Fundarstjóri á aðalfundi SFR var Eyrbekkingurinn Ari B. Thorarensen og er hann hér í pontu. Ljósm.: Björn Ingi Bjarnason.

 

Ályktun aðalfundar SFR þann 23. mars 2017 um umhverfismál

 

Sjálfbær nýting auðlinda okkar er undirstaða alls lífs í landinu. Opinberir aðilar verða því að sýna frumkvæði og ábyrgð með því að starfa í anda sjálfbærrar þróunar og vistvænnar hugsunar. Við berum öll ábyrgð í umgengni við náttúruna og því er mikilvægt að atvinnulífið þróist inn á umhverfisvænni brautir. Þannig stuðlum við að efnahagslegri, félagslegri og vistfræðilegri velferð og tryggjum að ekki sé gengið á arð komandi kynslóða.

Aðalfundur SFR leggur þunga áherslu á mikilvægi þess að Ísland axli ábyrgð í losun gróðurhúsa-lofttegunda og hvetur til aukinnar notkunar á innlendum vistvænum orkugjöfum og hraðari útskipta á hefðbundnu eldsneyti. Einnig leggur fundurinn ríka áherslu á að ekki verði bætt við nýjum orkufrekum og mengandi iðnaði.

Efla þarf almenningssamgöngur og uppbyggingu innviða samgöngukerfis í þágu hjólandi og gangandi. Gera þarf aðra valkosti en einkabílinn aðgengilegri almenningi og draga þannig úr notkun einkabíla.

Mikilvægt er að atvinnurekendur hvetji starfsfólk til að nota vistvæna samgöngumáta í og úr vinnu t.d. með því að bjóða starfsfólki samgöngustyrki. Aðeins með því að virkja alla í samfélaginu er hægt að tryggja rétt allra til að búa í heilsusamlegra umhverfi.




Af www.sfr.is


Skráð af Menningar-Staður

 

 

Sóknaráætlun Suðurlands

Úthlutun styrkja – vor 2017
 

Verkefnastjórn Sóknaráætlunar fjallaði um tillögur fagráðs nýsköpunar og fagráðs menningar um úthlutun styrkveitinga til verkefna úr Uppbyggingarsjóði Suðurlands, í fyrri úthlutun ársins. Alls bárust sjóðnum 137 umsóknir að þessu sinni, þar af 50 nýsköpunarverkefni og 87 menningarverkefni.

 

Niðurstaða verkefnastjórnar er að leggja til að veita 45 menningarverkefnum styrki að fjárhæð 18.940.000 kr. og 27 nýsköpunarverkefnum að fjárhæð 18.600.000 kr.

Samtals er því lagt til að veita 72 verkefnum styrki í fyrri úthlutun ársins að fjárhæð 37.540.000 kr.

 

Úthlutun til verkefna – vor 2017

Af: www.sass.is Skráð af Menningar-Staður

 

 

Valgeir Guðjónsson og Ásta Kristrún, Bakkasofu á Eyrarbakka.

 

Fuglatónleikasyrpan „Vorið kemur“

í Eyrarbakkakirkju í apríl

 

Þau Valgeir Guðjónsson og Ásta Kristrún í Bakkastofu á Eyrarbakka blása til tónleikasyrpu með hlýjum vorblæ fyrir fólk á öllum aldri í hinni hljómfögru Eyrarbakkakirkju. Fyrstu tónleikarnir sem bera heitið „Vorið kemur“ verða sunnudaginn 9. apríl nk. kl. 15 og síðan á sama tíma á skírdag og sumardaginn fyrsta.

Hvað eru fuglatónleikar, kunna margir að spyrja og ekki að undra? Jú, það eru tónleikar með textum sem fjalla um fugla himinsins eins og þeir birtast í ljóðum Jóhannesar úr Kötlum, skáldsins góða í Hveragerði.

Valgeir Guðjónsson Bakkastofubóndi hefur í þrígang gefið út plötu með lögum sem hann samdi við kvæði Jóhannesar. Þegar þriðja platan kom út fyrir rúmur tveimur árum, heimsótti Valgeir tugi leikskóla og grunnskóla og flutti lögin fyrir börn, 2 til 15 ára. Bakkastofa hefur líka boðið gestum á öllum aldri að hlýða á fuglalög Valgeirs og Jóhannesar við afar góðar undirtektir.

Ásta Kristrún, í Bakkastofu, segir að tónleikaröð helguð fuglum sé svo sannarlega við hæfi í Flóanum og á Eyrarbakka, enda Fuglafriðlandið allt um kring. Þá bætir hún við að frumkvöðlar í fuglaskoðun voru á Eyrabakka á 19. öld eins og Eggjaskúrin norðan við „Húsið“ ber vitni um.

Að lokum bendir Ásta á að kjörið sé að líta við á páskamálverkasýninguna í „Húsinu“ sem opnar þann 8. apríl með verkum Ingu Hlöðvers og stendur fram til 23. apríl. Þar má líta listileg olíumálverk Ingu af fuglum, sem búa flestir allt í kringum okkur.

 

Af www.dfs.is



Skráð af Menningar-Staður

 

 

Inga Hlöðvers sýnir í Húsinu á Eyrarbakka

 

Laugardaginn 8. apríl kl. 13 opnar Inga Hlöðvers myndlistarmaður sýningu í borðstofu Hússins á Eyrarbakka. Á sýningunni gefur að líta myndir af fuglum og efni tengt Eyrarbakka.

 

Inga Hlöðvers fæddist í Reykjavík og stundaði nám í Myndlistaskóla Reykjavíkur, Myndlista- og handíðaskóla Íslands og Academie voor Beeldende Kunst í Rotterdam, Hollandi. Á árunum 1987 til 2003 bjó hún í Hollandi og Frakklandi, tók þátt í samsýningum og hélt einkasýningar á verkum sínum á meginlandi Evrópu, í Bretlandi og á Íslandi. Um miðjan 10. áratuginn þróuðust málverk Ingu í átt að abstraktverkum af íslensku landslagi en síðan hafa þau orðið fígúratívari og myndefnið breyst. Inga býr og vinnur nú á Eyrarbakka.

 

Í tengslum við sýningaropnunina verður boðið upp á dagskrá kl 15 í samvinnu við Bakkastofu. Ásta Kristrún Ragnarsdóttir og Valgeir Guðjónsson leggja út frá sýningu Ingu í tali og tónum.

 

Eins og áður segir opnar sýningin 8. apríl og stendur til 23. apríl kl 13-17 en á öðrum tímum eftir samkomulagi.

 

Að auki  býður Bakkastofa upp á fuglatónleika í Eyrarbakkakirkju, dagana 9. apríl (Pálmasunnudag), 13. apríl (Skírdag) og 20. apríl (Sumardaginn fyrsta) kl. 15 í tengslum við sýningu Ingu. Valgeir Guðjónsson er þekktur fyrir lagasmíðar sínar við fuglavísur Jóhannesar úr Kötlum.

 

Hóflegur aðgangseyrir.

Dagskrá fyrir alla fjölskylduna.
 

 

Húsið á Eyrarbakka.


Skráð af Menningar-Staður

 

Mykines leggst að bryggju í Þorlákshöfn í dag. Skipið er engin smásmíði eins og sjá má,

en stórhýsið Kuldaboli er í baksýn. Ljósm.: sunnlenska.is/Vignir Arnarson

 

„Viðbrögðin hafa verið framar okkar björtustu vonum“

 

Beinar siglingar færeyska skipafélagsins Smyril Line Carge milli Íslands og Evrópu eru hafnar en vöruflutningaferjan Mykines kom með fyrsta farminn frá Rotterdam til Þorlákshafnar á öðrum tímanum í dag.

Í tilefni tímamótanna verður „opið skip“ kl. 16 í dag þar sem hægt verður að skoða ferjuna en Smyril Line Cargo er fyrsta skipafélagið sem hefur reglubundnar vikulegar millilandasiglingar til Þorlákshafnar. Þar hafa miklar hafnarframkvæmdir staðið yfir vegna komu ferjunnar og er þess vænst að siglingarnar stuðli að enn frekari vexti og atvinnuuppbyggingu á svæðinu. 

Með siglingaleiðinni milli Rotterdam og Þorlákshafnar stóreykur Smyril Line Cargo þjónustu sína við íslenska markaðinn, ekki síst suðvesturhorn landsins, og hafa bókanir farið vel af stað.

„Viðbrögðin hafa verið framar okkar björtustu vonum. Það er strax mikil eftirspurn eftir flutningum á bílum og stórum tækjum og vinnuvélum til landsins, ásamt allskyns bygginga- og neytendavörum. Útflutningurinn fer líka mjög vel af stað en þar er farmurinn mestmegnis fiskur,“ segir Linda Björk Gunnlaugsdóttir, framkvæmdastjóri Smyril Line Cargo á Íslandi.

Mykinesið lagði af stað frá Rotterdam á þriðjudag, með viðkomu í Færeyjum á miðvikudag, en í kvöld siglir það beint til Rotterdam og verður komin þangað á mánudag. 

Ferjan Mykines er 19 þúsund tonn, ríflega 138 metra löng og tæplega 23 metra breið og getur hún flutt 90 tengivagna og 500 bíla í hverri ferð. Hún var smíðuð árið 1996 í UMOE skipasmíðastöðinni í Noregi og var m.a. áður í siglingum á Eystrasaltinu. Ferjan er skráð í Færeyjum og eru 24 í áhöfn. 

Af www.sunnlenska.is


Skráð af Menningar-Staður

 

.

Smyril Line kemur til Þorlákshafnar á morgun,

föstudaginn 7. apríl 2017

 

Ferjuskipið Mykines frá Smyril Line Cargo er væntanlegt til hafnar í Þorlákshöfn á morgun, föstudaginn 7. apríl 2017, en skipið er núna við strendur Bretlands á leiðinni frá Rotterdam til Færeyja. Skipið kemur til Færeyja á miðvikudaginn þaðan sem það siglir síðan til Þorlákshafnar.

 

Miklar framkvæmdir hafa verið í Þorlákshöfn fyrir komu ferjunnar og hefur til að mynda Norðurvararbryggja verið fjarlægð og búið er að hlaða alla öldudempandi fláa. Þá hefur höfnin einnig verið dýpkuð.

 

Mykines er engin smásmíði en skipið er 19 þúsund tonn og er ríflega 138 metra langt, tæplega 23 metrar á breidd og getur flutt 90 tengivagna og 500 bíla í hverri ferð. Vörurnar sem fluttar eru með skipinu eru á tengivögnum sem keyrðir eru um borð í skipið.

 

Ljóst er að með tilkomu Smyril Line Cargo muni umsvif í Þorlákshöfn stóraukast og væntingar eru um að siglingarnar stuðli að enn frekari vexti og atvinnuuppbyggingu á svæðinu.



Skráð af Menningar-Staður

 

Eyþór Arnalds í ræðustól á góðri stund fyrir nokkrum árum. Ljósm.: Björn Ingi Bjarnason.

Breyt­ing­ar á eign­ar­haldi hjá Árvakri


Breyt­ing­ar hafa orðið á eign­ar­haldi í Þórs­mörk ehf., sem er eig­andi Árvak­urs hf., út­gef­anda Morg­un­blaðsins, mbl.is og fleiri miðla. 

Sam­herji hef­ur selt all­an hlut sinn til Eyþórs Arn­alds. Sam­herji átti 18,43% hlut í gegn­um fé­lagið Katt­ar­nef ehf. og fer með þessu úr hlut­hafa­hópn­um. 

Að auki kaup­ir Eyþór 6,14% hlut Síld­ar­vinnsl­unn­ar hf. og 2,05% hlut Vís­is hf., alls 26,62%.

 

Skráð af Menningar-Staður

 

 

Alþýðuhúsið á Eyrarbakka 4. apríl 2017

 

. . Skráð af Menningar-Staður

 

 

Minningarstund á Litla-Hrauni

 

Þann 31. mars 2017, voru 80 á frá því skoski togarinn Loch Morar strandaði í brimgarðinum milli Eyrarbakka og Stokkseyrar, um það bil 500 faðma frá skerjagarðinum út undan Gamla Hrauni, á stað sem kallast Framnesrif eða Hraunstangar.

Á togaranum vor 12 menn og fórust allir. Lík 6 þeirra fundust í fjörum við Eyrarbakka næstu vikur og mánuði og voru jarðsett í Eyrarbakkakirkjugarði.

Loch Morar lagði úr höfn í Aberdeen 22. mars 1937 áleiðis til Íslandsmiða undir stjórn Walter Edward Barber sem var reyndur og dugandi skipstjóri. En hvað varð til þess að skipið strandaði í brimgarðinum á Eyrarbakka verður víst aldrei vitað.

Nöfn sem skipið hafði áður borið voru: 

Giovanni Guinti 1918,  Idaho 1919 Cymrea 1920,  Sir Mark Sykes 1932,  og síðast Loch Morar (A361) 1935. 

Skipið var byggt hjá Ailsa Ship Building Co Ltd 1918 og var 277 tonn að stærð. Nafn skipsins –Loch Morar- er eftir dýpsta stöðuvatni Skotlands sem er 310 metrar að dýpt.

Þessi atburður tengist Litla-Hrauni því skipsbjalla -Loch Morar- (Giovanni Guianti eins og það hét upphaflega) er þar varðveitt og minnig skipverjanna 12 þannig heiðruð.

Við lok vinnudags á Litla-Hrauni þann 31. mars sl. var minningarstund við bjölluna og henni hringt 12 sinnum í minningu þeirra 12 sem fórust.

Blessuð sé minnig þeirra skosku sjómanna og virðing sem sýnileg er á Litla-Hrauni og í Eyrarbakkakirkjugarði.

 

. Þessi atburður tengist Litla-Hrauni því skipsbjalla -Loch Morar- (Giovanni Guianti eins og það hét upphaflega) er þar varðveitt og minnig skipverjanna 12 þannig heiðruð. . Skráð af Menningar-Staður

 

Árni Valdimarsson (1936 - 2017)

 

Árni Valdimarsson - Fæddur 31. desember 1936

- Dáinn 2. mars 2017 - Minning

 

Árni Valdimarsson fæddist í Reykjavík 31. desember 1936. Hann lést að heimili sínu á Selfossi 2. mars 2017.

Foreldrar hans voru Ólafía Dagbjört Þorsteinsdóttir frá Hafnarfirði og Valdimar Guðmundsson frá Kílhrauni á Skeiðum. Bræður Árna voru Þorsteinn Alfreðsson, sem er látinn, og Erlendur Valdimarsson, sem býr í Hafnarfirði. Eftirlifandi eiginkona Árna er Nína Björg Knútsdóttir, f. 10.12. 1940. Foreldrar hennar voru Elínborg Anna Kjartansdóttir og Knútur Guðjónsson. Fósturfaðir Nínu Bjargar var Arnþór Guðnason. Nína og Árni eignuðust sex börn, elstur var Guðmundur Árni, sem lést 1958, en upp komust Anna Sigríður, f. 1958, sambýlismaður hennar er Hörður Sverrisson.

Börn hennar: Drengur, f. og d. 1978, Lóa Dagbjört, f. 1979. Unnusti hennar er Albert Þór Magnússon. Börn þeirra eru: Daníel Victor, Magnús Valur og Anna Sóley. Drífa Björk, f. 1983. Eiginmaður hennar er Haraldur Logi Hrafnkelsson. Börn þeirra eru Haraldur Logi og Björk Linnet. Drífa átti fyrir eina dóttur, Söru Jasmín.

Steinar, f. 1960, eiginkona hans er Friðsemd Erla Soffía Þórðardóttir. Börn þeirra eru: Sóldís Malla, f. 2005, Þórður Már, f. 2008, og Steinn Steinarr, f. 2011. Fyrir átti Steinar Nínu Björgu, f. 1979. Eiginmaður hennar er Kristinn Valgeirsson. Börn þeirra eru Júlía Sól og Steinar Þór.

Árni, f. 1982. Dætur hans eru Thelma, Brynja og Anna.

Friðsemd, f. 1988. Unnusti hennar er Nikos Dyzma. Sonur þeirra er óskírður, en fyrir átti Friðsemd Baltasar.

Þröstur, f. 1964. Börn hans eru Karen Lind, f. 1985. Sonur hennar er Gabríel. Sarah, f. 1988, Axel Arnþór, f. 1992, unnusta hans er Anna Margrét Kristjánsdóttir. Sonur þeirra er Aron. Aron Leeví, f. 1994, og Þórður Atli, f. 2005.

Elínborg Arna, f. 1968, eiginmaður hennar er Magnús Vignir Árnason. Börn þeirra eru Árni, f. 1988. Unnusta hans er Bára Sif Guðlaugsdóttir. Sonur þeirra er Rúrik Leví. Anna Júlía, f. 1999.

Valdimar, f. 1969. Synir hans eru Ásgeir Karl, f. 1996, og Árni, f. 2003.

 

Árni var einn af frumbyggjum á Selfossi, mikill athafnamaður og frumkvöðull.

Hann stofnaði ásamt félögum sínum Bifreiðastöð Selfoss, síðar Fossnesti. og Inghól og var framkvæmdastjóri þar. Eftir það rak hann Straumnes, útgerð og fiskvinnslu á Selfossi, og átti í félagi við Jóhann Alfreðsson vélbátinn Árnesing ÁR 25. Hann var einn stofnenda jarðvinnslufélagsins Aflvéla, sá um allt bókhald og reikningsfærslur fyrir Byggingavöruverslun Steinars Árnasonar á Selfossi og útbjó skattaskýrslur fyrir fjöldamarga samborgara sína áratugum saman.

Hann starfaði í Landsbankanum í 25 ár, þar af var hann í 11 ár útibússtjóri í Þorlákshöfn, á Eyrarbakka og Stokkseyri. Sextugur hóf hann nám í Háskóla Íslands þar sem hann lauk prófi sem lögg. fasteigna- og skipasali, keypti Fasteignasöluna Bakka og rak hana í áratug.

Sjötugur keypti hann svo Hraðfrystihúsið á Eyrarbakka þar sem hann rak ásamt fjölskyldu sinni ferðaþjónustu, gistihús, bændamarkað, kaffihús, bílageymslur og fleira undir nafninu Gónhóll.

 

Útför Árna fór fram í kyrrþey.
__________________________________

Minningarorð Ársæls Þórðarsonar

 

Með nokkrum orðum kveð ég nú frænda minn og vin, Árna Valdimarsson.

Arnbjörg, föðuramma Árna, og Þórunn, móðuramma mín, voru systur og það var Valdimar, föður Árna, að þakka að frændtengsl voru ræktuð af alúð því bræðurnir og bændurnir á Kílhrauni buðu á hverju sumri Þórunni frænku sinni til nokkurra daga dvalar en amma dvaldi á sumrin á æskuheimili mínu á Borg og þangað var hún sótt og þangað var henni skilað að orðlofsdvöl lokinni. Þessar heimsóknir ömmu að Kílhrauni voru viðburðir sem heimilisfólkið á Borg bar virðingu fyrir og styrktu viðhorf til frændrækni.

Valdi kom auk þess oft í heimsókn að Borg, greindur, skemmtilegur og ákaflega ættfróður maður, sem ég kynntist vel. Minnisstæður öðlingsmaður. Þegar þau Lóa voru flutt til Reykjavíkur og einnig ég, heimsótti ég þau og Erlend, sem þá rak heimili með foreldrum sínum.

Ég var um tvítugt þegar ég kynntist Árna sem þá hafði fest ráð sitt og bjó á Selfossi. Ég var alltaf dálítið montinn yfir að eiga þennan myndarlega frænda sem alltaf var hress og glaður og hrókur alls fagnaðar hvar sem hann var. Árni vann og þekkti öll störf til sjós og lands, hann átti því dýrmætan sjóð reynslu þegar athafnamaðurinn Árni Valdimarsson steig fram á sjónarsviðið sem framkvæmdastjóri við fyrirtæki sem hann var eigandi í eða stjórnaði.

Eftir að ég flutti til Reykjavíkur og Árni hóf störf við Landsbankann sem útibússtjóri í útibúum bankans í þorpunum á ströndinni sýndi hann sína ræktarsemi og heimsótti mömmu, sem bjó á Eyrarbakka, reglulega. þannig viðhéldust og efldust tengslin.

Það kom mér ekkert á óvart þegar Árni, á miðjum aldri, hóf nám og varð löggiltur fasteignasali. Árni lét sjaldan sitja við orðin tóm og rak lengi fasteignasöluna Bakka í Sigtúnum, því virðulega húsi á Selfossi, sem jafnframt var/er heimili þeirra hjóna, hans og Nínu, sem stóð jafnan eins og klettur við hlið eiginmannsins. Í Sigtún heimsótti ég þau hjónin og naut mikillar gestrisni.

Það var aldrei stöðnun í athafnaþrá Árna og þegar fiskvinnslu var hætt í Hraðfrystistöð Eyrarbakka keypti Árni húsin og rak í þeim margþætta starfsemi undir nafninu Gónhóll en efnahagshrunið fræga gerði frænda mínum óleik og draumar hans rættust aldrei nema að hluta varðandi þann rekstur.

Að upplagi var Árni andlegt og líkamlegt hraustmenni, bjartsýnin og dugnaðurinn hélt honum gangandi því um árabil herjuðu á heilsu hans illvígir sjúkdómar. Hann erfði frá foreldrum sínum manngæsku og átti trúarstyrk í gleði og þraut. Blessuð sé minning góðs vinar.

Ég bið öllum aðstandendum Árna Guðs friðar og blessunar.

 

Ársæll Þórðarson.


Morgunblaðið 28. mars 2017


Skráð af Menningar-Staður