Menningar-Staður
Félagsheimilið Staður á Eyrarbakka

Færslur: 2016 Janúar

19.01.2016 07:06

Meningarerfðir

 

Hjallastefnan hin nýja er dæmi um menningarerfðir.

 

Menningarerfðir 

 

21. – 23. janúar 2016 verða haldnir fjórir umræðu- og kynningarfundir á Suðurlandi um óáþreyfanlegan menningararf (menningarerfðir) og sáttmála UNESCO um verndun hans. Fundirnir á Hvolsvelli og á Klaustri verða í samstarfi við Brynju Davísdóttur framkvæmdarstjóra Kötlu Jarðvangs sem fer yfir stöðu jarðvangsins eftir úttekt matsmanna og innleiðingu í UNESCO Global Geoparks 2015.

Menningarerfðir eru til dæmis þekking og kunnátta sem tengist reykingu, söltun og súrsun matvæla, hestamennsku, sauðfjárbúskap, vefnaði, kveðskap, þjóðdansi, þjóðbúningum, útskurði og eggjatöku, að kæsa hákarl, smíða trébát og vinna með ull.

Fundirnir eru í tengslum við verkefni á vegum menntamálaráðuneytisins en markmiðið með því er að

·       Koma af stað umræðu um menningarerfðir

·       Fá hugmyndir um menningarerfðir sem fólkinu í landinu finnst mikilvægt að vernda

·       Skrá félög/hópa/einstaklinga sem starfa á sviði menningarerfða

·       Kynna sáttmála UNESCO um verndun menningarerfða

Fundatímar:

·       Selfoss – í Fjölheimum, fimmtudaginn 21. janúar kl. 18:00

·       Hvolsvöllur – Hótel Hvolsvöllur, föstudaginn 22. janúar kl. 11:30

·       Kirkjubæjarklaustur –  staðsetning óákveðin, föstudaginn 22. janúar kl. 20:00

·       Höfn í Hornafirði – staðsetning óákveðin, laugardaginn 23. janúar kl. 14:00

Af www.sass.is

.


.



Skráð af Menningar-Staður

18.01.2016 21:42

Halldór Valur tekur við Litla-Hrauni og Sogni

 

 
Halldór Valur Pálsson. Ljósm.: Björn Ingi Bjarnason.

 

Halldór Valur tekur við Litla-Hrauni og Sogni

 

Eyrbekkingurinn Halldór Valur Pálsson hefur verið skipaður forstöðumaður Fangelsisins Litla-Hrauni og Fangelsisins Sogni. Hann tekur við starfinu þann 1. febrúar næstkomandi.

Halldór Valur er 35 ára stjórnmálafræðingur og hefur starfað hjá Fangelsismálastofnun frá árinu 2004, síðast sem öryggisstjóri. Hann hefur komið að mörgum verkefnum hjá stofnuninni á þessum tíma og hefur yfirgripsmikla þekkingu á fangelsismálum og verkefnum stofnunarinnar.

Halldór Valur hefur borið ábyrgð á rekstri samfélagsþjónustu, umsjón og innleiðingu rafræns eftirlits, fjölmörgum verkefnum á sviði öryggismála innan fangelsanna, umsjón með dags- og skammtímaleyfum fanga og viðbragðsáætlanagerð. Þá hefur hann sinnt kennslu í Fangavarðaskólanum og tekið þátt í norrænu samstarfi á sviði fangelsismála.

Halldór Valur hefur setið í vinnuhópum vegna þarfagreiningar og hönnunar nýs fangelsis á Hólmsheiði, verið ráðgjafi dómnefnda í samkeppni um hönnun þess, verið fulltrúi stofnunarinnar í verkefninu á byggingartíma og komið að fleiri uppbyggingarverkefnum í fangelsiskerfinu á undanförnum árum.

Þetta kemur fram í tilkynningu frá Fangelsismálastofnun.

Af www.sunnlenska.is




Litla-Hraun. Ljósm.: Björn Ingi Bjarnason.


Skráð af Menningar-Staður

18.01.2016 06:53

Þægileg tilvera í Þorlákshöfn

 

Mynd úr gagnasafni Morgunblaðsins

Hansína Ásta Björgvinsdóttir.

Hansína með yngsta barnabarnið.

Í nafni litlu telpunnar, Ingibjörgu Önnu Björgvinsdóttur,

sameinast öll nöfn barna Hansínu og Ingva: Ingibjörg, Anna og Björgvin.

 

Þægileg tilvera í Þorlákshöfn
Hansína Björgvinsdóttir er sjötug í dag

 

Hansína Ásta Björgvinsdóttir var leiðinni til Tenerife á Kanaríeyjum í tilefni af sjötugsafmælinu sínu þegar blaðamaður náði tali af henni. „Við erum að fara þangað í fyrsta sinn, en höfum heyrt afskaplega vel látið af þessum stað. Það er tilvalið að skreppa þangað meðan allur þessi snjór er hér á Íslandi.“

Hansína flutti til Þorlákshafnar fyrir átta árum. „Við hjónin vorum þá bæði hætt að vinna og barnabörnin öll búsett í Þorlákshöfn. Síðan hafa sjö bæst við í Kópavogi. Nú er maður að sinna barnabörnunum og félagslífinu og við förum í ferðalög. Við erum ekki bundin við neitt sérstakt nema helst pulsuhundana okkar, Patta og Tanna, og þetta er afskaplega þægileg tilvera. Við spilum félagsvist fyrir eldri borgara hérna í Þorlákshöfn og hér er fín íþróttaaðstaða og góð sundlaug og fínar gönguleiðir, engar brekkur.“

Föðurætt Hansínu er af Suðurlandi og móðurættin af Austurlandi. Hún er fædd á Eyrarbakka og ólst upp bæði á Selfossi og á Seyðisfirði. Hún bjó lengst af í Kópavogi og kenndi í Kópavogsskóla, var bæjarfulltrúi í tvö kjörtímabil og bæjarstjóri og formaður bæarráðs um tíma. „Ég hef látið félagsmálin að mestu vera síðan ég flutti í Þorlákshöfn.“

Eiginmaður Hansínu er Ingvi Þór Þorkelsson, landfræðingur og sagnfræðingur, en hann kenndi lengst af við Fjölbrautaskólann í Garðabæ og starfaði þar þangað til hann fór á eftirlaun.

Morgunblaðið mánudagurinn 18. janúar 2016.


Skráð af Menningar-Staður

 

17.01.2016 20:25

Afmælistónleikar Jóns Kr. á mynddiski

 

 

Afmælistónleikar Jóns Kr. á mynddiski

 

Jón Kr. Ólafsson, söngvari á Bíldudal, hélt síðastliðið sumar tónleika í sal FÍH í Reykjavík og sagði þá vera kveðjutónleika sína, haldna í tilefni af 75 ára afmæli hans þann 22. ágúst 2015. Tónleikarnir voru kvikmyndaðir af Jens Þorsteinssyni og hefur Jón Kr. nú gefið þá út á mynddiski.

„Að þessum tónleikum komu margir góðir tónlistarmenn, hljóð færaleikarar, söngvarar, tæknimenn og allir sem gerðu sitt besta til að gera þetta að listviðburði og má ekki gleyma tónleikagestum sem voru dásamlegir og var húsfyllir, en sveitungi Jóns frá Bíldudal, Óli Þ. Guðbjartsson setti tónleikahátíðina,“ segir Jón Kr. í tilkynningu.

Hann bætir við að hafi lesendur áhuga á að eignast diskinn sé best að hafa samband við hann, í símum 456-2186 og 847-2542.

Jón Kr. Ólafsson á Bíldudal er fæddur 22. ágúst 1940 og hefur búið og starfað á Bíldudal frá því hann kom í þennan heim. Tónlistargyðjan hefur verið hans förunautur alla tíð og hann hefur sungið við kirkjuathafnir, í veislum og öðrum mannfagnaði frá unglingsárum.

Landsfrægur varð Jón Kr.  sem söngvari í danshljómsveitinni Facon frá Bildudal, sem hann stofnaði ásamt þremur öðrum árið 1962 og lagið þeirra „Ég er frjáls“ er ódauðlegt. 

Jón Kr. Ólafsson söng einnig í hljómsveit Jóns Ástvaldar Hall Jónssonar og hefur komið fram og sungið á óteljandi skemmtunum á Bíldudal, í Reykjavík og víðar um landið og einnig erlendis.

Jón Kr. stofnaði tónlistarsafnið Melódíur minninganna á Bíldudal árið 2000 og hefur safnað þar fjölmörgum dýrmætum minjum úr dægurlagasögu íslensku þjóðarinnar.

Ævisaga Jóns Kr.Ólafssonar, skráð af Bílddælingnum Hafliða Magnússyni sem síðasta rúman áratuginn bjó á Selfossi,  kom út árið 2008 hjá Vestfirska forlaginu.



Jón Kr. Ólafsson verður sérstakur gestur á Sólarkaffi Vestfirðinga og Sunnlendinga sem haldið verður í Félagsheimilunu Stað á Eyrarbakka sunnudaginn 14. febrúar n.k. 

Hér má sjá myndir frá Sólarkaffi Vestfirðinga og Sunnlendinga að Stað þann 15. febrúar 2015.


Smella á þessa slóð
: http://menningarstadur.123.is/photoalbums/269748/

Nokkrar myndir hér:

 

.

.

.

.

.

.

.

.

Skráð af Menningar-Staður

17.01.2016 09:12

Eldriborgarstund á Stað 15. janúar 2016

 

Hörður Stefánsson.

 

Eldriborgarastund að Stað 15. janúar 2016 

 

Félagar í Eldriborgarafélagi Eyrarbakka koma til íþróttaæfinga í Félagsheimilinu Stað á Eyrarbakka í hverri viku að vetrinum til.

Föstudaginn 15. janúar 2016 voru 13 eldriborgarar að Stað og léku boccia eins og þeir hafa gert um árabil af miklum dugnaði. Það er Hörður Stefánsson sem stjórnar þessum æfingum.

Menningar-Staður færði til myndar og er komið myndaalnúm hér á Menningar-Stað.

 

Smella á þessa slóð: http://menningarstadur.123.is/photoalbums/276748/


Nokkrar myndir hér:

 

.

.

.

.

.

.




Skráð af Menningar-Staður. 

16.01.2016 16:21

Merkir Íslendingar - Finnur Jónsson

 

 

 

Merkir Íslendingar - Finnur Jónsson

 

Finnur fæddist 16. janúar 1704. Foreldrar hans voru Jón Halldórsson, prófastur og sagnaritari í Hítardal, og k.h., Sigríður Björnsdóttir.

Eiginkona Finns var Guðríður, dóttir Gísla í Mávahlíð, sonar Jóns Vigfússonar biskups og systir Magnúsar Gíslasonar amtmanns.

Börn Finns og Guðríðar voru Margrét, kona Jóns Teitssonar biskups; Halldór, prestur í Hítardal; Jón, prestur í Hruna; Hannes, biskup í Skálholti, einn fjölhæfasti lærdómsmaður og biskup hér á landi, í hópi virtustu handrita- og fornfræðinga Norðurlanda, afburðaguðfræðingur, lögvís og afburðamálamaður; Steindór, sýslumaður að Oddgeirshólum, og Ragnheiður, kona Magnúsar Ólafssonar lögmanns.

Finnur varð stúdent frá Skálholtsskóla 1723 og lauk guðfræðiprófi frá Kaupmannahafnarháskóla, 1728, var vígður prestur í Reykholti í Borgarfirði 1732 og varð fljótlega prófastur í Borgarfjarðarsýslu. Finnur sótti ekki fast að verða biskup. Hann neitaði að sækja um Hólabiskupsumdæmi 1740, var stiftprófastur í Skálholtsbiskupsdæmi 1743-53, settur officialis 1743 og gegndi biskupsembætti í Skálholti til 1747, var kvaddur til biskups að Hólum 1753 en neitaði, var síðan kvaddur til biskups í Skálholti ári síðar og neitaði aftur en varð þó næstsíðasti biskup sem sat Skálholtsstól 1754-85. Hann fékk síðan Hannes, son sinn, til aðstoðar 1777 og lét af embætti 1785.

Finnur var talinn með hirðusömustu embættismönnum, gætti vel meðalhófs í stjórnun, tók vægt á smámálum en rækilega í taumana í stærri brotum og þótti röggsamur stjórnandi.

Finnur var mikill fræðimaður eins og faðir hans og hlaut doktorsnafn-bót í guðfræði 1774, fyrstur Íslendinga. Hann skrifaði m.a. Historia Ecclesiastica Islandiæ, rit um kirkjusögu Íslands á latínu sem kom út á prenti í Kaupmannahöfn 1772-78 og lét eftir sig fjölda annarra rita, einkum um guðfræði og kirkjusögu.

Finnur Jónsson  lést 23. júlí 1789


Morgunblaðið laugardagurinn 16. janúar 2016 - Merkir Íslendingar

 

Skálholt árið 1750.


Skráð af Menningar-Staður

15.01.2016 19:53

Hrútavinir heiðruðu minningu Guðmundar Inga Kristjánssonar

 

F.v.: Kristján Runólfsson og Björn Ingi Bjarnason.

 

Hrútavinir heiðruðu minningu Guðmundar Inga Kristjánssonar

 

Hrútavinafélagið Örvar á Suðurlandi heiðraði minningu Guðmundar Inga Kristjánssonar, skálds á Kirkjubóli í Bjarnardal, Önundarfirði, á afmælisdegi hans í dag 15. janúar 2016.

Guðmundur Ingi fæddist á Kirkjubóli í Bjarnardal í Önundarfirði 15. janúar 1907. Guðmundur Ingi lést 30. ágúst 2002.

 

Ljóðabækur Guðmundar Inga eru:
 

Sólstafir 1938,

Sólbráð 1945,

Sóldögg 1958,

Sólborgir 1963,

Sólfar 1981

og síðan heildaútgáfa Sóldagar 1993

Björn Ingi Bjarnason á Eyrarbakka, forseti Hrútavinafélagsins  og Kristján Runólfsson, skáld í Hveragerði, stóðu fyrir afmælissamkomu í Bókakaffinu við Austurveg á Selfossi kl. 14 – 15:30 í dag, 15. janúar 2016.

 

Þar var gestum boðið í spjall um skáldið og ljóð hans og hið menningarlega samband Vestfjarða og Suðurlands nú um stundir í víðu samhengi.

Meðal gesta sem þátt tóku voru:

Guðmundur Stefánsson í Hraungerði,
Ólafur Kristjánsson í Geirakoti en hann er tengdapabbi Önundarefjarðar (faðir Auðbjargar Ólafsdóttur en hennar maður er Óli Örn Eiríksson frá Flateyri),

síðan bræðurnir frá Ranakoti á Stokkseyri:

Sigurður Bjarnason og

Hinrik Bjarnason.

Afmælissamkoman var mjög vel heppnuð og Kristján Runólfsson orti:


 

Nokkrar myndir hér frá Bókakaffinu í dag:

.

F.v.: Guðmundur Stefánsson og Kristján Runólfsson.

 

F.v.: Ólafur Kristjánsson og Kristján Runólfsson.

.

Fv.: Ólafur Kristjánsson, Kristján Runólfsson og Björn Ingi Bjarnason. 


F.v.: Kristján Runólfsson, Sigurður Bjarnason og Hinrik Bjarnason.

.

F.v.: Sigurður Bjarnason og Hinrik Bjarnason.


Skráð af Menningar-Staður.

 

15.01.2016 11:54

Merkir Íslendingar - Guðmundur Ingi Kristjánsson

 

 

Guðmundur Ingi Kristjánsson.

 

Merkir Íslendingar - Guðmundur Ingi Kristjánsson

 

Guðmundur Ingi fæddist á Kirkjubóli í Bjarnardal í Önundarfirði 15. janúar 1907. Foreldrar hans voru Kristján Guðjón Guðmundsson, bóndi á Kirkjubóli, og k.h., Bessabe Halldórsdóttir.

Systir Kristjáns var Guðrún, amma Gests Ólafssonar skipulagsfræðings og langamma Þórunnar Valdimarsdóttur, rithöfundar og sagnfræðings. Kristján var sonur Guðmundar Pálssonar, bónda á Kirkjubóli, bróður Hákonar, langafa Sigurjóns Péturssonar heitins, sem var forseti borgarstjórnar.

Systir Bessabe var Friðrikka, amma Einars Odds Kristjánssonar alþm.

Systkini Guðmundar Inga voru Ólafur, skólastjóri í Hafnarfirði, faðir Kristjáns Bersa skólameistara og afi Ólafs Harðarsonar stjórnmálafræðings, Jóhanna á Kirkjubóli, og Halldór, rithöfundur og alþm.
 

Eftirlifandi eiginkona Guðmundar Inga er Þuríður Gísladóttir frá Mýrum í Dýrafirði og stjúpsonur hans Sigurleifur Ágústsson.


Guðmundur Ingi ólst upp á Kirkjubóli, var þar heimilisfastur alla tíð og bóndi þar frá 1944. Hann stundaði nám við eldri deild Alþýðuskólans á Laugum og eldri deild Samvinnuskólans í Reykjavík. Guðmundur Ingi var kennari í Mosvallahreppi af og til um langt árabil og auk þess skólastjóri heimavistarskólans í Holti 1955-74.

 

Guðmundur Ingi sat í stjórn ungmennafélagsins Bifröst, Héraðssambands ungmennafélaga Vestfjarða, stjórn Kaupfélags Önfirðinga, Búnaðarfélags Mosvallahrepps, var formaður Búnaðarsambands Vestfjarða, oddviti Mosvallahrepps um langt árabil og sýslunefndarmaður, sat í skólanefnd hreppsins og Héraðsskólans á Núpi og var þrisvar í framboði til Alþingis fyrir Framsóknarflokkinn.

Ljóðabækur Guðmundar Inga eru Sólstafir 1938, Sólbráð 1945, Sóldögg 1958, Sólborgir 1963 og Sólfar 1981. Hann var sæmdur riddarakrossi 1984 og var heiðursborgari Mosvallahrepps og Ísafjarðarbæjar.

 

Guðmundur Ingi lést 30. ágúst 2002.

 

Morgunblaðið - Merkir Íslendingar

 

 


Þuríður Gísladóttir og Guðmundur Ingi Kristjánsson.


Skráð af Menningar-Staður