Menningar-Bakki * Viðhalda og efla þjóðlega menningararfleið til sjávar og sveita*
-------- Alþýðuhúsið á Eyrarbakka - Vinir alþýðunnar - Á undan sinni framtíð --- "Stærra í hugum okkar en við sjálfir gerum okkur grein fyrir" ---

Færslur: 2021 Júlí

31.07.2021 07:31

MERKIR ÍSLENDINGAR - ÁSGEIR GUÐBJARTSSON

 


Ásgeir Guðbjartsson (1928 - 2017)
 

MERKIR ÍSLENDINGAR – ÁSGEIR GUÐBJARTSSON

 

Ásgeir Guðbjartur Guðbjartsson fæddist í Kjós í Grunnavíkurhreppi þann 31. júlí 1928 .

Foreldrar hans voru Jónína Þ. Guðbjartsdóttir húsfreyja, og Guðbjartur Ásgeirsson, formaður og útgerðarmaður.

Systkini Ásgeirs: Margrét Elísabet, f. 1926,  Guðbjartur Kristján, f. 1930,   Hörður, f. 1932, Ragnheiður Ingibjörg f. 1937.

 

Eiginkona Ásgeirs var Sigríður Guðmunda Brynjólfsdóttir. Hún fæddist í Hörgshlíð í Ísafjarðardjúpi þann 29. maí 1931. Hún lést á Ísafirði 21. maí 2009.  Foreldrar hennar voru Guðný Kristín Halldórsdóttir frá Bolungarvík og Brynjólfur Ágúst Albertsson sjómaður frá Ísafirði.

 

Ásgeir og Sigríður eignuðust fjög­ur börn;

Guðbjart, f. 1949, Guðbjörgu, f. 1950, Kristínu Hjördísi, f. 1952 og Jónínu Brynju, f. 1953.

 

Ásgeir flutti ungur með foreldrum sínum til Hnífsdals og síðan til Ísafjarðar þar sem hann ólst upp. Hann hóf sinn sjómannsferil nýfermdur og var þá á dragnót upp á hálfan hlut. Ásgeir vann um tíma hjá Norðurtanganum og við beitingu. Sextán ára fór hann að róa upp á heilan hlut á línu-, troll- og síldarbátum.

 

Ásgeir tók hið minna fiskimannapróf á Ísaf­rði 1948 og hið meira fiskimannapróf í Stýrimannaskólanum í Reykja­vík árið 1965.

 

Hann var skipstjóri á Valdísi ÍS 72, 1948, Bryndísi ÍS 69, 1949, Jódísi ÍS 73 sama ár, Pólstjörnunni ÍS 85 í fjórar vertíðir, Ásbirni ÍS 12 1956, en tók þá við Guðbjörgu ÍS 47 og hafa þeir bátar og skip sem hann síðan var með verið nefnd Guðbjörg, en hann var á skuttogaranum Guðbjörgu ÍS 46.

 

Ásgeir stofnaði útgerðarfélagið Hrönn hf. á Ísafirði árið 1956. Stofnfélagar, auk Ásgeirs; voru faðir hans Guðbjartur, Guðmundur og Marías Guðmundssynir og Kristinn Arnbjörnsson. Hrönn hf. gerði út sjö báta og togara sem báru nafnið Guðbjörg ÍS. Útgerðin lét m.a. smíða fyrir sig frystitogara 1994 sem þá var talinn eitt fullkomnasta fiskiskip í heiminum.

 

Guðbjargirnar eða Guggurnar hans Geira, sem útgerðarfélagið Hrönn hf. gerði út, voru sjö talsins í þessari röð:

 

Árið 1956, 48 brúttórúmlestir;

árið 1959, 75 brl.;

árið 1963, 115 brl.;

árið 1967, 250 brl.;

árið 1974, 500 brl.;

árið 1981, 628 brl.;

árið 1994, 1.200 brl.

 

Ásgeir hætti til sjós árið 1995, 67 ára að aldri. Þá hafði hann verið skipstjóri í meira en 45 ár.

 

Ásgeir var afburða aflamaður og harðsækinn. Hann var aflakóngur á Ísafirði á sextán vetrarvertíðum samfleytt og auk þess var hann oft aflakóngur á Vestfjörðum.

 

Ásgeir var sæmdur riddarakrossi fálkaorðunnar 17. júní 1991.

 

Ásgeir Guðbjartsson lést þann 22. febrúar 2017.

 

 
 

Ásgeir Guðbjartsson ásamt eiginkonu sinni Sigríði Brynjólfsdóttur.

.

.

.

.

.

.

.

Á þessari slóð að néðan má sjá ítarlegt viðtal Hlyns Þórs Magnússonar

við Ásgeir Guðbjartsson í -Bæjarins besta- frá 29. júlí 2010.

Sjá:

 

https://timarit.is/page/6236109#page/n9/mode/2up

.

.

Skráð af Menningar Bakki.

 

 

30.07.2021 15:25

MERKIR ÍSLENDINGAR - ÓSKAR KRISTJÁNSSON

 


Óskar Kristjánsson (1921 - 2005).
 

 

MERKIR ÍSLENDINGAR – ÓSKAR KRISTJÁNSSON

 

 

Óskar Kristjánsson fæddist á Suðureyri við Súgandafjörð þann 30. júlí 1921.

Foreldrar hans voru Kristján Albert Kristjánsson kaupmaður, f. 28. janúar 1885, d. 2. ágúst 1961, og Sigríður H. Jóhannesdóttir ljósmóðir, f. 20. júní 1879, d. 8. júlí 1946.

 

Systkini Óskars voru;
 Guðrún, f. 1909 (látin), Þórdís, f. 1911, lést í æsku, Kristján Arnór, f. 1912 (látinn), Jóhannes, f. 1914 (látinn), Þórður, f. 1915 (látinn), Jón, f. 1917 (látinn), Þórdís, f. 1918 (látin), Finnborg Jóhanna, f. 1922, lést í æsku, og uppeldissystir, Jósíana Magnúsdóttir, f. 1919 (látin).



Þann  4. desember 1948 kvæntist Óskar Aðalheiði Friðbertsdóttur, húsmóður, fædd þann 28. júní 1927 á Suðureyri við Súgandafjörð, d. 22. september 2016. Foreldrar hennar voru hjónin Jóna Magnúsdóttir, húsfreyja og verkakona, og Friðbert G. Guðmundsson, sjómaður og verkamaður.

 

 Óskar og Aðalheiður eignuðust fjögur börn:
1) Erlingur, f. 16. júní 1948, 2) Sigríður, f. 24. maí 1950, 3) Kristján Albert, f. 28. maí 1955, 4) Aðalheiður Ósk, f. 6. október 1961.

 

Óskar Kristjánsson ólst upp á Suðureyri og lauk þar barna- og unglingaprófi. Hann stundaði nám við Verslunarskóla Íslands og brautskráðist þaðan sem stúdent árið 1945 ásamt sex öðrum og var það fyrsta árið sem stúdentar brautskráðust frá Verzlunarskóla Íslands.

 

Eftir nám við Verzlunarskólann settist Óskar að á Suðureyri, gerðist þar skrifstofumaður og síðar framkvæmdastjóri Ísvers, sem rak frystihús og útgerð. Samhliða starfi sínu sem framkvæmdastjóri Ísvers fékkst Óskar við útgerð minni og stærri fiskibáta um árabil.

 

Óskar var framkvæmdastjóri útgerðar FiskiðjunnarFreyju hf, Súgandafirði, eftir sameiningu Ísvers og Freyju, 1971-1981.

 

Snemma tók Óskar þátt í sveitarstjórnarmálum, var t.d. hreppsnefndarmaður í 30 ár, þar af oddviti í átta ár. Í sýslunefnd Vestur-Ísafjarðarsýslu í tíu ár. Hann gegndi fjölmörgum trúnaðarstörfum fyrir Sjálfstæðisflokkinn.

 

Óskar sat í stjórn Sparisjóðs Súgfirðinga í 36 ár og þar af sparisjóðsstjóri í 18 ár eða allt þar til hann fluttist búferlum til Reykjavíkur árið 1984.

 

Óskar starfaði í Lionshreyfingunni fyrir vestan og var meðlimur Oddfellowreglunnar í stúkunni Nr. 1, Ingólfi í Reykjavík.

 

Aðaláhugamál Óskars voru bridds og laxveiðar. Laxveiðar voru hans líf og yndi og var Krossá í Bitrufirði eftirlætisá hans, þar sem hann veiddi á hverju ári í alls 35 ár. Bridds spilaði hann hvar sem honum bauðst það og spilaði sér til ánægju á tölvu heima síðustu árin. Þá naut hann sín vel við snokerborðið með félögunum þegar stund gafst til á allra síðustu árum heima í Eiðismýri 30 á Seltjarnarnesi.


Óskar Kristjánsson lést á Landspítala – háskólasjúkrahúsi við Hringbraut þann  29. október  2005.

 

 



Aðalheiður Friðbertsdóttir og Óskar Kristjánsson.

 


Skráð af Menningar-Bakki.

 

 

30.07.2021 10:15

Heyannir

 

 

 

 

       --- Heyannir ---


 




Skráð af Menningar-Bakki

 

30.07.2021 09:18

Merkir Íslendingar - Auður Sveinsdóttir Laxness

 

 

Auður Sveinsdóttir Laxness (1918 - 2012).

 

Merkir Íslendingar - Auður Sveinsdóttir Laxness

 

 

Auður fæddist á Eyrarbakka 30. júlí 1918 og ólst þar upp til sjö ára aldurs.

Foreldrar hennar voru Sveinn Guðmundsson járnsmiður og k.h., Halldóra Kristín Jónsdóttir.

 

Sveinn var sonur Guðmundar, b. á Nýjabæ Gíslasonar, og Margrétar, systur Hafliða, afa Ólafs K. Magnússonar ljósmyndara. Margrét var dóttir Jóns, b. á Álfsstöðum á Skeiðum, bróður Einars, afa Einars Magnússonar, rektors MR. Móðir Margrétar var Margrét Dóróthea, systir Guðmundar í Miðdal, langafa Vigdísar Finnbogadóttur og Errós.

 

Halldóra Kristín var systir Steinunnar Guðrúnar, móður Baldvins Halldórssonar leikara frá Arngerðareyri við Djúp, föður Páls bókmenntagagnrýnanda og Ingu Láru á Eyrarbakka, f.v. deildarstjóra Ljósmyndadeildar Þjóðminjasafns Íslands. Halldóra var dóttir Jóns, hreppstjóra á Skálmarnesmúla Þórðarsonar, b. á Þórisstöðum, bróður Þorsteins í Æðey, föður Péturs Thorsteinssonar útgerðarmanns. Móðir Jóns hreppstjóra var Guðrún, systir Jóns, föður Björns ráðherra og ritstjóra, föður Sveins forseta.

 

Auður lauk gagnfræðaprófi og prófum frá Handíða- og myndlistarskólanum 1946. Hún starfaði við röntgendeild Landspítalans í tólf ár, kenndi í Varmárskóla og starfaði við Þjóðminjasafnið í einn vetur.

 

Auður giftist á aðfangadag 1945, Halldóri Kiljan Laxness, rithöfundi og Nóbelsverðlaunahafa. Eftir það aðstoðaði hún eiginmann sinn heima og á ferðalögum, og stundaði húsmóðurstörf á hinu gestkvæma heimili þeirra að Gljúfrasteini. Hún var þar lengst af húsfreyja en flutti að Hlaðhömrum í Mosfellsbæ 2004.

 

Dætur Auðar og Halldórs eru Sigríður, kennari og húsfreyja, og Guðný, kvikmyndagerðarmaður.

 

Auður lést þann 29. október 2012

 

 

 

Auður Sveinsdóttir Laxness og Halldór Kiljan Laxness,

tengdasonur Eyrarbakka. 

.

 

 

Skráð af Menningar-Bakki


 

 

 

29.07.2021 09:01

29. júlí 2021 - þjóðhátíðardagur Færeyja

 

 

 

 

29. júlí 2021 - þjóðhátíðardagur Færeyja

 

 

Þjóðhátíðardagar Norðurlandanna:

 

Álandseyjar 

9. júní   Fyrsta þing Álandseyinga kemur saman 1923.

 

Danmörk            

16. apríl eða 5. júní     16. apríl er afmælisdagur Margrétar II. (f. 1940), en yfirleitt er litið á 5. júní sem þjóðhátíðardag, þá var stjórnarskráin staðfest árið 1849.

 

Finnland             

6. desember      Finnar lýsa yfir sjálfstæði 1917. 

 

Færeyjar            

29. júlí   Ólafsvaka.

 

Grænland          

21. júní  Lengsti dagur ársins.

 

Ísland   

17. júní Fæðingardagur Jóns Sigurðssonar 1811 og lýðveldið stofnað 1944.

 

Noregur             

17. maí  Noregur fullvalda ríki í konungssambandi við Svía 1814, og stjórnarskráin frá Eiðsvelli gekk í gildi.

 

Svíþjóð

6. júní   Gústaf I. kjörinn konungur og Svíþjóð lýst sjálfstætt þjóðríki 1523
 

.

.

.

.

 

.

Skráð af Menningar-Bakki.

 

28.07.2021 06:24

Ragnheiður Þórarinsdóttir - Fædd 7. apríl 1956 - Dáin 18. júlí 2021 - Minning

 

 
 
    Ragnheiður Þórarinsdóttir.
 

 

Ragnheiður Þórarinsdóttir - Fædd 7. apríl 1956

 

- Dáin 18. júlí 2021 - Minning

 

 

Ragn­heiður Þór­ar­ins­dótt­ir fædd­ist í Reykja­vík 7. apríl 1956. Hún lést á Land­spít­al­an­um 18. júlí 2021.

 

For­eldr­ar henn­ar voru Mar­grét Sæ­munds­dótt­ir sauma­kona og Ólaf­ur H. Torfa­son vega­verk­stjóri. Systkini henn­ar sam­mæðra eru Krist­ín Þor­björg, f. 1959, d. 2016, Ólína Mar­grét, f. 1961, og Torfi Jó­hann, f. 1965. Ragn­heiður gift­ist 4. des­em­ber 1976 eft­ir­lif­andi eig­in­manni sín­um, Þór­arni Th. Ólafs­syni stýri­manni, f. 1954. Börn þeirra eru a) Ágústa Mar­grét, f. 1976. Henn­ar maður er Andrew Brydon og börn þeirra eru Iso­bel Sól­ey, f. 2010, og Óskar Thor, f. 2015. b) Krist­ín Theó­dóra, f. 1980, börn henn­ar eru Em­il­ía Ólöf, f. 2007, og Þór­ar­inn Smári, f. 2014, unnusti Krist­ín­ar er Eg­ill Harðar­son. c) Ólöf Hall­dóra, f. 1980, barn henn­ar er Ronja Krist­ín, f. 2009, sam­býl­ismaður Ólaf­ar er Ein­ar Storo.

 

Skóla­ganga Ragn­heiðar var í Álfta­mýr­ar­skóla og Ármúla­skóla og eft­ir gagn­fræðapróf lá leiðin á vinnu­markaðinn í ýmis störf.

 

Ragn­heiður og Þór­ar­inn hófu bú­skap á Eyr­ar­bakka í des­em­ber 1975 og bjuggu þar æ síðan. Eft­ir að börn­in komust á leik­skóla starfaði Ragn­heiður í fisk­vinnslu fyrstu 10 árin en síðan vann hún á Sól­völl­um, dval­ar­heim­ili aldraðra á Eyr­ar­bakka, og síðan um 10 ára skeið á hjúkr­un­ar­heim­il­inu Kumb­ara­vogi þar til starf­semi lauk.

Árið 2006 fór hún í sjúkra­liðanám og lauk því á tveim­ur árum og starfaði síðan sem slík.

Ragn­heiður starfaði tals­vert að fé­lags­mál­um. Gekk í slysa­varna­deild­ina Björg á Eyr­ar­bakka fljót­lega eft­ir að hún hóf bú­skap og síðan inn­an fárra ára í Kven­fé­lag Eyr­ar­bakka og starfaði þar alla tíð, var í stjórn í mörg ár og formaður þess nokk­ur ár. Hún vígðist inn í Odd­fellow-regl­una árið 2011 í Re­bekku­stúk­una nr. 9 Þóru á Sel­fossi. Hún var í hópi systra sem hyggj­ast stofna nýja stúku nú á haust­mánuðum.

Ragn­heiður veikt­ist skyndi­lega í lok apríl sl. Hún varð fljótt mjög veik og fékkst ekk­ert við ráðið. Hún lést sunnu­dag­inn 18. júlí á blóðmeina­deild Land­spít­al­ans.

 

Útför henn­ar fer fram frá Sel­foss­kirkju í dag, miðvikudaginn 28. júlí 2021, klukk­an 14.

Jarðsett verður í Eyr­ar­bakka­kirkju­g­arði.

 

Slóð á streymi má finna á:

www.mbl.is/?andlat/

 

Streymt verður frá at­höfn­inni á:

htt­ps://?sel­foss­kirkja.is/

 

_______________________________________________________________


Minningarorð



Okk­ur set­ur hljóð. Nú hef­ur mynd­ast skarð í hóp­inn okk­ar góða. Ragn­heiður er far­in allt of fljótt. Eft­ir margra ára vináttu og gæðastund­ir standa eft­ir minn­ing­ar sem hvert og eitt okk­ar á í hug og hjarta. Minn­ing­ar um fundi og ferðir, af­mæli og fögnuði, helg­ar­ferðir og sam­veru.

 

Það var ekki komið að tóm­um kof­un­um þegar veisl­ur sem Ragn­heiður kom að voru ann­ars veg­ar, þar lék allt í hönd­um henn­ar. Ragn­heiður hafði sterk­ar skoðanir og lét þær óspart í ljós og stund­um þannig að ekki líkaði öll­um. Ragn­heiður var gjaf­mild og einnig fag­ur­keri og hafði næmt auga fyr­ir um­hverfi og list­um.

Þegar Ragn­heiður varð sex­tug hélt hún veg­lega af­mæl­is­veislu. Þar hyllt­um við hana með glensi og af­mæl­is­söng og setj­um hér eitt er­indi úr söngn­um en það lýs­ir henni vel.

 

Hún stund­um er sett­leg og stund­um er hvat­vís,

og enda­laust gef­ur hún líf­inu lit.

Hún kann sko að vera til, alltaf svo huggó.

Já, Ragn­heiður okk­ar hún er bara skvís.

Með ein­dæm­um gest­ris­in alltaf hún er.

Með kræs­ing­ar ljúf­ar á borðum hjá sér.

 

Elsku Þór­ar­inn vin­ur okk­ar, dæt­ur og fjöl­skyld­an öll, við vott­um ykk­ur inni­lega samúð. Blessuð sé minn­ing Ragn­heiðar um ókom­in ár.

 

Auður og Rún­ar, Guðbjört (Gúd­dý) og Jón Ómar, Haf­dís og Jó­hann­es (Jói), Hug­borg (Hugga) og Sig­ur­mund­ur (Diddi), Ingi­björg (Inga) og Páll (Palli), Ragn­heiður (Ragga) og Birg­ir (Biggi).

______________________________________________


Ég man þegar ég sá Ragn­heiði fyrst, þá var hún ný­flutt á Eyr­ar­bakka með hon­um Þór­arni Th. Ólafs­syni. Þau bjuggu fyrst á Tjörn á Eyr­ar­bakka, á meðan þau voru að byggja sér framtíðar­hús­næði. Ragn­heiður var glæsi­leg kona með rautt hár og kvik­ar hreyf­ing­ar. Hlát­ur henn­ar heyrðist vel þar sem hún var, hún var dug­leg og ósér­hlíf­in og sagði hisp­urs­laust það sem henni fannst.

 

Hún var nær­gæt­in við þá sem minna máttu sín og sýndi þeim hlýju. Hún var mik­il hús­móðir, heim­il­is­störf léku í hönd­um henn­ar og hún var mik­ill fag­ur­keri. Ragn­heiður byrjaði í Kven­fé­lagi Eyr­ar­bakka fljót­lega eft­ir að hún flutti á Bakk­ann og tók að sér mörg ábyrgðar­störf inn­an Kven­fé­lags­ins. Hún var formaður kaffi­nefnd­ar, var í stjórn Kven­fé­lags­ins og seinna formaður þess í nokk­ur ár. Hún átti sér áhuga­mál fyr­ir hönd Kven­fé­lags­ins fyr­ir utan hefðbund­in störf henn­ar inn­an þess; það var að Kven­fé­lag Eyr­ar­bakka ætti sér sinn eig­in fána. Þessu mark­miði sínu fyr­ir hönd Kven­fé­lags­ins náði hún og gætti þess vel að fán­inn væri hafður við merkisat­b­urði Kven­fé­lags­ins og einnig þegar kven­fé­lags­kona var til graf­ar bor­in.

 

Und­ir­rituð var með Ragn­heiði í einni af bas­ar­nefnd­um Kven­fé­lags­ins og kynnt­ist henni þar, jafn­framt því að þekkja hana sem sam­borg­ara.

 

Með þess­ari kveðju lang­ar mig, fyr­ir hönd Kven­fé­lags Eyr­ar­bakka, að þakka Ragn­heiði fyr­ir henn­ar fram­lag til Kven­fé­lags Eyr­ar­bakka og til sam­fé­lags­ins alls.

 

Krist­ín Ei­ríks­dótt­ir,

formaður Kven­fé­lags Eyr­ar­bakka.

 

_______________________________________


Morgunblaðið 28. júlí 2021 þar sem einnig eru fleiri minningargreinar.



Skráð af Menningar-Bakki.


 

27.07.2021 19:53

Eldra fólk á Suðurlandi hefur stofnað aðgerðarhóp

 

 

 

 

Eldra fólk á Suðurlandi

 

hefur stofnað aðgerðarhóp

 

 

  • Eldra fólk vill hafa áhrif á eigið líf – líka á Suðurlandi!

 

  • Nýstofnaður aðgerðarhópur eldra fólks á Suðurlandi hefur sent
  • frá sér eftirfarandi grein:

 

Stjórnmálamenn hafa mikinn áhuga á kjörum eldra fólks -fyrir kosningar. Þeir vita að sextíu ára og eldri eru 75 þúsund og öll með atkvæðisrétt! Þess vegna er okkur eldri lofað gulli og grænum skógum fyrir kosningar -í von um atkvæði. Áhugi stjórnmálamannanna dvínar strax að kosningum loknum.

 

Á landsfundi Landsambands eldri borgara (LEB) í maí s.l. voru samþykkt „Áhersluatriði eldra fólks í komandi alþingiskosningum“ Stefna í fimm liðum sem fjallar um kjaramál, starfslok, heilbrigðisþjónustu, búsetuúrræði og einföldun laga um málefni eldra fólks (Nánar á www.leb.is. Nú er verkefnið á næstunni að kynna áhersluatriðin fyrir væntanlegum alþingismönnum.

 

Á Suðurlandi eru starfandi 13 félög eldri borgara með um 2.200 félaga. (55 félög alls á landinu með um 30.000 félagsmenn). Fulltrúar frá meirihluta félaganna hafa hist á tveim fundum til að ræða samstarf um aðgerðir í aðdraganda alþingiskosninga.

 

 

Einkum voru tvær leiðir ræddar:

 

Að bjóða frambjóðendum í Suðurkjördæmi á fund með félagsmönnum í félögum eldri borgara á Suðurlandi. Þar væri væntanlegum þingmönnum gerð grein fyrir áhersluatriðunum og þeim jafnframt gefinn kostur á að gera grein fyrir sínum áherslum í málefnum eldra fólks.

 

Hin leiðin var að eldra fólk mæti á félags- og framboðsfundi flokkanna og komi áhersluatriðunum á framfæri við frambjóðendur.

 

Ákveðið var að fara þessa seinni leið og fimm manna aðgerðahópi falið að annast undirbúning og skipulag aðgerða.

 

Hópinn skipa:


Þór Ísfeld Vilhjálmsson, Vestmannaeyjum, sími 897 9615,

Þorgrímur Óli Sigurðsson, Selfossi, sími 698 3100,

Margrét Guðmundsdóttir, Mýrdal sími 860 2810,

Elín Siggeirsdóttir, Biskupstungum, sími 891 8531 

og Jón Ragnar Björnsson, Rangárvallasýslu, formaður, sími 6990055.

 

Þeir sem vilja taka þátt í þessum aðgerðum eru beðnir að hafa samband við eitthvert okkar í hópnum. Við verðum með áhersluatriðin fimm á blaði sem hægt er að afhenda frambjóðendum og öðrum, sem áhuga hafa. Einnig blað með nánari útlistun á áhersluatriðunum fyrir þá sem kynna áhersluatriðin.

 

Reynslan sýnir að stjórnvöld eru treg til að liðsinna okkur. Þau hafa líka kvartað yfir því að erfitt sé að vita hvað við viljum. Kannski höfum við ekki verið nægilega samstíga í kröfugerðum en nú hefur myndast skýr og afgerandi samstaða meðal félagsmanna um allt land. LEB hefur kynnt stjórnmálaflokkunum áhersluatriðin og með því að hafa nú skipulega samband við „grasrótina“ á stjórnmálafundum, má vænta þess að dropinn holi steininn og réttlætið sigri.

 

 

Skráð af Menningar-Bakki.

 

 

27.07.2021 08:01

Merkir Íslendingar - Sigríður J. Ragnar

 

 

 

Sigríður J. Ragnar (1922 - 1993)

 

 

Merkir Íslendingar – Sigríður J. Ragnar

 

 

Sigríður J. Ragnar var fædd á Gautlöndum í Mývatnssveit þann  26. júlí 1922.

Dóttir hjónanna Jóns Gauta Péturssonar bónda þar og konu hans, Önnu Jakobsdóttur frá Narfastöðum.

Sigríður átti þrjú systkini:  Ásgerður kennari;  Böðvar, bóndi á Gautlöndum; Ragnhildur skrifstofumaður.

 

Sigríður giftist 1945 Ragnari H. Ragnar, f. 28.9.1898, d. 24.12.1987. Foreldrar hans voru Hjálmar Jónsson frá Skútustöðum við Mývatn, bóndi á Ljótsstöðum í Laxárdal, og kona hans, Áslaug Torfadóttir frá Ólafsdal.

 

Börn Sigríðar og Ragnars:

Anna Áslaug, f. 7.11.1946, píanóleikari;

Sigríður, f. 31.10.1949, f.v skólastjóri Tónlistarskólans á Ísafirði;

Hjálmar Helgi, f. 23.9.1952, tónskáld.

 

Eftir gagnfræðapróf frá Menntaskólanum á Akureyri hóf hún nám við Kennaraskólann í Reykjavík haustið 1944. Þá um veturinn kynntist hún Ragnari Hjálmarssyni Ragnar sem hér var staddur sem hermaður í Bandaríkjaher. Þau giftust sumarið 1945 og fluttu til Norður-Dakóta í Bandaríkjunum þar sem þau störfuðu við tónmennt til ársins 1948. Þá bauðst Ragnari staða við nýstofnaðan Tónlistarskóla Ísafjarðar. Þau störfuðu við skólann til dauðadags og sköpuðu nánast úr engu einn öflugasta og þekktasta tónlistarskóla landsins.

 

Auk þess að vera framarlega í menningarmálum staðarins fengu þau fjölda listamanna til að heimsækja Ísafjörð og var heimili þeirra, sem Sigríður stjórnaði af einstökum dugnaði, allt í senn; skóli fyrir á annað hundrað börn, miðstöð menningarmála og heimili listamanna sem bæinn heimsóttu.

 

Sigríður var helsti frumkvöðull að stofnun vestfirskra náttúruverndarsamtaka og í stjórn þeirra.

 

Hún vann einnig ötullega að stofnun Kvennalistans á Ísafirði. Þá sat hún í Menningarráði Ísafjarðar í fjölda ára auk annarra trúnaðarstarfa.

 

Þeim hjónum var sýndur margháttaður og verðskuldaður sómi fyrir störf þeirra að menningar- og félagsmálum. Ragnar var kjörinn heiðursborgari Ísafjarðarkaupstaðar og var heiðursfélagi Tónlistarkennarafélags Íslands. Hann var sæmdur riddarakrossi og stórriddarakrossi hinnar íslensku fálkaorðu og Sigríður J. Ragnar hlaut riddarakross fálkaorðunnar.



Sigríður J. Ragnar lést þann 11. mars 1993.

 


Hjónin Sigríður J. Ragnar og Ragnar H. Ragnar.
 


Skráð af Menningar-Bakki.

 

26.07.2021 18:46

Nýir rekstraraðilar teknir við versluninni Bakkanum á Eyrarbakka

 

 

Nú þarf að drífa sig í að smakka pylsurnar hjá Söndru og Júlla. Mynd: Elín Birna.

 

Nýir rekstraraðilar teknir við

 

versluninni Bakkanum á Eyrarbakka

 

Eggert Valur Guðmundsson og Eygló Har hafa selt rekstur verslunarinnar Bakkans til hjónanna Söndru Sævarsdóttur og Júlíusar Emilssonar á Eyrarbakka. Í samtali við Eggert Val kemur fram að hann hafi haft í nógu að snúast undanfarin ár og nú sé komið að því að hægja aðeins ferðina. „Við höfum rekið þetta í ein átta ár samhliða pólitíkinni og starfi mínu fyrir Íslandspóst. Við höfum verið að velta þessu fyrir okkur í dágóðan tíma. Þá fannst mér mikilvægt að finna rétta aðilann til þess að taka við keflinu.“ Það er á Eggerti að heyra að honum þyki mikilvægt að verslunarstarfsemi haldi áfram niðri á bakkanum. „Ég er þess fullviss að rekstur dagvöruverslunar er björt á Eyrarbakka og hún er komin í góðar hendur til framtíðar. Það er nauðsynlegt að hér sé rekin verslun með því helsta. Eins og allir vita eiga minni byggðakjarnar undir högg að sækja með skerðingu á þjónustu. Það er mikið í húfi og þarf að standa vörð um það. Ég hef fulla trú á því að Sandra og Júlíus komi til með að gera þetta með sóma og tryggja verslun hér til framtíðar.“

 

Viðskiptavinirnir og spjallið standa upp úr

 

Margs er að minnast frá löngum tíma, en Eggert segir að helst séu það viðskiptavinir og góð kynni við fólk sem kemur í verslunina. „Það er auðvitað fólkið sem stendur upp úr á þessum tíma. Allir viðskiptavinirnir. Það leggja margir leið sína hingað til að spjalla og það hefur verið gefandi að fá að njóta þess,“ segir Eggert.

 

Engar dramatískar breytingar framundan

 

Í samtali við Söndru kom fram að þeim hjónum hlakki til að þjónusta Eyrbekkinga áfram eins og verið hefur. „Við erum bara spennt fyrir þessu verkefni. Það eru engar dramatískar breytingar fram undan, en pylsupotturinn er kominn af stað svo hér er hægt að stoppa og fá sér pylsu og svo stendur til að lengja aðeins opnunartímann,“ segir Sandra brosandi. Aðspurð um frekari breytingar segir Sandra að það komi til með að gerast hægt og rólega. Þá eru dæturnar spenntar en þær munu hjálpa til við að standa vaktina þegar þarf.

 

 

 

Sandra búin að koma sér fyrir innan við búðarborðið. Mynd: Elín Birna.


Dagskráin - fréttablað á Suðurlandi.

 


Skráð af Menningar-Bakki

 

26.07.2021 08:23

Merkir Íslendingar - Trausti Friðbertsson

 


Trausti Friðbertsson (1917 - 2002).
 

 

 

Merkir Íslendingar - Trausti Friðbertsson

 

 

Trausti Friðbertsson fæddist á Suðureyri við Súgandafjörð þann 26. júlí 1917.

 

Foreldrar Trausta: Friðbert Friðbertsson, f. 12.8.1888, d. 31.7.1938, skólastjóri á Suðureyri, og Pálína Ólavía Sveinbjörnsdóttir, f. 16.12. 1879, d. 1960, húsmóðir.

Systkini Trausta: Ásdís, f. 24.5.. 1919 og Hörður, f. 7.3. 1922.

 

Trausti kvæntist 13. júní 1942 Ragnheiði Láru Sigurðardóttur, f. í Reykjavík 13. júlí 1921, dóttir hjónanna Lovísu Árnadóttur og Sigurðar E. Ingimundarsonar. Ragnheiður lést þann 29. desember 1984.

 

Börn Trausta og Ragnheiðar:

1) drengur er fæddist andvana árið 1942;

2) Gylfi, f. 19. nóv. 1943,

3) Sunneva, f. 2. feb. 1947,

4) Ragnar Magnús, f. 25. des. 1948,

5) Friðbert, f. 4. okt. 1954.

 

Trausti vann á uppvaxtarárum sínum þau störf er til féllu í þeirra tíma íslensku sjávarþorpi, bæði til sjós og lands. Hann lauk prófi frá Samvinnuskólanum árið 1940 og hóf fljótlega eftir það að starfa við verslun og annan rekstur sem varð síðan hans lífsstarf. Fyrstu búskaparár sín bjuggu þau Ragnheiður á Suðureyri en fluttu síðan til Ísafjarðar. Hann hóf störf við verslun J.S. Edwald og Shell-umboðið á Ísafirði árið 1945 og starfaði þar til ársins 1948 er hann var ráðinn kaupfélagsstjóri við Kaupfélag Önfirðinga á Flateyri.

 

Trausti var kaupfélagsstjóri á Flateyri í nær 28 ár eða þar til hann lét af störfum vorið 1976. Ásamt með starfi kaupfélagsstjóra gegndi Trausti starfi framkvæmdastjóra Hjallaness hf., sem var útgerðarfélag að stórum hluta í eigu Kaupfélags Önfirðinga, frá og með árinu 1960. Þá féll einnig undir hans stjórn rekstur fiskverkunar, sláturhúss o.fl. sem þá var á vegum Kaupfélags Önfirðinga.

 

Trausti starfaði í Lionsklúbbi Önundarfjarðar og einnig nokkuð að slysavarnamálum.  

 

Árið 1976 fluttust þau Ragnheiður búferlum til Reykjavíkur þar sem þau bjuggu á Kleppsvegi 16. Eftir flutninginn suður tók Trausti við starfi skrifstofustjóra hjá Gúmmívinnustofunni hf. þar sem hann starfaði allt til vorsins 1995 er hann lét af störfum tæplega 78 ára gamall.

 

Á Flateyri tók hann þátt í félagsmálum og sinnti nefndastörfum á vegum sveitarfélagsins. Hann sinnti einnig félagsstörfum innan Sambands ísl. samvinnufélaga og vann að ýmsu er laut að framförum og úrbótum innan samtaka fiskframleiðenda og útvegsmanna á Vestfjörðum.

 

Árið 1990 festi hann kaup á íbúð í nýbyggingu fyrir eldri borgara í Hraunbæ 103 þar sem hann bjó síðan. Trausti sat í stjórn húsfélagsins í Hraunbæ 103 og annaðist fjárreiður þess til hinsta dags.

 

Trausti Friðbertsson lést á Landspítalanum þann 3. apríl 2002.

 

.

.

.

.


Verslunarhús Kaupéfélags Önfirðinga sem tekið var í notkun 1956.
 

.

 

Kaupfélagsstjóratal Kaupfélags Önfirðinga á starfstíma félagsins 1918 - 1989.
 

Trausti Friðbertsson var farsæll kaupfélagsstjóri í 28 ár - frá 1948 - 1976.
 



Skráð af Menningar-Bakki.