Menningar-Staður
Félagsheimilið Staður á Eyrarbakka

26.08.2016 09:37

Áslaug Guðrún Harðardóttir - Fædd 1. nóvember 1941 - Dáin 18. ágúst 2016 - Minning

 

 

Áslaug Guðrún Harðardóttir.

 

Áslaug Guðrún Harðardóttir - Fædd 1. nóvember 1941

- Dáin 18. ágúst 2016 - Minning

 

Áslaug Guðrún Harðardóttir fæddist Reykjavík 1. nóvember 1941. Hún lést á hjúkrunarheimilinu Sóltúni 18. ágúst 2016.

Foreldrar hennar voru Katla Pálsdóttir, f. 17.12. 1914, d. 18.11. 2000, og Hörður Bjarnason, f. 3.11. 1910, d. 2.9. 1990. Bróðir Áslaugar er Hörður H. Bjarnason, f. 20.2. 1944. Eiginkona hans var Áróra Sigurgeirsdóttir, f. 15.5. 1943, d. 13.11. 2003. Börn þeirra eru Sigríður Ása Harðardóttir, f. 12.2. 1963, Bjarni Einar Harðarson, f. 12.4. 1972, og Katla Guðrún Harðardóttir, f. 29.12. 1976.

Áslaug giftist 30. september 1961 Jóni Hákoni Magnússyni, f. 12.9. 1941, d. 18.7. 2014. Foreldrar hans voru Svava Sveinsdóttir frá Hvilft í Önundarfirði, f. 12.9. 1909, d. 9.12. 1990, og Magnús Guðjón Kristjánsson frá Flateyri, f. 13.7. 1904, d. 2.11. 1993.

Börn Áslaugar og Jóns Hákonar eru Áslaug Svava, f. 20.7. 1975, maki Haukur Marinósson, f. 29.9. 1967, og Hörður Hákon, f. 22.5. 1976.

Áslaug lauk verslunarprófi frá Verslunarskóla Íslands 1959. Fljótlega eftir það flutti hún til Bandaríkjanna þar sem Jón Hákon var í háskólanámi og þau giftu sig þar úti. Þau fluttu aftur heim til Íslands 1965 og vann Áslaug sem einkaritari Alfreðs Elíassonar, forstjóra Loftleiða, til 1975. 1986 stofnuðu þau hjón fyrirtækið Kynning og markaður og þar starfaði hún þar til fyrir um 10 árum.

Útför Áslaugar fer fram frá Fossvogskirkju í dag, 26. ágúst 2016, og hefst klukkan 15.

__________________________________________________________________________________


Minningarorð Eiðs Guðnasonar

 

Það var reyndar ekki óvænt, þegar fregnin barst um andlát góðrar vinkonu, Áslaugar Guðrúnar Harðardóttur, að morgni fimmtudagsins 18. ágúst. Hún hafði átt við vanheilsu að stríða um nokkurt skeið. Síðustu árin, einkanlega síðustu tvö árin, eftir ótímabært fráfall eiginmanns hennar, Jóns Hákonar Magnússonar, voru henni þungbær á marga lund. Undanfarin misseri naut hún góðs atlætis í Sóltúni, þar sem hún hafði gert sér fallegt heimili. Eftir andlát Jóns kom einnig við sögu gamall vinahópur þeirra hjóna, sem studdi við, þegar stuðnings var þörf og þegar á móti blés. Við söknum nú vinar í stað.

Vinátta okkar Eyglóar og þeirra Áslaugar og Jóns átti sér langa sögu. Ekki bara frá sameiginlegum sjónvarpsárum í árdaga íslensks sjónvarps heldur og löngu fyrir þann tíma. Úr skátahreyfingu og blaðamennsku.

Ung bundust þau Áslaug og Jón tryggðaböndum. Strax á gagnfræðaskólaárunum, voru þau par, sem eftir var tekið; glæsileg bæði tvö og Áslaug sannkallaður kvennablómi.

Það var mikið í hana spunnið. Hún var forkur dugleg og fjölhæf, átti rætur í heimili þar sem menningin var í hávegum höfð. Á námsárum Jóns í Minnesota lagðist hún á árarnar með vinnu við MacAlester-háskólann, meðan Jón drýgði tekjurnar sem kokkur á skyndibitastað!

Að námi loknu og eftir komuna heim starfaði Áslaug um árabil sem einkaritari Alfreðs Elíassonar, forstjóra Loftleiða. Það var mikið trúnaðarstarf.

Saman stofnuðu þau Jón Hákon svo KOM, Kynningu og markað, almannatengslafyrirtæki, sem var brautryðjandi á því sviði og laðaði til sín hæft starfsfólk og trausta viðskiptavini. Þar sá Áslaug um bókhald og skrifstofuhald um árabil. Stálgreind og minnug var hún og betri en enginn við uppbyggingu fyrirtækisins þar sem fyrstu árin var á brattann að sækja, en eftir því sem árin liðu blómstraði fyrirtækið og Áslaug Guðrún átti vissulega sinn þátt í því.

Að leiðarlokum minnist ég traustrar vináttu og gleðistunda í áratugi. Minnist símtala seinustu árin, sem gerðu okkur báðum gott, held ég. Það var gott að eiga þau að vinum Áslaugu og Jón Hákon. Vinir og góðar minningar gefa lífinu gildi, sem mölur og ryð fá ekki grandað.

 

Áslaug Guðrún Harðardóttir var traustur vinur. Hennar er gott að minnast og hennar er saknað.

Ástvinum hennar og ættingjum votta ég einlæga samúð.

Með okkur lifa góðar minningar.

 

Guð blessi minningu Áslaugar Guðrúnar Harðardóttur.

 

Eiður Svanberg Guðnason.

Morgunblaðið 26. ágúst 2016

___________________________________________

 

 

Í Húsinu á Eyrarbakka fyrir nokkrum árum.

F.v.: Hjónin Áslaug Harðardóttir, látin, og Önfirðingurinn Jón Hákon Magnússon, látinn, og hjónin Þórunn Vilbergsdóttir, látin, og Önfirðingurinn Óskar Magnússon.
Ljósm.: Björn Ingi Bjarnason.


Image result for norðurkot

Norðurkot á Eyrarbakka sem Jón Hákon Magnússon

og Áslaug Harðardóttir áttu og dvöldu þar oft.

Image result for norðurkot


Skráð af Menningar-Staður

24.08.2016 07:07

Ljósa- og tónlistargjörningur á söfnum Árnesinga

 

 

 

Ljósa- og tónlistargjörningur á söfnum Árnesinga

 

 

Mikil ljósadýrð verður á Eyrarbakka, Selfossi og Hveragerði í lok mánaðar.

 

Listahópurinn Tura Ya Moya, undir forystu dönsku listakonunnar Karen Thastum, heimsækir söfn Árnessýslu og sýnir listaverk sem gengur undir grænlenska nafninu Anersaaq eða Andi á íslensku.

Opnunarkvöld Anersaaq – Andanna verður við Húsið á Eyrarbakka fimmtudagskvöldið 25. ágúst 2016 og hefst kl. 21.30 með kynningu og tónlistarviðburði.

Allir eru velkomnir og kvöldopnun verður á safninu.

 

Um er að ræða ljósagjörning utandyra þar sem mynd og hljóð tvinnast saman á magnaðan hátt. Listaverkið er alþjóðlegt og ferðast á milli smárra byggða í Noregi, Íslandi, Grænlandi og Danmörku. Hér á Íslandi heimsækir listahópurinn Byggðasafn Árnesinga á Eyrarbakka 25.–28. ágúst, Héraðsskjalasafn Árnesinga á Selfossi 29. og 30 ágúst og verður á Listasafni Árnesinga í Hveragerði á fram til 9. september. Byggingar safnanna verða baðaðar ljósi að kvöldlagi við tónlistarundirleik.

Vinnusmiðjur verða haldnar samhliða sýningunni og listamenn færa síðan afraksturinn í margmiðlunarbúning. Á þann hátt bætist stöðugt efni við listaverkið sem verður að lokum bræðingur af anda hvers staðar.

 

Fyrsta vinnusmiðjan verður í safninu á Eyrarbakka föstudaginn 26. ágúst frá kl. 16.00–18.00. Aðstaða Tura ya Moya er gámur sem gegnir hlutverki vinnustofu og sýningarklefa. Gámurinn flakkar á milli landa og staða og er núna staðsetur inní garði Hússins á Eyrarbakka. Í för með Karen verða listamennirnir Udo Erdenreich og Mia Lindenhann en fjölmargir aðrir leggja verkefninu lið. Nánari upplýsingar má sjá á vefsíðu verkefnisins www.anersaaq.com og heimasíðum safnanna.

 

Byggðasafnið hefur hlotið styrki fyrir verkefnið frá Safnaráði, Uppbyggingasjóði Suðurlands og JÁVerk auk þess að fá ómetanlegan stuðning frá Eimskip.  Verkefnið á alþjóðavísu er styrkt m.a. af Kulturkontakt Nord og NAPA.


Af www.dfs.is



Skráð af Menningar-Staður

23.08.2016 16:42

Vinir alþýðunnar að Stað á Eyrarbakka 23. ágúst 2016

 

 

 

 

Vinir alþýðunnar að Stað á Eyrarbakka 23. ágúst 2016


 

.

.





Skráð af Menningar-Staður

23.08.2016 16:28

Menningarsamband Hrútavina og Borgundarhólms

 

 
 

Fáni Borgundarhólms að Ránargrund á Eyrarbakka.
 

 

Menningarsamband Hrútavina og Borgundarhólms

 

Margþætt mannlífs- og menningarsamband Hrútavinafélagsins Örvars á Suðurlandi við dönsku eyjuna Borgundarhólm suður af Svíþjóð er mörgum kunn og sér í lagi Hrútavinum enda hefur þetta samband staðið í áratugi.

Í dag, 23. ágúst 2016, var flaggað fána Borgundarhólms ( Bornholm) þessu til staðfestingar á forsetasetri Hrútavinafélagsins að Ránargrund á Eyrarbakka enda margt í gangi í menningarsambandinu.


Skráð af Menningar-Staður

23.08.2016 16:12

Unnur Brá kjörin formaður Vestnorræna ráðsins

 

 

Unnur Brá Konráðsdóttir er þingmaður Suðurkjördæmis.

 

Unnur Brá kjörin formaður Vestnorræna ráðsins

 

Ársfundur Vestnorræna ráðsins kaus Unni Brá Konráðsdóttur, þingmann Sjálfstæðisflokksins og formann Íslandsdeildar Vestnorræna ráðsins, formann ráðsins á ársfundi þess í Qaqortoq á Grænlandi í gær.

 

Vestnorræna ráðið er samstarfsvettvangur Alþingis, Landsþings Grænlands og Lögþings Færeyja. Löndin þrjú skipa sex fulltrúa hvert í Vestnorræna ráðið. Unnur Brá tekur við embættinu af Lars-Emil Johansen, forseta grænlenska Landsþingsins.

Auk Unnar Brár skipa Íslandsdeild ráðsins Páll Jóhann Pálsson, varaformaður, Oddný G. Harðardóttir, Lilja Rafney Magnúsdóttir, Páll Valur Björnsson og Þorsteinn Sæmundsson. Formaður ráðsins er kjörinn til eins árs.

 

Í ræðu sinni til ráðsins lagði Unnur Brá áherslu á mikilvægi þess að Vestnorræna ráðið haldi áfram að vinna að nánara samstarfi vestnorrænu landanna um málefni norðurslóða, þar á meðal á vettvangi Hringborðs norðurslóða og með því að tryggja að umsókn ráðsins um áheyrnaraðild að Norðurskautsráðinu verði samþykkt. Hún fagnaði yfirlýsingu utanríkiráðherra landanna þriggja frá því í gær, 22. ágúst, um að kannaðir verði kostir þess að gera þríhliða fríverslunarsamning milli landanna. Yfirlýsing ráðherranna er í samræmi við ályktun Vestnorræna ráðsins frá árinu 2015 og sagði Unnur Brá það ánægjulegt að málið væri loksins komið í skýran farveg hjá stjórnvöldum landanna þriggja.


Af:  www.sunnlenska.is

 

 

Skráð af Menningar-Staður

23.08.2016 10:20

Sameiginlegir framboðsfundir í Suðurkjördæmi

 

 

Alþingiskosningar munu fara fram laugardaginn 29. október 2016.

 

Sameiginlegir framboðsfundir í Suðurkjördæmi

 

Sjálfstæðismenn í Suðurkjördæmi munu í aðdraganda prófkjörsins, sem fer fram laugardaginn 10. september næstkomandi, standa fyrir sameiginlegum fundum með prófkjörsframbjóðendum.

 

Fundirnir fara fram á eftirfarandi stöðum:

Mánudaginn 29. ágúst kl. 12:00 á Hótel Dyrhólaey í Vík – súpufundur.
Mánudaginn 29. ágúst kl. 20:00 í Nýheimum á Höfn í Hornafirði.
Þriðjudaginn 30. ágúst kl. 20:00 í Safnaðarheiminu Dynskálum 8 á Hellu.
Miðvikudaginn 31. ágúst kl. 20:00 í Ásgarði í Vestmannaeyjum.
Fimmtudaginn 1. september kl. 20:00 í Sjálfstæðishúsinu Óðinsvé í Árborg.
Mánudaginn 5. september kl. 20:00 á Nesvöllum í Reykjanesbæ.

Sjálfstæðisflokkurinn á Facebook


Skráð af Menningar-Staður

23.08.2016 07:40

Hrútadómar - Enn eitt karlavígið fallið

 

 

 

 

Íslandsmeistarinn þuklar og dæmir hrút á mótinu á helginni.

 

Hrútadómar - Enn eitt karlavígið fallið

 

Nýr Íslandsmeistari í hrútadómum var krýndur á Sauðfjársetri á Ströndum á helginni og var það jafnframt fyrsta konan sem vinnur þessa keppni.

Sigurvegari og þar með Íslandsmeistari í hrútadómum er Hadda Borg Björnsdóttir á Þorpum í Tungusveit á Ströndum.

Í öðru sæti varð Jón Jóhannsson úr Saurbæ í Dölum og jafnir í þriðja urðu Haraldur V.A. Jónsson á Hólmavík, Elvar Stefánsson í Bolungarvík og Kristján Albertsson á Melum í Árneshreppi.

 

Í flokki óvanra hrútaþuklara sigruðu mæðgurnar Íris Ingvarsdóttir, Fanney og Lóa, annar varð Halldór Már og í þriðja sæti voru Strandamennirnir og náttúrubarnateymið Ólöf Katrín Reynisdóttir, Marinó Helgi Sigurðsson og Þórey Dögg Ragnarsdóttir.

 

Jafnhliða hrútaþuklinu var dregið í líflambahappadrætti Sauðfjársetursins á hrútaþuklinu í gær. Vinningshafar voru allir á staðnum við útdráttinn að þessu sinni, en um 400 manns mættu á Íslandsmótið í hrútadómum. Elvar Stefánsson frá Bolungarvík vann kynbótahrút frá Mörtu og Magnúsi á Stað í Steingrímsfirði, Maríus Þorri Ólason úr Reykjavík vann kynbótahrút frá Guðbrandi á Smáhömrum, Óskar Torfason Drangsnesi fékk ásetningsgimbur frá Indriða á Skjaldfönn, Skagfirðingurinn Ólafur Sindrason vann forystulamb frá Gróustöðum. Loks urðu þau undur og stórmerki að Lára Hansdóttir á bænum Á á Skarðsströnd vann tvo vinninga, kynbótahrút frá Svanborgu og Karli á Kambi og gimbur frá Nicole og Guðjóni á Heydalsá.

 

Fleiri myndir af þessu skemmtilega móti má skoða hér


Af: www.bb.is


Skráð af Menningar-Staður

21.08.2016 07:05

-Skilið þið kvót­an­um aft­ur til þjóðar­inn­ar-

 

 

„Og skilið þið kvót­an­um aft­ur til þjóðar­inn­ar!“ hrópaði tón­list­armaður­inn Bubbi Mort­hens

þegar hann hafði lokið söng sín­um á Tóna­flóði, tón­leik­um Rás­ar 2, á Arn­ar­hóli í gærkvöld.

 

-Skilið þið kvót­an­um aft­ur til þjóðar­inn­ar-

 

„Og skilið þið kvót­an­um aft­ur til þjóðar­inn­ar!“ hrópaði tón­list­armaður­inn Bubbi Mort­hens þegar hann hafði lokið söng sín­um á Tóna­flóði, tón­leik­um Rás­ar 2, á Arn­ar­hóli í gærkvöld.

Hann hafði þá endað tón­leik­ana með loka­lag­inu Sum­arið er tím­inn.

Bubbi, sem fagnaði sex­tugsaf­mæli sínu fyrr í sum­ar, 6. júní, vakti mikla lukku á tón­leik­un­um í kvöld og tók alla sína helstu slag­ara.

Auk Bubba komu fram á tón­leik­un­um Glowie, rapp­ar­arn­ir Emm­sjé Gauti og fé­lag­ar hans í Úlfur Úlfur. For­ingi Fjalla­bræðra, Hall­dór Gunn­ar Páls­son, stýr­ir loka­atriðinu sem nefn­ist „Ljós­vík­ing­ar að vest­an“ en þar koma fram helstu tón­list­ar­menn Ísa­fjarðarbæj­ar.

Að tón­leik­um lokn­um, um ell­efu­leytið, var síðan blásið til flug­elda­sýn­ing­ar.


Af www.mbl.is



Skráða f Menningar-Staður

19.08.2016 07:04

Íslandsmótið í hrútadómum á sunnudag

 

 

 

Íslandsmótið í hrútadómum á sunnudag

 

Mikið hefur verið um að vera á Sauðfjársetrinu á Ströndum í sumar, margvíslegar uppákomur og viðburðir. Framundan er stærsta samkoma ársins, Íslandsmeistaramótið í hrútadómum, sem verður í Sævangi við Steingrímsfjörð á sunnudag, 21. ágúst, og hefst kl. 14. Jafnan er góð þátttaka í hrútadómunum, bæði í flokki þaulreyndra hrútadómara og líka í flokki óvanra hrútaþuklara. Að venju verður kjötsúpa á boðstólum í hádeginu og kaffihlaðborð allan liðlangan daginn.

 

Síðasta ár sigraði Guðmundur Gunnarsson bóndi á Kjarlaksvöllum í Saurbæ, í öðru sæti var Vilberg Þráinsson á Hríshóli í Reykhólasveit og í þriðja sæti Bjarki Reynisson á Kjarlaksvöllum (sjá nánar hér).

 

Á Sauðfjársetrinu eru nú uppi þrjár sérsýningar, fyrir utan fastasýningu safnsins sem ber yfirskriftina Sauðfé í sögu þjóðar. Í kaffistofunni er sýningin Manstu? sem er greiningarsýning á ljósmyndum Tryggva Samúelssonar sem voru teknar á árabilinu 1950-1970. Á listasviðinu er sýningin Álagablettir og í sérsýningarherbergi verður opnuð ný sýning í byjun september sem ber yfirskriftina Sumardvöl í sveit.

 

Nú er annað árið sem Náttúrubarnaskóli á vegum Sauðfjársetursins er starfræktur. Yfirnáttúrubarnið Dagrún Ósk Jónsdóttir hefur umsjón með verkefninu sem hefur tekist mjög vel.

 

Safnið verður opið alla daga kl. 10-18 út ágúst. Í haust er síðan stefnt að frekari viðburðum. Þá verða meðal annars þjóðtrúarkvöldvaka, handverksnámskeið o.fl. Árleg sviðaveisla verður síðan haldin í október.

 

Nánari upplýsingar í síma 693-3474.

 

(Frá Sauðfjársetrinu á Ströndum).


Skráð af Menningar-Staður

18.08.2016 20:59

Halldóra Bjarnadóttir - Fædd 2. október 1918 - Dáin28. júlí 2016 - Minning

 

 

Halldóra Bjarnadóttir.

 

Halldóra Bjarnadóttir - Fædd 2. október 1918 -

Dáin 28. júlí 2016 - Minning 

 

Halldóra Ólafía Bjarnadóttir fæddist í Öndverðarnesi í Grímsnesi 2. október 1918. Hún andaðist á hjúkrunarheimilinu Sólvöllum á Eyrarbakka 28. júlí 2016.

Foreldrar hennar voru Kristín Halldórsdóttir, f. 25.5. 1890, d. 7.8. 1984, og Bjarni Jónsson, f. 6.11. 1883, d. 22.12. 1926. Systkini Halldóru voru: Ragnar, f. 1909, d. 1977, Þórunn, f. 1913, d. 1949, Jón, f. 1915, d. 1950, Anna, f. 1920, d. 2011, Hjalti, f. 1922, d. 1970, Gunnar, f. 1924, d. 1980, Bjarni Kristinn, f. 1926, d. 1998, Unnur, f. 1927, d. 1982.

Halldóra giftist 31. maí 1941 Jóni Ingibergi Helgasyni frá Eyrarbakka, bifreiðasmið á Selfossi. Börn þeirra eru: 1)Kristín, f. 18.9. 1941, d. 17.4. 1942. 2) Erna Kristín, f. 30.1. 1943, gift Bjarnfinni Hjaltasyni, f. 23.12. 1939. Synir þeirra eru: Hjalti, f. 1963, Jón Ingi, f. 1965 og Birgir, f. 1967. 3) Bjarni, f. 25.2. 1945. Fyrri kona hans var Guðrún Jóhannsdóttir, f. 8.2. 1946. Seinni kona hans er Vilhelmína Þór , f. 6.8. 1946. Synir Bjarna og Guðrúnar eru: Jóhann Snorri, f. 1967, Jón Örvar, f. 1973, Halldór Snær, f. 1976, d. 2015. Halldóra á 15 barnabarnabörn, þar af eitt látið, og eitt barnabarnabarnabarn.

Halldóra ólst upp í Öndverðarnesi í Grímsnesi en bjó lengstan sinn aldur á Selfossi og starfaði í mjólkurbúð Mjólkurbús Flóamanna. Hún var virk í félagsmálum og var einn stofnfélaga Kvenfélags Selfoss og starfaði með því um ára bil.

 

Útför Halldóru var gerð frá Selfosskirkju í dag,  fimmtudaginn 18. ágúst 2016.

 

_______________________________________________________________________________


Minningarorð Bjarnheiðar Kristínar Guðmundsdóttur
 

Í dag er til moldar borin móðursystir mín Halldóra, sem er síðust níu barna Öndverðarneshjónanna Bjarna Jónssonar og Kristínar Halldórsdóttur til að kveðja þessa jarðvist. Dóra var tveimur árum eldri en Anna móðir mín og þær systur voru alla tíð mjög nánar.

Öndverðarnesheimilið var glaðvært myndarheimili mótað af persónu ömmu minnar og annarra heimilismanna og þeim aðstæðum sem þau bjuggu við. Dóra var aðeins átta ára þegar faðir hennar lést af slysförum. Með einstökum kjarki og dugnaði tókst ömmu að halda áfram að búa með börnum sínum sem voru vinnusöm og samhent. Í Öndverðarnesi var alltaf nóg að bíta og brenna og mikill menningarbragur á öllu.

Rúmlega tvítug gekk Dóra að eiga Jón Helgason frá Brennu á Eyrarbakka. Þau reistu heimili sitt, sem nefnt var Túnsberg, að Tryggvagötu 2 á Selfossi. Dóra og Jón voru einstaklega samhent hjón. Hann var bifreiðasmiður og starfaði hjá Kaupfélagi Árnesinga á Selfossi. Hún annaðist heimilið og börnin samkvæmt siðvenju þess tíma, en vann síðan í mörg ár í verslun Mjólkurbús Flóamanna á Selfossi. Hann var hæglátur, afar hlýr í viðmóti og barngóður.

Hún var glaðlyndur dugnaðarforkur og naut þess að segja sögur og fara með bundið mál. Bæði voru þau nægjusöm, síiðjandi og höfðu gaman af því að búa til hluti og rækta garðinn sinn.

Þau voru líka útivistarfólk og ferðuðust mikið, einkum innanlands.

Fyrsta barn sitt, Kristínu, misstu þau af völdum alvarlegrar sýkingar þegar hún var aðeins sjö mánaða gömul. Það olli sári sem risti djúpt. Síðar fæddust Erna Kristín og Bjarni og færðu þau foreldrum sínum hamingju og fjölda myndarlegra afkomenda. Jón andaðist langt um aldur fram árið 1980 og var hans sárt saknað af öllu sínu fólki.

Minningar mínar um Dóru frænku vekja góðar tilfinningar. Túnsberg var okkur ættingjum hennar ætíð opið og þar var gott að koma bæði fyrir börn og fullorðna. Húsfreyjan reiddi fram kræsingar og sagði frá en bóndinn bauð börnum afsíðis að skoða eitthvað skemmtilegt sem hægt væri að nýta til leikja. Úti í náttúrunni kunni Dóra skil á örnefnum og heiti jurta.

Hún var sporlétt og flaug á fjöll eins og ung hind. Ég man hvað ég þrítug var móð við að reyna að hafa við henni í göngu á Búrfell. Samt var hún þá helmingi eldri en ég. Í áratug var ég búsett í Hreppunum. Þá var gott að eiga frænku á verslunarstaðnum Selfossi, koma við í mjólkurbúðinni eða heima hjá henni. Drekka kaffi og eiga saman gæðastund, skoða nýjustu vatnslitamyndirnar hennar eða jafnvel spila og gista.

Dóra náði hæstum aldri allra í Öndverðarnesfjölskyldunni. Síðustu árin dvaldi hún á dvalarheimilinu Sólvöllum á Eyrarbakka þar sem hún undi glöð þar til krafta þraut.

 

Ég og fjölskylda mín kveðjum Dóru frænku með þakklæti og óskum öllu hennar fólki blessunar um ókomin ár.

 

 

Bjarnheiður Kristín Guðmundsdóttir.

 

Morgunblaðið fimmtudagurinn 18. ágúst 2016


Skráð af Menningar-Staður