við Hafnarbrú á Eyrarbakka kl. 20:00

–          Við Arnhólma á Stokkseyri kl. 20:00


Skráðaf Menningar-Staður.


 

31.12.2017 09:29

Starfslokateiti á Litla-Hrauni 28. des. 2017

 

 

F.v.: Birgir Marteinsson, Halldór Valur Pálsson Guðjón Stefánsson

og Haraldur Arngrímsson.

 

Starfslokateiti á Litla-Hrauni 28. des. 2017

 

Yfirstjórn Litla-Hrauns bauð fimmtudaginn, 28. desember 2017, til kaffistundar með kræsingum til heiðurs fangavörðunum Guðjóni Stefánssyni og Haraldi Arngrímssyni. Þeir létu af störfum fyrr á árinu vegna aldurs. Guðjón hóf störf á Litla-Hrauni árið 1979 og Haraldur árið 1994.

 

Halldór Valur Pálsson, forstöðumaður Litla-Hrauns, stýrði samkomunni og ávarpaði Guðjón og Harald og þakkaði þeim farsæl störf á starfstímanum. Í lokin færði hann þeim gjöf frá Litla-Hrauni.

 

Síðan kallaði Halldór Valur til Björn Inga Bjarnason hjá Ljóðasetri Litla-Hrauns sem flutti meðfylgjandi ljóð og skýrði tilurð þess:

Áratugi áttuð hér

eftirsjá í köppum.

Farsæld ykkar fögnum vér

fyrir þeim nú klöppum.

.

Björn Ingi Bjarnason og Ingvar Magnússon færðu strundina til myndar.


Myndaalbúm með 35 myndum er komið á Menningar-Stað á þessari slóð:

http://menningarstadur.123.is/photoalbums/284808/

 

Nokkrar myndir hér:

 


F.v.: Guðjón Stefánsson, Haraldur Arngrímsson, Björn Ingi Bjarnason

og Halldór Valur Pálsson.
.

.

,

 
 
 

.

.

 

.

.





Skráð af Menningar-Staður

 

31.12.2017 08:48

Merkir Íslendingar - Gils Guðmundsson

 

 
 

Gils Guðmundsson (1914 - 2005).
 

Merkir Íslendingar - Gils Guðmundsson

 

Gils Guðmundsson fæddist í Hjarðardal innri í Önundarfirði 31. desember 1914, sonur Guðmundar Gilssonar, útvegsb. í Hjarðardal, og k.h., Sigríðar Hagalínsdóttur.

 

Foreldrar Guðmundar: Gils Bjarnason á Mosvöllum og Guðmundína Jónsdóttir, systir Guðnýjar, ömmu Jónu, ömmu Ólafs Þ. Þórðarsonar og Kjartans Ólafssonar alþm. Foreldrar Sigríðar: Hagalín Þorkelsson og Sólveig Pálsdóttir.

Kona Gils var Guðný Jóhannesdóttir en dóttir þeirra er Erna Sigríður Gilsdóttir, kennari í Danmörku. Stjúpsonur Gils er Úlfur Árnason, doktor í Lundi.
 

Gils lauk kennaraprófi frá KÍ 1938, var sjómaður 1934-40, kennari við Íþróttaskólann í Haukadal og við unglingaskóla í Garði og Sandgerði, rithöfundur frá 1942, blaðamaður og ritstjóri 1943-56 og framkvæmdastjóri Menntamálaráðs og Bókaútgáfu Menningarsjóðs 1956-75.
 

Gils var alþingismaður Reykjavíkur fyrir Þjóðvarnarflokk Íslands 1953-56 og þingmaður Reykjaneskjördæmis fyrir Alþýðubandalagið 1963-79. Hann var formaður Þjóðvarnarfélags Reykjavíkur 1953-54 og varaformaður Þjóðvarnarflokksins 1960-62, formaður Rithöfundasambands Íslands 1957-58 og formaður félagsins Ísland – Færeyjar.
 

Gils sat í Rannsóknaráði ríkisins, var skipaður í endurskoðunarnefnd laga um friðun Þingvalla og náttúruvernd, var formaður fiskveiðilaganefndar frá 1971, sat í Norðurlandaráði 1971-74, í verðlaunanefnd Gjafar Jóns Sigurðssonar og í Þingvallanefnd. Hann sat á Allsherjarþingi SÞ 1970 og á hafréttarráðstefnu SÞ 1974-75.
 

Gils samdi fjölda sagnfræðilegra rita og skrifaði sögu ýmissa stéttarfélaga. Má þar helst nefna Skútuöldina, Togaraöldina og Vestfirska sagnaþætti. Þá ritstýrði hann tímaritum og bókum, s.s. bókunum Öldin sem leið 1800-1900 og Öldin okkar, frá 1900-1980.
 

Gils lést 29. apríl 2005.

 

Morgunblaðið.

 

 

Séð yfir Önundarfjörð að Holtsodda og Hjarðardal. Ljósm.: BIB


Skráð af Menningar-Staður.