Menningar-Staður
Félagsheimilið Staður á Eyrarbakka

Færslur: 2016 Júní

18.06.2016 07:32

Vestfirska forlagið vökvar víða upprunaþrá

 

 

Vestfirsk menningarstund að Ránargrund á Eyrarbakka.

F.v.: Björn Ingi Bjarnason og Ásgeir Ragnarsson.

 

Vestfirska forlagið vökvar víða upprunaþrá

 

Vestfirska forlagið hefur staðið að metnaðarfullri bókaútgáfu í nær fjórðung aldar og gefið út rúmlega 300 titla.

Bækurnar hafa notið vinsælda og virðingar á heimaslóð vestra og ekki síður meðal hinna fjölmörgu brottfluttu Vestfirðinga sem dreifast víða um landið.

Einn þeirra er Önfirðingurinn af Ingjaldssandi , Ásgeir Ragnarsson  sem býr ásamt eiginkonu sinni, Halldóru Þórisdóttur  á Selfossi.

Ásgeir og Halldóra litu við að Ránargrund á Eyrarbakka  (17. júní 2016)  í þjóðhátíðarheimsókn en þar má segja að sé sendiráð Vestfirska forlagsins á Suðurlandsundirlendi.


Ásgeir er mjög vel að sér um vestfirskan fróðleik og menningarsögu. Ýmislegt var rifjað upp og í tilefni 17. júní, fæðingardags Jóns Sigurðssonar, voru sérstaklega rifjaðar upp rætur hans til Holtspresta í Önundarfirði.  

Ásgeir og frú voru kvödd með virktum við lok heimsóknar og fékk hann vestfirskan sögu- og menningarglaðning sem var ein af bókum Vestfirska forlagsins í flokknum vinsæla  -Frá Bjargtöngum að Djúpi-

 

 

Ásgeir Ragnarsson.



Skráð af Menningar-Staður

18.06.2016 07:17

Tólf voru sæmd fálkaorðunni

 

 

Frá vinstri: Forseti Íslands, Jóhann Páll Valdimarsson, Geir Waage,

Björgvin Þór Jóhannsson, Katrín Pétursdóttir, Björn Sigurðsson,

Guðmundur Hallvarðsson, Kristjana Sigurðardóttir,

Anna Stefánsdóttir, Lára Björnsdóttir, Dóra Hafsteinsdóttir,

Filippía Elísdóttir og Stefán Svavarsson.

 

Tólf voru sæmd fálkaorðunni

 

Forseti Íslands sæmdi í gær, 17. júní 2016,  tólf Íslendinga riddarakrossi hinnar íslensku fálkaorðu.


Frá skrifstofu forseta Íslands

 

Við hátíðlega athöfn á Bessastöðum í gær, 17. júní 2016, sæmdi forseti Íslands tólf Íslendinga heiðursmerki hinnar íslensku fálkaorðu.

 

Þeir eru:

1. Anna Stefánsdóttir fyrrverandi hjúkrunarforstjóri, Kópavogi, riddarakross fyrir störf í þágu heilbrigðis- og mannúðarmála

2. Björgvin Þór Jóhannsson fyrrverandi skólameistari, Hafnarfirði, riddarakross fyrir framlag til menntunar vélstjóra og vélfræðinga

3. Björn Sigurðsson bóndi, Úthlíð, riddarakoss fyrir félagsmálastörf og uppbyggingu ferðaþjónustu

4. Dóra Hafsteinsdóttir fyrrverandi ritstjóri, Reykjavík, riddarakross fyrir framlag til orðabóka og íslenskrar menningar

5. Filippía Elísdóttir búningahönnuður, Reykjavík, riddarakross fyrir störf á vettvangi íslenskrar og alþjóðlegrar leiklistar

6. Geir Waage sóknarprestur, Reykholti, riddarakross fyrir framlag til uppbyggingar Reykholtsstaðar og varðveislu íslenskrar sögu og menningar

7. Guðmundur Hallvarðsson fyrrverandi alþingismaður, Reykjavík, riddarakross fyrir störf í þágu íslenskra sjómanna og aldraðra

8. Jóhann Páll Valdimarsson bókaútgefandi, Reykjavík, riddarakross fyrir framlag til íslenskrar bókaútgáfu og menningar

9. Katrín Pétursdóttir forstjóri, Seltjarnarnesi, riddarakross fyrir störf á vettvangi íslensks atvinnulífs

10. Kristjana Sigurðardóttir, fyrrverandi verslunarstjóri, Ísafirði, riddarakross fyrir framlag til félagsmála í heimabyggð

11. Lára Björnsdóttir félagsráðgjafi, Reykjavík, riddarakross fyrir störf á vettvangi velferðar og félagsþjónustu og að málefnum fatlaðs fólks

12. Stefán Svavarsson endurskoðandi, Reykjavík, riddarakross fyrir framlag til þróunar endurskoðunar og reikningsskila

 

Orðunefnd skipa eftirfarandi:

Guðni Ágústsson, fv. ráðherra, formaður orðunefndar
Ellert B. Schram, fyrrv. alþingismaður og fyrrv. forseti ÍSÍ
Rakel Olsen, framkvæmdastjóri
Ólafur Egilsson, fyrrv. sendiherra
Þórunn Sigurðardóttir, leikstjóri
Örnólfur Thorsson, orðuritari



Af www.forseti.is

 

 

Bessastaðir.

 



Skráð af Menningar-Staður

17.06.2016 11:20

17. júní 2016 - Gleðilega þjóðhátíð

 


 

 

17. júní 2016 - Gleðilega þjóðhátíð
 

 

Vinir alþýðunnar



Hjallastefnan á Eyrarbakka



Skráð af Menningar-Staður

 

17.06.2016 08:30

17. júní hátíðarhöld á Eyrarbakka

 

 

 

17. júní hátíðarhöld á Eyrarbakka


 

Þjóðhátíðardagur Íslendinga er haldinn hátíðlegur á Eyrarbakka.

 

 Dagskráin byrjar kl. 14:00 að Stað á Eyrarbakka þegar fjallkonan ávarpar gesti.  

 

Í framhaldinu verður tónlistaratriði, ávarp, söngur leikskólabarna úr Brimveri/Æskukoti og verðlaunaafhending fyrir Hópshlaupið sem fram fór fyrr í vor.

 

Ýmis önnur skemmtiatriði verða á dagskrá ásamt hinu árlega 17. júní kaffi kvenfélagsins.
 

Af www.arborg.is

 

.





Skráð af Menningar-Staður


 

 

17.06.2016 08:00

Dyr aftur til fortíðar opnaðar í Kirkjubæ í dag

 

 

Kirkjubær á Eyrarbakka.                                                                  Ljósm.: Björn Ingi Bjarnason.

 

Dyr aftur til fortíðar opnaðar í Kirkjubæ í dag

 

Sýningin Draumur aldamótabarns verður opnuð í Kirkjubæ í dag, á sjálfan þjóðhátíðardaginn. Er Kirkjubær ný viðbót við grunnsýningu Byggðasafns Árnesinga sem staðið hefur undanfarið 21 ár.

 

„Byggðasafnið keypti Kirkjubæ árið 2011 og hefur unnið ötullega að endurbótum á húsinu. Okkur þótti gráupplagt að kaupa bæinn með það fyrir augum að útvíkka sýningarhaldið. Nú er búið að gera Kirkjubæ upp og sýningin klár,“ útskýrir Lýður Pálsson, safnstjóri Byggðasafns Árnesinga. Safnið hefur nýtt arf Helga Ívarssonar frá Hólum til þessa verkefnis.

 

Útgangspunktur sýningarinnar Draums aldamótabarnsins er venjulegt líf fólks á árunum 1920 til 1940. „Sýningin er uppfull af safnmunum í réttu samhengi og skemmtilegum fróðleik um tímabilið. Þarna eru textar, munir og svo Kirkjubær sem talar sínu máli,“ segir Lýður.

 

Og sennilega er það rétt, því saga þessa litla bárujárnsklædda timburhúss er heilmikil.

 

„Húsið á Eyrarbakka var heimili heldra fólks, þar bjó kaupmaðurinn til dæmis. Í kringum það hús voru hús alþýðunnar og þar með Kirkjubær, sem byggt var vestan við Húsið. Það var byggt af almúgafólki árið 1920. Þar er svo búið til 1983 uns það varð að sumarhúsi. Ólafur Haukur Símonarson rithöfundur átti það til dæmis um tíma,“ segir hann glaðlega og bætir við að eldri hjón úr Reykjavík hafi svo keypt það og nostrað við garðinn, sem nú sé heilmikið aðdráttarafl, enda fallegur með eindæmum.

 

Lýður segir alla hjartanlega velkomna í Kirkjubæ í dag, en hann verður opnaður klukkan 12 á hádegi og er aðgangur ókeypis í tilefni dagsins. Gefst gestum sömuleiðis færi á að skoða Sjóminjasafnið og Húsið, en sé á heildina litið er Eyrarbakki nánast eins og eitt stórt safn svo allir ættu að finna eitthvað fyrir sinn smekk.

Fréttablaðið föstudagurinn 17. júní 2016


 

 

.
 


Lýður Pálsson.



Skráð af Menningar-Staður

 

16.06.2016 19:50

Messa í Eyrarbakkakirkju 17. júní 2016

 


Eyrarbakkakirkja.                                                                                Ljósm.: Björn Ingi Bjarnason.
 

 

Messa í Eyrarbakkakirkju 17. júní 2016

 

Velkomin í messu á lýðveldishátíðinni 17. júní 2016 kl. 11.

 

Við messuna verður Victoria Kolbrún Öfjörð fermd og svo er almenn altarisganga.

 

Kór kirkjunnar syngur og organisti er Haukur Arnarr Gíslason.

 

Séra  Kristján Björnsson

 

 

Skráð af Menningar-Staður

 
 

16.06.2016 05:33

Ingibjörg Jóhannsdóttir - Fædd 6. september 1924 - Dáin 2. júní 2016 - Minning

 

 

Ingibjörg Jóhannsdóttir

 

Ingibjörg Jóhannsdóttir - Fædd 6. september 1924 -

 

Dáin 2. júní 2016 - Minning

 

Ingibjörg Jóhannsdóttir fæddist í Einarshöfn á Eyrarbakka 6. september 1924. Hún lést á Sólvöllum, dvalarheimili aldraðra á Eyrarbakka, 2. júní 2016.

Foreldrar hennar voru Þórdís Gunnarsdóttir, húsfreyja, f. 1897, d. 1978, og Jóhann Elí Bjarnason, skipstjóri, f. 1890, d. 1951. Ingibjörg var næstelst fjögurra systkina, elstur var Bjarni Jóhannsson, f. 1922, d. 2014. Næstyngstur er Jóhann Jóhannsson, f. 1927 og yngst er Katrín Jóhannsdóttir, f. 1934.

Ingibjörg ólst upp á ástríku heimili foreldra sinna í Einarshöfn og gekk í Barnaskólann á Eyrarbakka. Hún fór ung til Reykjavíkur og lærði að sauma hjá Rebekku Hjörtþórsdóttur sem var kunn kjólasaumakona á saumastofunni Gullfossi í Aðalstræti 9. Seinna vann hún um tíma í Nærfatagerðinni.

Þann 19.10. 1947 giftist Ingibjörg Þórarni Kristinssyni frá Neistakoti á Eyrarbakka, f. 6.12. 1913, d. 19.6. 1969. Foreldrar hans voru hjónin Kristinn Þórarinsson, f. 1879, d. 1917, og Vigdís Eiríksdóttir, f. 1876, d. 1963. Hann var þriðji yngstur í tíu systkina hópi sem eru öll látin.

Ingibjörg og Þórarinn eignuðust fjóra syni, áður átti Þórarinn soninn Kristján Jóhann, f. 1942.

Elstur þeirra barna er 1) Jóhann Elí, f. 1948, kvæntur Helgu Hallgrímsdóttur, f. 1952, börn þeirra eru: a) Þórarinn, f. 1972, kvæntur Hildi Bjargmundsdóttur og eiga þau börnin Egil Inga, f. 2002 og Telmu Björgu, f. 2005. Áður átti Þórarinn Jóhann Andra, f. 1993 og Bryndísi Örnu, f. 1996. b) Ingibjörg, f. 1973, sambýlismaður Þorvaldur Barðason og eiga þau börnin Ragnar Má, f. 1995 og Helgu Guðrúnu, f. 2000. c) Hallgrímur, f. 1979, kvæntur Sigríði Hrönn Pálmadóttur og eiga þau börnin Torfa Elí, f. 2013 og Birnu Dröfn, f. 2015. d) Bjarni Gunnar, f. 1985, sambýliskona Halla Rúnarsdóttir og eiga þau dótturina Ingibjörgu, f. 2014. Kristinn f. 6.9. 1949, hann á: Þórdísi f. 1972 sem er gift Gísla Gíslasyni f. 1969. Sonur þeirra er Gísli Rúnar f. 2002. Þórarinn Halldór f. 1973. Hann er kvæntur Ingibjörgu Kristinsdóttur f. 1972. Þau eiga börnin Kristin f. 1996 og Guðrúnu Ástu f. 2000.

2) Ingi Þór, f. 1951, kvæntur Guðrúnu Ísfold Johansen, f. 1955. Áður átti Guðrún soninn Hans Erni, f. 1974, d. 1995. Börn Inga Þórs og Guðrúnar eru: a) Guðni, f. 1985, sambýliskona Dagmar Pálsdóttir, f. 1990. Guðni á soninn Anton Bjarma, f. 2008. Dagmar á soninn Kristin Frey, f. 2011. b) Ósk, f. 1987, gift Sigmari Þór Matthíassyni, f. 1987. Þau eiga Klöru Ísfold, f. 2016.

3) Skúli, f. 1955, kvæntur Normu Einarsdóttur, f. 1955, börn þeirra eru: a) Alma Tynes, f. 1976, maður hennar er Sigurjón Ólafsson, f. 1964. Þau eiga Önju Margréti og Ólaf Skúla, f. 2013. b) Bjarni, f. 1978, kona hans er Marija Dragic, f. 1977, þau eiga börnin Branko Magnús, f. 2004 og Helenu, f. 2008. Áður átti Bjarni soninn Sigtrygg Valgeir, f. 1998. c) Einar Thoroddsen, f. 1986, unnusta hans er Dagný Björk Lúðvíksdóttir, f. 1991. Hún á soninn Axel Þór, f. 2008.

 

Útför Ingibjargar fer fram frá Eyrarbakkakirkju í dag, 16. júní 2016, klukkan 13.

______________________________________________________________________________________


Minningarorð Katrínar Jóhannsdóttur

 

Ástkær systir mín, Ingibjörg Jóhannsdóttir, er borin til grafar í dag á æskuslóðum sínum á Eyrarbakka. Langri og farsælli ævi er lokið og góðrar konu er sárt saknað.

Á stundum sem þessum leitar hugurinn til æskuáranna í Einarshöfn á Eyrarbakka. Systir mín ólst upp við leik og störf á Eyrarbakka eins og þá tíðkaðist, í stórum frændgarði, falleg og góð og með afburðum myndarleg til allra verka. Hún var yndisleg stóra systir sem bar hag litlu systur fyrir brjósti og leiðbeindi henni og kenndi á öllum sviðum. Það var svo ljúft og gott og mikill styrkur að eiga að þessi eldri systkini, Imbu, Bjarna og Jóa.

Imba systir var alla tíð órjúfanlegur partur af minni fjölskyldu svo og synir hennar og fjölskyldur þeirra. Margar minningar koma upp í hugann, allar góðar og kærleiksríkar. Samveran á Ránargötu 3 er ofarlega í huga mínum, heimili hennar alltaf opið og umhyggjusemi og elska alltaf til staðar. Hjálpsemi hennar þegar ég stofnaði mína eigin fjölskyldu og börnin mín fæddust er minnisstæð, þá var gott að hafa stóru systur nálæga. Ég minnist heimsóknar hennar til okkar í Svíþjóð, þar sem við nutum þess öll að vera saman og ferðast um og skoða bæi og borgir. Börnin mín og barnabörn voru henni náin og fengu alla tíð að njóta gestrisni hennar og barngæsku.

Það sem einkenndi Imbu systur var æðruleysi hennar í þeim verkefnum sem lífið færði henni. Einnig var það áhugi hennar á samferðamönnum sínum svo og ættrækni. Hún hafði sérstakan áhuga á ættfræði og gat rakið ættir með ártölum og afmælisdögum svo um munaði. Hún hafði alltaf áhuga á því sem var að gerast hjá sínum nánustu og lét sig ekki vanta ef eitthvað var um að vera, alltaf jákvæð og hlý.

Ránargata 3, húsið hennar Ingibjargar föðursystur okkar, var fjölskylduhúsið okkar. Það var okkar annað heimili, allrar fjölskyldunnar, og þar treystum við fjölskylduböndin, börn, barnabörn og barnabarnabörn Jóhanns Elí Bjarnasonar og Þórdísar Gunnarsdóttur, og bróðurfjölskylda Ingibjargar Bjarnadóttur, húsráðanda. Mörg áttum við því láni að fagna að fá að búa í því húsi í skemmri eða lengri tíma og Imba systir bjó þar í fimmtíu ár og var stoð og stytta Ingibjargar, föðursystur okkar, og þær hvor annarrar. Margar eru minningarnar þaðan, skemmtilegar og innilegar.

Nú er dagur að kveldi kominn og ekki get ég lengur hringt í systur mína eða hún í mig eins og var nánast dagleg venja. Það verður erfitt að venjast því.

Á kveðjustund vil ég þakka elskulegri systur minni samfylgdina í lífinu og fyrir allt sem hún var mér og fjölskyldu minni og færi sonum hennar og fjölskyldum innilegar samúðarkveðjur.

 

Ég kveð þig, hugann heillar

minning blíð,

hjartans þakkir fyrir liðna tíð,

lifðu sæl á ljóssins friðar strönd,

leiði sjálfur Drottinn þig við hönd.

(Guðrún Jóhannsdóttir)

 

Katrín Jóhannsdóttir.

____________________________________________________________

 

Minningarorð Normu Einarsdóttur

 

Elskuleg tengdamóðir mín er látin á 92. aldursári. Ingibjörg var elskuleg kona, hæglát og prúð og urðum við fljótt góðar vinkonur eftir að ég giftist Skúla yngsta syni hennar. Hún var glæsileg, gekk hnarreist og bar sig vel. Það var gott að koma á fallegt heimili hennar að Ránargötu 3 í Reykjavík en þegar ég kom inn í fjölskylduna bjó Þórdís móðir hennar hjá henni og hafði gert í nokkur ár. Hún leigði hjá föðursystur sinni, Ingibjörgu Bjarnadóttur, sem bjó líka í húsinu og var samheldnin mikil í þessari fjölskyldu. Þessar þrjár konur tóku mér opnum örmum og hefði ég ekki getað fengið betri tengdafjölskyldu.

Ingibjörg hafði misst Þórarin, manninn sinn, þegar hún var aðeins 45 ára en hann lést eftir erfið veikindi og hjúkraði hún honum af alúð. Hún fór að vinna úti eftir það og vann bæði í Belgjagerðinni og í Prjónastofunni Peysunni. Hannyrðir af öllu tagi voru helsta áhugamál hennar en hún var líka góður ljósmyndari og tók margar góðar myndir sem gaman er að skoða og ylja sér við minningarnar. Eftir að við Skúli eignuðumst börnin okkar var gaman að koma með þau í heimsókn til hennar og hún var óþreytandi að lesa fyrir þau og spila á spil. Barnabörnin okkar Skúla voru líka dugleg að koma og heimsækja langömmu á Sólvelli en þangað flutti hún fyrir tæpum átta árum. Hún lést þar 2. júní eftir stutta sjúkralegu og er starfsfólki Sólvalla þakkað kærlega fyrir hlýlegt viðmót ekki aðeins við hana heldur við okkur fjölskylduna í veikindum hennar.

Ég og fjölskylda mín þökkum Ingibjörgu samfylgdina og biðjum guð að blessa hana.

 

Norma Einarsdóttir.



Morgunblaðið fimmtudaginn 16. júní 2016

 

 

Eyrarbakkakirkja.                                                                               Ljósm.: Björn Ingi Bjarnason.



Skráð af Menningar-Staður

15.06.2016 20:31

Kirkjubær á Eyrarbakka opnar 17. júní 2016

 

 

Kirkjubær á Eyrarbakka.                                                                  Ljósm.: Björn Ingi Bjarnason. 

 

Kirkjubær á Eyrarbakka opnar 17. júní 2016

 

Sýningin Draumur aldamótabarnsins opnar í Kirkjubæ föstudaginn 17. júní 2016  kl. 12:00

og eru allir velkomnir.

Kirkjubær sem stendur rétt við Húsið á Eyrarbakka verður nú hluti af fjölbreyttu sýningarhaldi Byggðasafns Árnesinga. 

Byggðasafn Árnesinga keypti Kirkjubæ árið 2011 og hefur undanfarin ár unnið að endurbótum á húsinu og sýningargerð. Safnið hefur nýtt arf Helga Ívarssonar frá Hólum til þessa verkefnis. Kirkjubær er lítið bárujárnsklætt timburhús frá 1920 byggt af alþýðufólki og var búið í því til 1983 er það varð að sumarhúsi. Umhverfis húsið er gróðurmikill garður.

Það verður opið í Kirkjubæ á sama tíma og Húsið og Sjóminjasafnið á Eyrarbakka og er kærkomin viðbót við sýningarhaldið.

Sýningin Draumur aldamótabarnsins varpar ljósi á líf almennings á tímabilinu 1920-40 og er bæði uppfull af safnmunum í réttu samhengi og skemmtilegum fróðleik um tímabilið.

Húsakynnin sjálf tala sínu máli.


Byggðasafn Árnesinga


 

 


 

15.06.2016 17:53

17. júní 2016 á Eyrarbakka

 

 

 

17. júní 2016 á Eyrarbakka

17. júní 2016 á Eyrarbakka

 

.

 

 

Skráð af Menningar-Staður

15.06.2016 17:06

Alþýðuhúsið á Eyrarbakka 15. júní 2016

 

 

F.v.: Siggeir Ingólfsson, Rúnar Eiríksson, Jóhann Jóhannsson og Reynir Jóhannsson.
Ljósm.: Björn Ingi Bjarnaosn.

 

Alþýðuhúsið á Eyrarbakka 15. júní 2016

 




Skráð af Menningar-Staður