Menningar-Staður
Félagsheimilið Staður á Eyrarbakka

17.12.2016 08:48

Opið hús í Konubókastofu á Eyrarbakka um helgina

 

 

Bjarni Harðarson og Anna í Túni.

 

Opið hús í Konubókastofu á Eyrarbakka um helgina
 

17. og 18. desember 2016

 

Konubókastofa hóf starfsemi sína fyrir rúmlega þremum og hálfu ári síðan. Á þessum tíma hefur sýnt sig að þörf er á stað sem þessum þar sem hægt er að fræðast um íslenska kvenrithöfunda og verkin þeirra. Titlarnir eru að nálgast 2500 og nánast allt efni hefur verið gefið af einstaklingum, höfundum, útgáfum og bókasöfnum.

Í sumar ákvað bæjarstjórn Árborgar að leyfa Konubókastofu að nota tvö herbergi í húsinu Blátúni í stað eins. Við fengum herbergið afhent þann 1. október og höfum verið að mála og gera herbergið undirbúið fyrir okkar starfsemi. Við fengum líka að opna á milli herbergjanna tveggja þannig að núna er komið mjög gott pláss og miklu auðveldara að taka á móti gestum. Við fáum líka að nota gang og eldhús með almenningsbókasafninu sem er á annarri hæð.

Vegna alls þessa var ákveðið að setja upp sýningu á plássinu sem við höfum. Þar verða ýmsar upplýsingar um höfunda og verkin þeirra. Upplýsingarnar verða bæði á ensku og íslensku þar sem erlendum gestum er að fjölga. Uppbyggingasjóður Suðurlands veitti Konubókastofu styrk upp á 500.000 krónur í þetta allt saman.

Verið er að hanna bækling með upplýsingum um starfsemina bæði á ensku og íslensku. Einnig er verið að endurhanna og bæta heimasíðuna og undirbúa hana fyrir það að vera á fleiri tungumálum auk annars. Á heimasíðunni www.konubokastofa.is er hægt að sjá hvaða efni er til hjá okkur og þá um leið hvað vantar í safnið.

Sjónvarpsmenn frá þættinum Að sunnan á N4 komu í heimsókn í haust og tóku viðtal við mig um safnið. Sá þáttur var síðan sýndur 19. nóvember. Sjá má þáttinn á heimasíðu N4.

Vorönnin mun fara í að klára að setja upp sýninguna og undirbúa starfsemina fyrir gestakomu sumarið 2017. Þá verður vonandi opið á hverjum degi. Á sumardaginn fyrsta 20. apríl 2017 verður dagskrá þar sem fram munu koma kvenhöfundar sem skrifa glæpasögur. Helstu rithöfundarnir okkar á því sviði hafa boðað komu sína og stefnt er á að hafa þarna fjölbreytta og skemmtilega dagskrá. Nánar um það síðar.

 

Helgina 17. og 18. desember klukkan 14–16 verður opið hús hjá okkur og þá er hægt að sjá hvernig plássið er orðið. Sýningin verður örugglega ekki alveg komin upp en það verður kynning á henni.

 

Með þessum orðum vil ég bjóða ykkur velkomin þann 17. og 18. desember og um leið vil ég óska ykkur alls hins besta.
 

Anna í Túni

 

Skráð af Menningar-Staður
 

16.12.2016 20:10

Framsókn 100 ára - Besta kosningakaffið 2006

 

 

Kaffikonur Framsóknar í Árborg 2006.

 

Framsókn 100 ára – Besta kosningakaffið 2006

 

Í tilefni af 100 ára afmæli Framsóknarflokksins í dag, 16. desember 2016, er rifjuð hér upp tilkynningu frá árinu 2006 þegar Hrútavinafélagið Örvar valdi kosningakaffi  Framsóknarmanna í Árborg það besta hjá framboðunum fyrir kosningarnar í Árborg vorið 2006.



Fréttatilkynningin hljóðaði svo:

Hrútavinafélagið Örvar á Suðurlandi (Hrútavinir Group) láta sér fátt óviðkomandi í mannlegri tilveru og eru glöggir á að koma auga á hinar jákvæðu hliðar mannlífs og menningararfleiðar eins og dæmin sanna.

Hrútavinir hafa komið víða við á síðustu vikum og spá töluvert í væntanlegar sveitarstjórnarkosningar á landinu og þá sérstaklaeg í Árborg og nær byggðum.

Hrútavinir hafa sótt heim allar kosningaskrifstofur framboðana í Sveitarfélaginu Árborg og þegið góðar kaffiveitingar og um leið vegið og metið kaffigæðin og önnur lykilatriði kaffimála.

 

Hrútavinir Group gjöra hér með kunnugt:

“Besta framboðskaffið í Árborg”

er kaffi Framsóknarmanna á skrifstofu þeirra við Eyraveg á Selfossi."

 

Greinargerð:

Kaffi allra framboðana í Árborg eru góð en Framsóknarkaffið tryggði sér glæsilegan sigur með því að út í kaffið var boðið upp á sérlega góðan heimagerðan rjóma sem gerði gott kaffi enn betra. Rjóminn er úr Geirakoti í Flóanum frá heiðurshjónunum Maríu Hauksdóttur og Ólafi Kristjánssyni.

 

Tilkynnist þetta hér með.

 




Skráð af Menningar-Staður

16.12.2016 17:05

Sonja Huld Ólafsdóttir - Fædd 20. október 1943 - Dáin 7. desember 2016 - Minning

 

 

Sonja Huld Ólafsdóttir.

 

 

Sonja Huld Ólafsdóttir - Fædd  20. október 1943

- Dáin 7. desember 2016 - Minning

 

Sonja Huld Ólafsdóttir fæddist 20. október 1943 að Skinnum í Þykkvabæ. Hún lést á líknardeild Landspítalans 7. desember 2016.

 

Foreldrar Sonju voru Svava Guðmundsdóttir og Ólafur Guðjónsson. Sonja ólst upp í Skinnum í Þykkvabæ hjá hjónunum Guðrúnu Jónsdóttur og Jóni Jónssyni ásamt dætrum þeirra Pálínu, Bergþóru og Kristjönu og sambýlismanni Pálínu, Sigurjóni. Einnig ólst upp í Skinnum Jón Rúnar Hartmannsson, barnabarn Pálínu og Sigurjóns. Samband Sonju við Bergþóru varð sérstaklega náið og voru þær alla tíð eins og mæðgur.

 

Sonja átti einn bróður, Gunnlaug Ólafsson, sem nú er látinn og uppeldissystur, Báru Sigurjónsdóttur.

 

Sonja hóf sambúð með Gísla Pálssyni, þá tilvonandi eiginmanni sínum, 1962, þau slitu samvistum 1978. Seinni sambýlismaður Sonju er Már Viktor Jónsson en þau slitu samvistum 2004.

 

Síðustu æviárin bjó Sonja á Eyrarbakka og Selfossi. Sonja eignaðist fimm börn.

 

Börn og barnabörn Sonju í aldursröð eru:

1) Martha, gift Hartmanni Kristni. Börn Mörthu eru Lilja og Arna.

2) Þorbjörg, gift Gísla Wiium. Börn Þorbjargar eru: Orri Wiium, Sonja Wiium og Sunna Wiium.

3) Bergþóra, gift Hjalta Bogasyni. Börn Bergþóru eru: Björn, Rúnar Óli, Gísli Steinn, Kolka Rós og Kormákur.

4) Eyrún, gift Guðmundi Ólafssyni. Börn Eyrúnar eru Elísabet Ósk, Þyrí Huld, Jana Hrönn og Már Viktor.

5) Gauti Þór. Börn Gauta Þórs eru: Baltasar Owen, Anna Perla, Sonja Perla.

 

Barnabarnabörn Sonju eru nú 13 talsins.

 

Útför Sonju fer fór frá Hafnarfjarðarkirkju í dag, 16. desember 2016.
 


Morgunblaðið 16. desember 2016
 



Skráð af Menningar-Staður
 

16.12.2016 12:23

Stúfur kom að Stað

 


Siggeir Ingólfsson, staðarhaldari að Stað, með restina af

piparkökubrotunum sem runnu ofan í Vini alþýðunnar.

 

Stúfur kom að Stað

 

Jólasveinarnir koma nú hver af öðrum til byggða en Stekkjarstaur kom fyrstur þann 12. desember sl.

Stúfur var sá þriðji og kom hann við í Alþýðuhúisinu á Eyrarbakka í Félagsheimilinu Stað á að morgni miðvikudagsins  þann 14. desember. Meðal þess sem hann var með í poka  sínum voru piparkökubrot  sem hann hengdi á hurðina fyrir Vini alþýðunnar þegar þeir mættu til morgunspjalls.

Vinir alþýðunnar þakka þessa hugulsemi jólasveina og eru þeir ætíð velkomnir í Alþýðuhúsið.

 

.

 



Skráð af Menningar-Staður

16.12.2016 08:21

Fagna aldarafmæli Framsóknarflokksins

 

Mynd úr gagnasafni Morgunblaðsins

Alþingi

Framsóknarflokkurinn hefur setið í ríkisstjórn

í um 62 ár í 100 ára sögu flokksins.

 

Fagna aldarafmæli Framsóknarflokksins

 

,,Í samfellt 100 ár hefur Framsóknarflokknum auðnast að laga sig að breyttum tímum og gert það vel án þess að víkja frá grunngildunum. Þess vegna hefur hann getað lifað sem sami flokkurinn í hundrað ár, haldið í grunngildin en engu að síður að þroskast með breyttu þjóðfélagi á hverjum tíma,“ segir Sigurður Ingi Jóhannsson, forsætisráðherra og formaður Framsóknarflokksins, en flokkurinn verður 100 ára í dag, 16. desember.

,,Framsóknarflokkurinn hefur á þessum 100 árum verið mikilsvert afl á vettvangi íslenskra stjórnmála og hefur oft á tíðum notið mikils trausts landsmanna og setið í ríkisstjórn í um 62 ára skeið á þessum 100 árum. Auðvitað skoðum við stöðu okkar í dag í því ljósi,“ segir hann.

 

Tíminn í hátíðarútgáfu

Boðað hefur verið til afmælishátíðar í Þjóðleikhúsinu í dag, föstudaginn 16. desember 2016 og hefst hátíðardagskráin kl 18 með ávarpi formanns. Einnig standa framsóknarmenn víða um land að hátíðarsamkomum á morgun og um helgina í tilefni afmælisins. Af þessu tilefni verður einnig gefin út sérstök hátíðarútgáfa af Tímanum á afmælisdaginn.

Sigurður Ingi segir að á þessum tímamótum leggi framsóknarmenn áherslu á umfjöllun um menntamál og settur verður á laggirnar menntamálahópur til að vinna að undirbúningi að stefnumótun flokksins í menntamálum. ,,Það verður líka fjallað um samvinnustefnuna í fortíð, nútíð og framtíð og af því að við erum mikill jafnréttisflokkur og höfum jafnan gengið á undan öðrum, þá verður líka fjallað um áhrif kvenna í flokknum.“

Sigurður Ingi segist líta svo á að staða Framsóknarflokksins sé mjög sterk í dag þrátt fyrir að síðustu kosningar hafi ekki gengið eins vel og framsóknarmenn höfðu vonast eftir.

„Við upplifðum það í kosningunum að stefna okkar á mjög góðan hljómgrunn og menn gerðu sér grein fyrir því betur núna en kannski á síðustu tólf árum fyrir hvað við stöndum. Þar held ég að skipti mestu máli barátta okkar fyrir hag heimila í landinu á síðustu átta árum,“ segir hann.

„Við erum að sjálfsögðu líka atvinnulífsflokkur, velferðarflokkur og landsbyggðarflokkur og erum sprottin upp úr bændasamfélagi og höfum aldrei yfirgefið þau stef. Það er kannski skýringin á því að við verðum allra flokka elst.“

 

,,Fyrstu skrefin inn í nýja framsóknaröld“

Sigurður Ingi segir að Framsóknarflokkurinn muni áfram byggja á þessum grunngildum. Hann segir mikinn heiður að fá að vera formaður flokksins á þessum tímum ,,og taka fyrstu skrefin inn í nýja framsóknaröld“.

Morgunblaðið.


Skráð af Menningar-Staður

15.12.2016 06:55

Glæpir, furður og forneskja á upplestrarkvöldi

 

 

 

Glæpir, furður og forneskja á upplestrarkvöldi

 

Bókakaffið á Selfossi stendur fyrir menningarviðburðum á aðventunni
 


Fjórða og næstsíðasta jólaupplestrarkvöld Bókakaffisins á Selfossi verður fjölbreytt, en þar munu koma við sögu samkvæmt tilkynningu Jón lærði, íslenskir barnaræningar, göfugar kellíngar, draumar franskra skáldkvenna, húsvitjanir í Suðursveit og fréttakonan Sigríður Hagalín les einkennilegar fréttir af áður óþekktum hörmungum landans.

 

Samkoman er á Austurvegi 22 á Selfossi í kvöld, fimmtudagskvöld 15. desember 2016, og húsið opnað kl. 20 en lestur hefst kl. 20.30 og stendur í um klukkutíma.

 

Þeir sem lesa þetta kvöld eru fyrrnefnd Sigríður Hagalín sem sendir frá sér skáldsöguna Eyland, Viðar Hreinsson sagnfræðingur sem skrifað hefur um Jón lærða, Óskar Magnússon sem sendir frá sér glæpasöguna Verjandinn, Sváfnir Sveinbjarnarson sem sendir frá sér minningabókina Á meðan straumarnir sungu, Guðrún Ingólfsdóttir sem les úr handritum kvenna af fyrri tíð og síðast en ekki síst Þór Stefánsson ljóðskáld sem kynnir þýdd ljóð franskra skáldkvenna sem koma út í bók hans Frumdrög að draumi.

 

Allir eru hjartanlega velkomnir meðan húsrúm leyfir.

Lofað er notalegri jólastemningu og hið rómaða kakó hússins verður á sérstöku tilboði í tilefni dagsins.

 

.

 

.

.

 

.

 

 

 

 

Skráð af Menningar-Staður

 
 
 
 

 

 

14.12.2016 21:31

14. des. 2016 - 126 ár frá vígslu Eyrarbakkakirkju

 

 
 

 

Í Eyrarbakkakirkju 4. desember 2016.
Eyrarbakkakirkja var vígð 14. desember 1890 af Hallgrími Sveinssyni biskupi.

 


14. des. 2016 - 126 ár frá vígslu Eyrarbakkakirkju
 


EYRARBAKKAKIRKJA var byggð og vígð árið 1890.


Merkasti kirkjugripurinn er altaristaflan, en hana málaði Louise drottning Kristjáns konungs IX. Danakonungs.
Drottningin gaf kirkjunni töfluna og er nafn hennar á henni og ártalið 1891.

 

 



Skráð af Menningar-Staður
 

12.12.2016 15:41

Aðventustund Vina alþýðunnar 12. des. 2016

 


Siggeir Ingólfsson, staðarhaldari að Stað á Eyrarbakka.

 

Aðventustund Vina alþýðunnar 12. des. 2016

 

Vinir alþýðunnar buðu til aðventustundar í hádeginu í dag, mánudaginn 12. desember,  í Alþýðuhúsinu á Eyrarbakka hvar er í Félagsheimilinu Stað þar í bæ. Veislustjóri var Siggeir Ingólfsson, staðarhaldar á Stað.


Á borðum voru afurðir Hjallastefnurnar sem Vinir alþýðunnar hafa verkað á þjóðlegan máta úr hráefni sem veitt hefur verið af Eyrarbakkabátnum Mána ÁR. Þetta var ; kæst skata – nætursaltaður þorskur og siginn fiskur sem verkaður hefur verið í útsýnispallinum við Alþýðuhúsið á síðustu vikum. Þúsundir erlendra ferðamanna hafa myndað verkunina á fiskinum og þannig vottað þessa þjóðlegu verkunaraðferð Hjallastefnunnar.


Sérstakur gestur aðventustundarinnar var Ásmundur Friðriksson, alþingismaður í Suðurkjördæmi, en hann á mjög sterkt bakland hjá Vinum alþýðunnar.


Björn Ingi Bjarnason, forseti Hrútavinafélagsins, flutti blandaða þjóðlega hugvekju í menningarlegu samspili Vestfirðinga og Sunnlendinga fyrr og nú.

Þá var í lokin Bókalottó þar sem dregnar voru út bækur frá Vestfirska forlaginu.



Mennigar-Staður færði aðventustundina til myndar.
Myndaalbúm er komið á Menningar-Stað.
Smella á þessa slóð: http://menningarstadur.123.is/photoalbums/281300/



Nokkrar myndir hér:

 

.

.

.

 

.

.

.

.

.

.




Skráð af Menningar-Staður

12.12.2016 07:31

Bækurnar að vestan 2016

 

 

 

Bækurnar að vestan 2016

 

Bækurnar að vestan eru hvorki stórkostlegar, æðislegar, einstakar, meistarverk, ógleymanlegar né töfrandi. En við teljum af vestfirskri hógværð að þær leyni á sér!
 

   Við höfum nú gefið út á fjórða hundrað bækur um Vestfirði og Vestfirðinga. Sumir fræðimenn telja að þetta sé einhver umsvifamesta bókaútgáfa hjá einu forlagi utan höfuðborgarsvæðisins frá upphafi byggðar í landinu!

Hvað heldur þú?

 

Vestfjarðabækurnar fást í bókaverslunum um land allt!

 

 

 

 


Skráð af Menningar-Staður

11.12.2016 07:12

131.700 FERÐAMENN Í NÓVEMBER 2016

 

 

 

131.700 FERÐAMENN Í NÓVEMBER 2016

 

Ferðamenn í nóvember 2010-2016

Tæplega 132 þúsund erlendir ferðamenn fóru frá landinu í nóvember síðastliðnum samkvæmt talningum Ferðamálastofu í Flugstöð Leifs Eiríkssonar eða 50 þúsund fleiri en í nóvember á síðasta ári. Aukningin nemur 61,4% milli ára.

Fjöldi ferðamanna hefur ríflega sexfaldast frá árinu 2010. Heildarfjöldi ferðamanna frá áramótun er um 1,64 milljónir eða 37,9% fleiri miðað við fjölda ferðamanna á tímabilinu janúar til nóvember árið 2015.

Bandaríkjamenn og Bretar um helmingur ferðamanna

10 fjölmennustu þjóðernin

Um 74% ferðamanna í nýliðnum nóvember voru af tíu þjóðernum. Bretar voru fjölmennastir eða 27,8% af heildarfjölda en fast á eftir fylgdu Bandaríkjamenn sem voru 23,2% af heildarfjölda. Þar á eftir komu Þjóðverjar (4,5%), Kanadamenn (4,1%), Frakkar (2,9%), Svíar (2,7%), Kínverjar (2,2%), Pólverjar (2,2%), Norðmenn (2,1%) og Danir (2,0%).

Bandaríkjamönnum fjölgaði langmest milli ára í nóvember eða um 15.260 manns og voru þeir tvöfalt fleiri í ár en í fyrra. Bretum fjölgaði um 7.651 ferðamann í nóvember sem er 26,4% aukning frá því í fyrra, Kanadamönnum um 3.211 sem var 142,5% aukning frá því í fyrra og Þjóðverjum um 2.745 ferðamenn sem er nærri tvöföldun frá því í fyrra. Þessar fjórar þjóðir báru uppi 54,6% af aukningu ferðamanna milli ára í nóvember.

Ferðamenn eftir markaðssvæðum

Fjöldi N-Ameríkana hefur ríflega ellefu-faldast og fjöldi Breta nærri nífaldast frá 2010

Sexföld aukning ferðamanna hefur verið frá 2010. Þegar litið er til fjölda ferðamanna eftir markaðssvæðum á tímabilinu 2010 til 2016 má sjá verulega aukningu frá flestum markaðssvæðum. Þannig hefur fjöldi ferðamanna frá N-Ameríku meira en ellefu-faldast á tímabilinu, fjöldi Breta nærri nífaldast, fjöldi ferðamanna frá löndum sem lenda í hópnum ,,annað“ meira en áttfaldast og fjöldi ferðamanna frá Mið- og S-Evrópu nærri fimmfaldast. Norðurlandabúum hefur hins vegar fjölgað minna eða um 53,1% á tímabilinu 2010-2016.

Hlutfall ferðamanan eftir markaðssvæðum

Hlutfall N-Ameríkana hækkar en Norðurlandabúa lækkar

Hlutfallsleg samsetning ferðamanna hefur breyst nokkuð frá árinu 2010 eins og sjá má af myndinni hér til hliðar. Í nýliðnum nóvember voru Norðurlandabúar 7,4% ferðamanna. Hlutfall þeirra af heild hefur lækkað verulega síðustu ár en það var 30,2% árið 2010. Hlutdeild Breta var hins vegar 27,8% og hlutfall N-Ameríkana 27,4% í nóvember síðastliðnum og hefur hún farið vaxandi frá 2010. Hlutdeild Mið- og S-Evrópubúa hefur verið á líku róli á tímabilinu 2010 til 2016 en hlutdeild þeirra sem falla undir annað hefur vaxið á síðasta ári.

Ferðir Íslendinga utan

Um 45 þúsund Íslendingar fóru utan í nóvember eða 9.450 fleiri en í nóvember árið 2015. Um er að ræða 26,5% fleiri brottfarir en árið 2015.

Nánari upplýsingar

Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur / Fjöldi ferðamanna hér á vefnum.

Ferðamenn í nóvember - tafla


Af www.ferdamalastofa.is


Skráð af Menningar-Staður