Menningar-Staður
Félagsheimilið Staður á Eyrarbakka

Færslur: 2016 Desember

31.12.2016 13:41

Jón Daði er Sunnlendingur ársins 2016

 

 

Jón Daði eftir sigurinn gegn Englendingum á Evrópumótinu.

Ljósmynd: Hafliði Breiðfjörð - fotbolti.net

 

Jón Daði er Sunnlendingur ársins 2016

 

Lesendur sunnlenska.is kusu knattspyrnumanninn Jón Daða Böðvarsson frá Selfossi Sunnlending ársins 2016.

Jón Daði var lykilmaður í landsliði Íslands í knattspyrnu sem komst í átta liða úrslit á Evrópumeistaramótinu í Frakklandi í sumar. Jón Daði var byrjunarliðsmaður í öllum leikjum Íslands og skoraði meðal annars í leiknum eftirminnilega gegn Austurríki þar sem liðið tryggði sér sæti í sextán liða úrslitum.

Árið var viðburðaríkt hjá Jóni Daða en hann flutti til Þýskalands í ársbyrjun og lék með Kaiserslautern í 2. Bundesligunni þangað til hann var seldur til Úlfanna í Championship-deildinni á Englandi í ágúst. Þar sló hann strax í gegn með því að skora mark í sínum fyrsta leik en Jón Daði er í uppáhaldi hjá mörgum stuðningsmönnum liðsins.

Þetta er sjöunda árið í röð sem lesendur sunnlenska.is kjósa Sunnlending ársins og þátttakan hefur aldrei verið meiri. Alls fékk 31 Sunnlendingur atkvæði í kjörinu að þessu sinni.

Annað árið í röð varð Þórir Hergeirsson, þjálfari norska kvennalandsliðsins í handbolta, í 2. sæti í kjörinu en hann hefur verið í topp þremur í kosningunni í fjögur skipti á síðustu fimm árum. Þriðja varð svo Ágústa Arna Sigurdórsdóttir, sem lamaðist í alvarlegu slysi á Selfossi í sumar.

Af www.sunnlenska.is



Skráð af Menningar-Staður

31.12.2016 13:29

Gleðilegt nýtt ár

 


Hér eru nokkrir Vestfirðingar úr áhöfn Vestfirska forlagsins

á Bókamessu í Ráðhúsi Reykjavíkur í nóvember 2012. Ljósm.: BIB

 

Gleðilegt nýtt ár

Vestfirska forlagið óskar Vestfirðingum heima og heiman sem og öllum vinum og velunnurum farsældar á nýja árinu með þökk fyrir viðskiptin á árinu sem liðið er.
Á árinu 2016 komu út 6 bækur hjá Vestfirska forlaginu. Þökkum öllum í þeim stóra hópi fólks sem skipa metnaðarfulla áhöfn forlagsins og öllum hinum fjölmörgu sem komu að mannlífs- og menningarlegri starfseminni forlagsins með einum eða öðrum hætti á árinu 2016 sem og fyrri árum.

Vestfirska forlagið að Brekku á Þingeyri.


Skráð af Menningar-Staður.

31.12.2016 11:08

Merkir Íslendingar - Gils Guðmundsson

 

 

Gils Guðmundsson (1914 - 2005)

 

Merkir Íslendingar - Gils Guðmundsson

 

Gils Guðmundsson fæddist í Hjarðardal innri í Önundarfirði 31. desember 1914, sonur Guðmundar Gilssonar, útvegsb. í Hjarðardal, og k.h., Sigríðar Hagalínsdóttur.

 

Foreldrar Guðmundar: Gils Bjarnason á Mosvöllum og Guðmundína Jónsdóttir, systir Guðnýjar, ömmu Jónu, ömmu Ólafs Þ. Þórðarsonar og Kjartans Ólafssonar alþm. Foreldrar Sigríðar: Hagalín Þorkelsson og Sólveig Pálsdóttir.

Kona Gils var Guðný Jóhannesdóttir en dóttir þeirra er Erna Sigríður Gilsdóttir, kennari í Danmörku. Stjúpsonur Gils er Úlfur Árnason, doktor í Lundi.
 

Gils lauk kennaraprófi frá KÍ 1938, var sjómaður 1934-40, kennari við Íþróttaskólann í Haukadal og við unglingaskóla í Garði og Sandgerði, rithöfundur frá 1942, blaðamaður og ritstjóri 1943-56 og framkvæmdastjóri Menntamálaráðs og Bókaútgáfu Menningarsjóðs 1956-75.
 

Gils var alþingismaður Reykjavíkur fyrir Þjóðvarnarflokk Íslands 1953-56 og þingmaður Reykjaneskjördæmis fyrir Alþýðubandalagið 1963-79. Hann var formaður Þjóðvarnarfélags Reykjavíkur 1953-54 og varaformaður Þjóðvarnarflokksins 1960-62, formaður Rithöfundasambands Íslands 1957-58 og formaður félagsins Ísland – Færeyjar.
 

Gils sat í Rannsóknaráði ríkisins, var skipaður í endurskoðunarnefnd laga um friðun Þingvalla og náttúruvernd, var formaður fiskveiðilaganefndar frá 1971, sat í Norðurlandaráði 1971-74, í verðlaunanefnd Gjafar Jóns Sigurðssonar og í Þingvallanefnd. Hann sat á Allsherjarþingi SÞ 1970 og á hafréttarráðstefnu SÞ 1974-75.
 

Gils samdi fjölda sagnfræðilegra rita og skrifaði sögu ýmissa stéttarfélaga. Má þar helst nefna Skútuöldina, Togaraöldina og Vestfirska sagnaþætti. Þá ritstýrði hann tímaritum og bókum, s.s. bókunum Öldin sem leið 1800-1900 og Öldin okkar, frá 1900-1980.
 

Gils lést 29. apríl 2005.

 

Morgunblaðið 31. desember 2016.

 

 

Séð yfir Önundarfjörð að Holtsodda og Hjarðardal. Ljósm.: BIB

 


Skráð af Menningar-Staður

 

 

31.12.2016 09:54

Áramótabrennur á Suðurlandi

 

 

 

Áramótabrennur á Suðurlandi

 

Fjöldi áramótabrenna verða á Suðurlandi á gamlársdag, eða gamlárskvöld. Sunnlenska.is hefur frétt af að minnsta kosti fjórtán brennum.

 

Í Vík verður brenna á eystri bakka við Víkurá kl. 21:00 og á sama tíma verður verður brenna við gámasvæðið á Stjórnarsandi í Skaftárhreppi.

 

Í Rangárþingi ytra verður brenna á Gaddstaðaflötum vði Hellu kl. 17:00 og á sama tíma verður brenna í Þykkvabænum.

 

Á Flúðum verður brenna við tjaldsvæðið kl. 20:30 og á sama tíma verður brenna við Brautarhól í Reykholti kl. 20:30 og við Höfðaveg í Laugarási. Þá verður brenna við við Hrísholt á Laugarvatni kl. 21:30, 

 

Við Borg í Grímsnesi verður brenna kl. 20:30.

 

Í Árborg verður brenna á gámasvæðinu Víkurheiði kl. 16:30

og kl. 20:00 við Hafnarbrú á Eyrarbakka og við Arnhólma á Stokkseyri.

 

Í Ölfusi verður brenna við enda Óseyrarbrautar kl. 17:00 og í Hveragerði verður brenna við Þverbrekku kl. 20:30.



Af www.sunnlenska.is



Skráð af Menningar-Staður

30.12.2016 12:57

2 milljónir flettinga á Menningar-Stað

 

.

 

 

2 milljónir flettinga á Menningar-Stað

 

Nú á næstu klukkutímum mun það gerast að  -Vefurinn Menningar-Staður-  fari yfir 2.000.000 flettingar

(tvær milljónir flettinga).

 

Menningar-Staður þakkar gestum þessa gríðarlegu tryggð og flettingar og sýnir enn frekar að vefurinn er einn af kjölfestu netmiðlum á Suðurlandi.

 




Skráð af Menningar-Staður

30.12.2016 09:33

Kosningu lokið á Sunnlendingi ársins 2016

 

Siggeir Ingólfsson - Sunnlendingur ársins 2013

 

 

Kosningu lokið á Sunnlendingi ársins 2016
 

Kosningu er lokið á Sunnlendingi ársins 2016. Árið er senn á enda og á síðustu mánuðum hafa margir Sunnlendingar unnið stór og smá afrek sem vakið hafa athygli og aðdáun.

Í fyrra var það Björgvin Karl Guðmundsson, crossfit- og lyftingamaður frá Stokkseyri, sem sigraði í kosningunni en hann sló í gegn á heimsleikunum í crossfit sumarið 2015 og var þá þriðji hraustasti maður í heimi.

Kosningunni lauk kl. 12 á hádegi í gær, fimmtudaginn 29. desember en niðurstaða kosningarinnar verður tilkynnt í áramótaþætti Suðurland FM á gamlársdag.

KOSNINGUNNI ER LOKIÐ

 

Fyrri Sunnlendingar ársins:


2015 Björgvin Karl Guðmundsson, crossfit-kappi frá Stokkseyri Valinn af lesendum sunnlenska.is
2014 Dagný Brynjarsdóttir, knattspyrnukona á Hellu Valin af lesendum sunnlenska.is

2013 Siggeir Ingólfsson, Staðarhaldari á Eyrarbakka Valinn af lesendum Sunnlenska fréttablaðsins og sunnlenska.is
2012 Jóhanna Bríet Helgadóttir, móðir á Selfossi Valin af lesendum Sunnlenska fréttablaðsins og sunnlenska.is
2011 Olga Bjarnadóttir, fimleikaþjálfari og kennari á Selfossi Valin af lesendum Sunnlenska fréttablaðsins og sunnlenska.is
2010 Kjartan Þorkelsson, sýslumaður á Hvolsvelli Valinn af lesendum Sunnlenska fréttablaðsins og sunnlenska.is
2009 Hrönn Arnardóttir og Stefán Pétursson, sjúkraflutningamenn Valin af hlustendum Suðurland FM
2008 Jón Eiríksson, bóndi og fræðimaður í Vorsabæ Valinn af lesendum Sunnlenska fréttablaðsins
2007 Ekki valinn
2006 Ekki valinn
2005 Gunnar Egilsson, Suðurpólfari á Selfossi 
Valinn af lesendum Sunnlenska fréttablaðsins og sudurland.is


Af www,sunnlenska.is



Skráð af Menningar-Staður

30.12.2016 08:33

Flugeldasala á Eyrarbakka


 

 


Flugeldasala á Eyrarbakka
 


Þá er komið að þessu árlega Flugeldasölunni hjá okkur og verður hún opin:

28. des frá 12:00 til 22:00 . 
29. des frá 12:00 til 22:00 
30. des frá 12:00 til 22:00
31. des frá 10:00 til 16:00.


Erum við staðsett á Búðarstíg 21 vestast í þorpinu við bryggjuna.

 

 

 


Skráð af Menningar-Staður

 

30.12.2016 08:15

Best skreyttu húsin í Árborg 2016 verðlaunuð

 

 

Verðlaunahafarnir tóku á móti verðlaununum í Bókasafni Árborgar á Selfossi fyrir jól.

Ljósmynd/Árborg

 

Best skreyttu húsin í Árborg 2016 verðlaunuð

 

Fimmtudaginn 22. desember voru afhent verðlaun fyrir þrjú best skreyttu húsin í Sveitarfélaginu Árborg og best skreytta fyrirtækið.

Að þessu sinni voru mörg íbúðarhús sem komu til greina en á endanum voru það Stjörnusteinar 18 á Stokkseyri, Lóurimi 1 á Selfossi og Engjavegur 6 á Selfossi sem voru valin bestu skreyttu íbúðarhúsin 2016.

 

Húsráðendur tóku við veglegum verðlaunum en þeir eru;
 

á Stjörnusteinum 18 á Stokkseyri - Jóhann H. Jónsson og Evlalía Sigr. Kristjánsdóttir,

í Lóurima 1 á Selfoss -Ingvar Sigurðsson og Birna Kristinsdóttir 

og á Engjavegi 6 eru það Íris Anna Steinarrsdóttir og Ólafur Guðmundsson.

 

Nokkur fyrirtæki voru tilnefnd og stóð Lindin tískuvöruverslun á Selfossi uppi sem sigurvegari annað árið í röð en skreytingar fyrirtækisins vekja verðskuldaða athygli á Eyraveginum. Bryndís Brynjólfsdóttir og Kristín Hafsteinsdóttir tóku við verðlaunum Lindarinnar.

Sveitarfélagið Árborg heldur skreytingasamkeppnina árlega í samstarfi við nokkur fyrirtæki í sveitarfélaginu sem gefa bæði vinnu sína og verðlaun. Fyrirtækin eru Dagskráin, Sunnlenska fréttablaðið, HS Veitur HF, Guðmundur Tyrfingsson ehf., Sjafnarblóm, Krónan, Byko, Húsasmiðjan, Blómaval, Rúmfatalagerinn, Motivo, Tiger og Selfossbíó.

 


Lóurimi 1 á Selfossi.

 

Engjavegur 6 á Selfossi.

 

Stjörnusteinar 18 á Stokkseyri.

 

Lindin við Eyraveg  á Selfossi.


Af www.sunnlenska.is


Skráð af Menningar-Staður

30.12.2016 07:53

Kumbaravogi lokað í mars 2017

 

 

 

Kumbaravogi lokað í mars 2017

 

Heilbrigðisráðherra hefur ákveðið, í samræmi við tillögu landlæknis, að loka hjúkrunarheimilinu Kumbaravogi á Stokkseyri frá og með 31. mars næstkomandi.

Vinna er hafin við að finna íbúum heimilisins viðeigandi úrræði en samkvæmt áætlun.

Embætti landlæknis hefur ítrekaðar gert athugasemdir við forstöðumann Kumbaravogs um aðbúnað íbúa á heimilinu og krafist úrbóta m.a. vegna slælegs ástands húsnæðisins og ófullnægjandi mönnunar. Ekki hefur verið brugðist við ábendingumlandlæknis með viðunandi hætti þegar eftir því hefur verið gengið.

Embætti landlæknis telur að rekstur hjúkrunarheimilisins Kumbaravogs uppfylli ekki lágmarkskröfur um mönnun, húsnæði, aðstöðu, tæki og búnað til reksturs heilbrigðisþjónustu. Telur embættið fullreynt að knýja fram úrbætur og að öryggi sjúklinga sé stefnt í hættu. 

Velferðarráðuneytið gerði forstöðumanni Kumbaravogs grein fyrir áformum um lokun hjúkrunarheimilisins með bréfi 12. desember síðastliðinn og gaf kost á andmælum. Frá sama tíma ákvað ráðuneytið að stöðva innritun nýrra íbúa á hjúkrunarheimilið. Af hálfu rekstraraðila Kumbaravogs hafa ekki komið fram neinar upplýsingar sem benda til þess að vænta megi nauðsynlegra úrbóta á heimilinu.

 

Áhersla á hagsmuni og öryggi íbúanna


Íbúar á Kumbaravogi eru 29. Í samráði við íbúana og aðstandendur þeirra verður nú unnið að því að finna þeim viðunandi búsetuúrræði með þjónustu í samræmi við þarfir hvers og eins. Reynt verður að mæta óskum íbúanna í því sambandi eins og kostur er. Áætlað er að síðustu íbúar Kumbaravogs flytji þaðan eigi síðar en 31. mars næstkomandi. Til að gæta hagsmuna þeirra meðan fyrirhugaðar breytingar ganga yfir verður starfsemi hjúkrunarheimilisins tryggð allt til rekstrarloka. Ráðuneytið hefur því tekið ákvörðun um að daggjöld verða greidd fyrir 28 hjúkrunarrými og eitt dvalarrými út mars næstkomandi óháð nýtingu rýmanna.

Í tilkynningu frá Velferðarráðuneytinu kemur fram að ráðuneytið væntir góðs samstarfs við stjórnendur Kumbaravogs við lokun heimilisins þannig að undirbúningur og framkvæmd þessara breytinga taki í öllum atriðum mið af velferð og öryggi íbúanna og valdi hvorki þeim né aðstandendum óþægindum eða raski á högum þeirra umfram það sem óhjákvæmilegt er við aðstæður sem þessar.

 

Nýtt hjúkrunarheimili byggt í Árborg


Í byrjun september var undirritaður samningur um byggingu 50 rýma hjúkrunarheimilis sem rísa mun á lóð Heilbrigðisstofnunar Suðurlands á Selfossi. Samkvæmt áætlun velferðarráðuneytisins er miðað við að 35 þessara rýma leysi af hólmi eldri hjúkrunarrými en 15 þeirra mæti aukinni þörf. Í þessari áætlun ráðuneytisins var m.a. reiknað með því að rekstri hjúkrunarheimilisins á Kumbaravogi yrði hætt á næstu misserum, enda virtist þá orðið ljóst að rekstraraðilarnir teldu sér ekki fært að reka heimilið í samræmi við kröfur þar að lútandi.

Af www.sunnlenska.is


Skráð af Menningar-Staður

28.12.2016 20:22

Umkringd listaverkum

 
 
 

 

Umkringd listaverkum

Inga Birgitta Spur, fyrrverandi forstöðumaður – 85 ára
Tengdadóttir Eyrarbakka

 

Inga Birgitta Spur fæddist í Husby á Fjóni í Danmörku 28. desember 1931 og ólst þar upp. Hún lauk Præliminæreksamen í Óðinsvéum 1949 og stundaði nám í höggmyndalist við Konunglega Listaháskólann í Kaupmannahöfn 1952–54 hjá E. Utzon-Frank og Johannes C. Bjerg. Birgitta vann við heimilisstjórn og barnauppeldi í tvo áratugi. Hún lauk stúdentsprófi frá Menntaskólanum við Hamrahlíð 1977, BA-prófi í dönsku og íslensku frá Háskóla Íslands 1980, prófi í uppeldis- og kennslufræði 1981 og kenndi dönsku á árunum 1980-85. Hún nam listasögu við HÍ 1984–85 og við Kaupmannahafnarháskóla 1985–86.

 

Síðla árs 1984 stofnaði Birgitta Listasafn Sigurjóns Ólafssonar og veitti því forstöðu til 2012, þegar safnið var gefið íslenska ríkinu. Hún hefur ritstýrt á þriðja tug rita, sem komið hafa út á vegum safnsins, m.a. Sigurjón Ólafsson ævi og list, sem kom út í tveimur bindum árin 1998 og 1999 og hlaut tilnefningu til Íslensku bókmenntaverðlaunanna 1999. Birgitta varð íslenskur ríkisborgari 1980 og sæmd riddarakrossi hinnar íslensku fálkaorðu 1989.

 

„Sem barn fannst mér heldur leiðinlegt að eiga afmæli á fjórða í jólum, því það vék fyrir jólagleði barnanna sem haldin var í samkomuhúsinu í Husby þar sem faðir minn, presturinn, leiddi sönginn. Foreldrar mínir bættu mér þetta upp með því að halda upp á hálfsársafmæli í lok júní,“ segir Birgitta.

 

Í ætt Birgittu koma fyrir nokkur fuglanöfn. „Auk ættarnafns míns Spur (spör), sem rekja má allt aftur til 1580, eru nöfnin Swane (svanur) og Rafn (hrafn). Sjálf er ég skírð í höfuðið á langalangalangömmu minni, Birgitte Swane, móður Bernhards Severins Ingemanns sem varð ástsælt skáld í Danmörku. Mér hefur oft orðið hugsað til þessarar formóður minnar, sem missti eiginmann sinn frá stórum barnahópi. Til að sjá sér og börnum sínum farborða bruggaði hún edik, en hún lagði allt í sölurnar til þess að Bernhard Severin kæmist til mennta,“ segir Birgitta og bendir á að í Prestbakkakirkju á Síðu sé altaristafla sem eiginkona Ingemanns, Lucie Maria Mandix, málaði.

 

„Aðaláhugamál mín hafa frá upphafi verið bókmenntir, tónlist og fagrar listir. Ég er því þakklát fyrir að hafa lifað innihaldsríku lífi með eiginmanninum mínum, Sigurjóni, og eftir hans dag innan um listaverk hans á þeim stað sem þau voru sköpuð.“

 

Fjölskylda

Birgitta giftist 5.1. 1956 Sigurjóni Ólafssyni, f. 21.10. 1908, d. 20.12. 1982, myndhöggvara frá Eyrarbakka. Foreldrar hans voru Guðrún Gísladóttir, f. 1867, d. 1958, verkakona á Eyrarbakka og í Reykjavík, og Ólafur Árnason, f. 1855, d. 1935, verkamaður á Eyrarbakka og í Reykjavík.

Börn Birgittu og Sigurjóns eru:

1) Ólafur Spur Sigurjónsson, f. 17.04. 1953, sellóleikari í Kaupmannahöfn, kona hans er Rie Munk Spur, deildarstjóri, og dóttir þeirra Camilla Munk Spur, kennari. Fyrir átti Ólafur, með Huldu B. Hákonardóttur, dótturina Silju Björk Huldudóttur, bókmenntafræðing, sem á soninn Högna Nóam;

2) Hlíf Sigurjónsdóttir, f. 17.9. 1954, fiðluleikari, maður hennar er Geirfinnur Jónsson, jarðeðlisfræðingur, og synir þeirra Jón Hlífar og Böðvar Ingi;

3) Freyr Sigurjónsson, f. 19.9. 1957, flautuleikari í Bilbao, kona hans er Begoña Garzia Garzia. Með Margaritu Reizabal á hann Sigurjón og Ingu; 4) Dagur Sigurjónsson, f. 12.1. 1959, þroskaþjálfi í Kaupmannahöfn.

Systir Birgittu var Thora Johanne Spur, f. 1934, hjúkrunarfræðingur í Kaupmannahöfn, látin 2003.

 

Foreldrar Birgittu voru Erik Spur, f. 1890, d. 1971, prestur í Husby á Fjóni, og Åsta Munck, tónlistarkennari f. 1906, d. 1970.

 

.



Morgunblaðið miðvikudagurinn 28. desember 2016.


Skráð af Menningar-Staður