Menningar-Staður
Félagsheimilið Staður á Eyrarbakka

Færslur: 2016 Desember

07.12.2016 11:23

7. desember 1881 - Minnisvarði um Jón Sigurðsson var afhjúpaður

 


Minnisvarðinn í Hólavallakirkjugarði.

Ljósm.: Þjóðminjasafn Íslands - Sarpur.

 

7. desember 1881

- Minnisvarði um Jón Sigurðsson var afhjúpaður

 

Minnisvarði um Jón Sigurðsson var afhjúpaður á gröf hans í Hólavallagarði í Reykjavík þann 7. desember 1881, tveimur árum eftir að hann lést. 

Varðinn var reistur fyrir samskotafé og var afhjúpaður „í viðurvist mesta fjölmennis af öllum stéttum,“ eins og sagði í Árbókum Reykjavíkur.


Morgunblaðið 7. desember 2016 - Dagar Íslands - Jónas Ragnarsson.


 

 




Skráð af Menningar-Staður

07.12.2016 07:55

7. desember 1879 - Jón Sigurðsson forseti lést

 

 

Jón Sigurðsson (1811 - 1879)

 

7. desember 1879 - Jón Sigurðsson forseti lést

 

Jón Sigurðsson forseti lést í Kaupmannahöfn, 68 ára. 

Hann var jarðsettur í Reykjavík 4. maí 1880 ásamt Ingibjörgu Einarsdóttur konu sinni, sem lést 16. desember 1879.

Foreldrar hans voru Sigurður Jónsson fæddur 2. janúar 1777, látinn 31. október 1855, sóknarprestur á Hrafnseyri og kona hans Þórdís Jónsdóttir prestdóttir frá Holti í Önundarfirði fædd 1772, látin 28. ágúst 1862, húsmóðir.
 

Kona Jóns var Ingibjörg Einarsdóttir fædd 9. október 1804, látin 16. desember 1879 í Kaupmannahöfn, húsmóðir. Þau voru gefin saman 4. september 1845. Foreldrar Imbu eru Einar Jónsson, föðurbróðir Jóns, og kona hans Ingveldur Jafetsdóttir.
 

Í bókinni Frá Bjargtöngum að Djúpi 5. hefti, sem kom út árið 2012, er ítarleg frásögn eftir Einar Sigurbjörnsson af útför Jóns Sigurðsson og Ingibjargar Einarsdóttir í Reykjavík 4. maí 1890.

 

 

Jón Sigurðsson og Ingibjörg Einarsdóttir.


Skráð af Menningar-Staður

06.12.2016 21:42

Jólafundur Kvenfélags Eyrarbakka 6. des. 2016

 


Kristín Eiríksdóttir, formaður Kvenfélags Eyrarbakka, stýrði jólafundinum.

 


Jólafundur Kvenfélags Eyrarbakka 6. des. 2016

 

Kvenfélagið á Eyrarbakka var í kvöld, þriðjudaginn 6. desember 2016, með jólafund sinn í Félagsheimilinu Stað á Eyrarbakka.

Menningar-Staður var við upphaf fundarins og færði til myndar.

Myndaalbúm er komið á Menningar-Stað.
Smella á þessa slóð: http://menningarstadur.123.is/photoalbums/281242/


Nokkrar myndir:
 

 

.

.

.

.

.

.

.

.

.

.




Skráð af Menningar-Staður

06.12.2016 07:07

6. desember 2014 - Kristján Eldjárn - Aldarminning - Hófsamur forseti á breytingatímum

 

 

Embættistaka. - Kristján Eldjárn undirritar heit að stjórnarskránni

í sal neðri deildar Alþingis 1. ágúst 1968 þegar hann tók við embætti forseta.

 

6. desember 2014 - Kristján Eldjárn - Aldarminning

- Hófsamur forseti á breytingatímum

 

Þess er minnst í dag að 100 ár eru liðin frá fæðingu Kristjáns Eldjárns, þriðja forseta Íslands og þjóðminjavarðar. Kristjáns er jafnan getið sem farsæls þjóðhöfðingja sem sameinaði þjóð sína með virðulegri hófsemi sinni, frábærum tökum á íslenskri tungu og einstæðri þekkingu á íslenskri þjóðmenningu.

Kynslóð kennir sig við árið 1968 þegar Kristján var kjörinn forseti. Þetta var þegar stúdentar í París héldu út á götur stórborgarinnar og kröfðust umbóta, fyrst innan háskólans og síðan á þjóðfélaginu öllu. Charles de Gaulle Frakklandsforseti og stofnandi fimmta franska lýðveldisins var nálægt því að missa völdin í maí 1968 og sagði af sér árið 1969 þegar sjónarmið hans urðu undir í þjóðaratkvæðagreiðslu. Lyndon B. Johnson, arftaki Johns F. Kennedys á forsetastóli Bandaríkjanna, bauð sig ekki fram til endurkjörs haustið 1968 vegna öflugrar og vaxandi andstöðu við aðild Bandaríkjamanna að stríðinu í Víetnam.
 

Vandræði þessara tveggja voldugu forseta voru til marks um áhrif ungs fólks sem reis gegn ríkjandi viðhorfum og kerfi. Krafist var breytinga og aukins svigrúms til orðs og æðis. Þetta var 68-kynslóðin, hipparnir.

Að Kristján Eldjárn (51 árs) skyldi gjörsigra Gunnar Thoroddsen, fyrrverandi prófessor, borgarstjóra Sjálfstæðismanna, fjármálaráðherra og sendiherra, í forsetakosningum sumarið 1968 var talið til marks um andóf gegn ráðandi öflum, endurómur byltingarkenndra breytinga sem settu svip sinn á þróun mála í lýðfrjálsum löndum.
 

Mikil festa ríkti í stjórn landsins á sjöunda áratugnum, sömu flokkar, Alþýðuflokkur og Sjálfstæðisflokkur, höfðu setið saman í ríkisstjórn frá 1959, Viðreisnarstjórninni. Flokkarnir fengu meirihluta í þriðju kosningunum í röð árið 1967.

Sjálfstæðismenn reyndust ósamstiga í forsetakosningunum 1968 eins og árið 1952 þegar Gunnar Thoroddsen studdi sigurvegarann þá, Ásgeir Ásgeirsson, tengdaföður sinn.
 

Bakgrunnur Kristjáns var allur annar en Gunnars. Kristján var þjóðkunnur mennta- og menningarmaður, þjóðminjavörður frá árinu 1947. Hann var fyrsti Íslendingurinn sem talaði sig inn í hjörtu þjóðarinnar í sjónvarpi þar sem hann kynnti muni úr Þjóðminjasafninu eftir að ríkissjónvarpið tók til starfa árið 1966. Enn er minnisstætt hve vel honum tókst í krafti frábærs valds síns á íslenskri tungu og mikillar þekkingar sinnar á viðfangsefninu að gæða munina sem hann lýsti lífi í svart-hvítri myndinni.
 

Krafa um breytingar og víðtækur stuðningur áhrifamanna úr öllum flokkum tryggði Kristjáni Eldjárn sigur árið 1968 og hann sat í forsetaembættinu án mótframboðs í þrjú kjörtímabil. Hann ákvað að bjóða sig ekki fram árið 1980 og ætlaði að helga sig fræðistörfum að nýju.
 

Í tilefni af 100 ára afmæli Þjóðminjasafnsins árið 1963 ritaði Kristján bókina Hundrað ár í Þjóðminjasafni. Í hugleiðingum í upphafi bókarinnar fjallar hann um framtíð safnsins en segir að draumar um hana kunni að verða að engu vegna nýrra tíma með ný viðhorf „sem engan órar fyrir nú“. Slíkt sé eðlileg framvinda en kjarni safnsins verði „þó hinn sami, eðli þess hið sama“. Hvað sem leið atburðum ársins 1968 var Kristján hvorki maður kollsteypu né byltinga heldur breytinga í anda eðlilegrar framvindu.
 

Bjarni Benediktsson, forsætisráðherra og formaður Sjálfstæðisflokksins árið 1968, bauð Gunnari Thoroddsen alla þá aðstoð sem hann vildi í kosningabaráttunni gegn Kristjáni en framundir lokaátökin töldu Gunnar og hans menn best að forystumenn Sjálfstæðisflokksins héldu sér sem mest til hlés, annað kynni að minnka fylgi við framboðið.

Leiðir Bjarna og Kristjáns höfðu oft legið saman á löngum embættisferli beggja þótt ekki væru þeir samstiga í stjórnmálum, einkum þó um utanríkismál. Eftir að Kristján varð forseti áttu þeir gott og vinsamlegt samstarf á meðan báðir lifðu.
 

Vinsemd og virðing sem Kristján sýndi minningu foreldra minna og systursonar eftir eldsvoðann á Þingvöllum 10. júlí 1970 þegar ráðherrabústaðurinn, Konungshúsið, brann til kaldra kola var mikil og einlæg. Hann var áhugamaður um að gerður yrði minningarreitur á staðnum þar sem bústaðurinn stóð og fórum við saman til Þingvalla og völdum þar steininn sem síðan var fluttur og reistur á lóðinni þar sem hann stendur enn. Kristján samdi áletrunina á steininn og íhugaði vandlega hvert orð, sérstaklega þessi: Íslenska þjóðin reisti þeim þennan varða.
 

Þegar Kristján Eldjárn varð forseti var skrifstofa forsetaembættisins í Alþingishúsinu en fluttist árið 1973 í Stjórnarráðshúsið og var þar með forsætisráðuneytinu til ársins 1996 þegar forsetaembættið fékk aðsetur að Sóleyjargötu 1, í húsi sem Kristján átti og þar sem hann bjó með Halldóru, konu sinni, frá miðju ári 1980 þar til hann andaðist árið 1982. Heimili Halldóru og Kristjáns var lengst af í Þjóðminjasafnshúsinu en árið 1968 fluttist fjölskyldan til Bessastaða. Halldóra bjó við Sóleyjargötuna til ársins 1985. Hún andaðist 21. desember 2008.
 

Kröfur í íslensku samfélagi hafa breyst mikið frá tíma Kristjáns Eldjárns og breytingin verður ljóslifandi þegar hugað er að aðstæðunum sem hann og fjölskylda hans sættu sig við í Bessastaðastofu. Á Bessastöðum var stundaður búskapur fram til ársins 1968 og húsin á staðnum voru nýtt eins og á herragarði. Forsetafjölskyldurnar bjuggu í Bessastaðastofu, svefnherbergi voru á efri hæð en stofur niðri. Móttökum fjölgaði og í tíð Kristjáns bjó fjölskyldan að mestu í lítilli íbúð undir risi, var aðstöðunni lýst á þann veg í Morgunblaðinu að forseti byggi „í embættissölum eða risinu á samkomuhúsi“. Þegar loks var ráðist í gagngerar endurbætur á Bessastaðastofu árið 1989 varð í raun að endurbyggja húsið og tjalda innan dyra vegna þess hve þakið lak.
 

Frá hausti 1974 fram á haust 1979 starfaði ég sem skrifstofustjóri forsætisráðuneytisins í ráðherratíð Geirs Hallgrímssonar og Ólafs Jóhannessonar.
 

Á þessum árum kynntist ég einlægri alúð Kristjáns Eldjárns við embættisstörf sín. Stundum kallaði hann mig til viðtals í skrifstofu sinni í norðvesturenda Stjórnarráðshússins, einkum þegar málefni tengd alþjóðasamskiptum voru til úrvinnslu. Hann var mikill tungumálamaður og fylgdist vel með alþjóðamálum. Margt annað bar að sjálfsögðu á góma og var honum annt um að fræða og fræðast.
 

Sendi hann mér texta vakti undrun mína hve Kristján var nýtinn á pappír. Gjarnan voru þeir handskrifaðir, skýrri hendi, á sundurskorin umslög. Hann skrifaði út í hvert horn. Þessi nýtni var jafnframt til marks um allt viðhorf hans til meðferðar á opinberum fjármunum. Hann sýndi skattgreiðendum nærgætni með hófsemi sinni í allri kröfugerð.

Á forsetaferli Kristjáns Eldjárns sátu 35 menn í ríkisstjórn og þar af voru 6 forsætisráðherrar, frá 1971 sat aðeins ein ríkisstjórn allt kjörtímabilið, ríkisstjórn Geirs Hallgrímssonar, 1974 til 1978. Við stjórnarmyndanir reyndi mikið á Kristján Eldjárn, ekki síst sumarið 1978, haustið 1979 og um áramótin 1979/80. Hann fylgdi þeirri meginreglu að gera hvorki upp á milli flokka né manna, auk þess sem honum var kappsmál að myndaðar væru ríkisstjórnir er nytu stuðnings meirihluta á alþingi. Hann var sannur þingræðissinni.
 

Þegar Kristján Eldjárn kvaddi alþingismenn vorið 1980, sagði hann menn ræða hversu til hefði tekist um aðdraganda og framvindu þeirra tiltölulega mörgu stjórnarmyndunarviðræðna, sem orðið hefðu í hans tíð og sagði síðan: „Vafasöm háttvísi væri það af minni hálfu að fara mörgum orðum um slíkt. Vel fer á að forseti sé opinskátt þakklátur fyrir viðurkenningarorð, ef eitthvað þykir hafa vel tekist, en hins vegar hafi hann sem fæst orð um ef á kreik kemst einhver slæðingur sem til gagnrýni mætti meta. ... Eg er forsjóninni þakklátur fyrir að geta skilist við embætti forseta Íslands í friði við samvisku míns sjálfs.“
 

Þegar Kristján Eldjárn ákvað að draga sig í hlé hvöttu hann margir, þeirra á meðal Geir Hallgrímsson, formaður Sjálfstæðisflokksins, til að halda áfram. Kristjáni varð ekki haggað. Hann kvaddi embætti sitt með reisn.

Kristján Eldjárn kenndi sér hjartameins árið 1982, varð hann á þeim tíma að leita sér lækninga í Bandaríkjunum og lést þar 65 ára að aldri þegar hann gekkst undir aðgerð 13. september 1982.
 

Í minningargrein sagði Andrés Björnsson útvarpsstjóri, vinur Kristjáns: „Alhliða gáfur, íhygli, yfirgripsmikil þekking á fjölmörgum sviðum, meðfædd kurteisi og alþýðleg framkoma og umgengniskunnátta við háa sem lága, tandurhreinir íslenzkir eðliskostir, vörðuðu veg hans og öfluðu honum trúnaðar og fylgis almennings í þessu landi alla hans embættistíð.“

Á þennan veg er Kristjáns Eldjárns minnst enn í dag.

 

Eftir Björn Bjarnason

Morgunblaðið 6. desember 2014.
 

 

Þjóðhátíð á Þingvöllum. - Forsetahjónin Halldóra og Kristján Eldjárn

á Þingvöllum árið 1974 þegar þess var minnst að 1100 ár voru liðin

frá upphafi Íslandsbyggðar.

Talið er að milli 55 og 60 þúsund Íslendingar hafi sótt hátíðina.



Skráð af Menningar-Staður.


 

 

 

04.12.2016 22:16

Kirkjufyllir á aðventuhátíð í Eyrarbakkakirkju 4. des. 2016

 

 

 

Kirkjufyllir á aðventuhátíð í Eyrarbakkakirkju 4. des.  2016
 

 

Kór kirkjunnar söng og organisti var Haukur Arnarr Gíslason.

 

 Jóhanna Ýr Jóhannsdóttir stýrði barnastund.

 

 Barnasöngur var undir handleiðslu Kolbrúnar Huldu Tryggvadóttur.

Kolbrún Hulda og Jóhanna Eirný Sigurðardóttir sungu einsöng.

 

Séra Kristján Björnsson flutti  hugvekja og var  kynninr samkomunnar sem var mjög hátíðleg og fór hið besta fram.
 


Þá flutti séra Kristján þetta ljóð sitt:
 

Aðventukvöld á Eyrarbakka

 

Undur fögur ómar hér

Eyrarbakkakirkja

Kór og sögur, krakkaher,

kært er um að yrkja.

 

Koma jólin kannski brátt?

Koma þau með friðinn?

Veitist gleði, von og sátt?

Verður ró um siðinn?

 

Dýrðleg skíni Drottins ljós

depurð, kvíði, víki.

Jafnan sýni jólarós

Jesú boð og ríki.

 

Gleðin hefjist geislum stráð

glitri jóla blóminn.

Um þig vefjist elskan þráð

yndi lífs og ljóminn.

 

Sr. Kristján Björnsson
 


Menningar-Staður var í Eyrarbakkakirkju og færði til myndar.
Myndaalbúm með 32 myndum er komið á Menningar-Stað.

Smella á þessa slóð: http://menningarstadur.123.is/photoalbums/281217/

 

Nokkrar myndir:

 

.

.

.

.

.

.

.

.

.

.




Skráð af Menningar-Staður

 

04.12.2016 19:27

Opið hjá Elfari Guðni um helgar til jóla

 

 

 

Opið hjá Elfari Guðni um helgar til jóla


Opið verður í Svartakletti, vinnustofu og sýningarsal Elfars Guðna Þórðarsonar,

í Menningarverstöðinni Hólmaröst á Stokkseyri, allar helgar til jóla kl. 14:00 - 18:00
(lokað laugardaginn 17. desember) 

Allir hjartanlega velkomnir.


 

 

F.v.: Þórður Guðmundsson, Sæmundur Guðmundsson, Sigurgeir Hilmar Friðþjófsson 

og Elfar Guðni Þórðarson.
 


F.v.: Ingi Þórðarson frá Sjólyst og Garði á Stokkseyri, Elfar Guðni Þórðarson,
Anna Nilsen frá Brörup á Jótlandi í Danmörku og Þórður Guðmundsson.

 


Skráð af Menningar-Staður




 

04.12.2016 13:06

Aðventuhátíð í Eyrarbakkakirkju 4. des. 2016

 

 

Í Eyrarbakkakirkju á aðventuhátíð árið 2008. Ljósm.: Björn Ingi Bjarnason.

 

Aðventuhátíð í Eyrarbakkakirkju

sunnudaginn 4. desember 2016 kl.17:00


Munum aðventukvöldið í Eyrarbakkakirkju í dag, sunnudag 4. des. 2016 kl. 17:00 

 

Kór kirkjunnar syngur og organisti er Haukur Arnarr Gíslason. Jóhanna Ýr Jóhannsdóttir stýrir barnastund.

 

Barnasöngur undir handleiðslu Kolbrúnar Huldu Tryggvadóttur.

 

Hugvekja og kynning sr. Kristján Björnsson.

 

Kveikt verður á aðventukertinu og kransinn skýrður út.

 

Allir velkominir úr öllum sóknum.
 


Eyrarbakkaprestakall.

 

 

Í Eyrarbakkakirkju á aðventuhátíð árið 2008.    Ljósm.: Björn Ingi Bjarnason.

 

.

.

.

 
 
 
 

 

 

.

 

 

 




Skráð af Menningar-Staður

 

04.12.2016 08:25

4. desmber 2016 - 155 ár frá fæðingu Hannesar Hafstein

 

 

Hannes Hafstein (1861 - 1922)

 

4. desmber 2016 - 155 ár frá fæðingu Hannesar Hafstein

Hannes Hafstein (Hannes Þórður)
 

Fæddur á Möðruvöllum í Hörgárdal 4. des. 1861, d. 13. des. 1922.
 

For.: Pétur Havstein (f. 17. febr. 1812, d. 24. júní 1875) alþm. og amtmaður þar og 3. k. h. Kristjana Gunnarsdóttir Havstein (f. 20. sept. 1836, d. 24. febr. 1927) húsmóðir. K. (15. okt. 1889) Ragnheiður Stefánsdóttir Hafstein (f. 3. apríl 1871, d. 18. júlí 1913) húsmóðir. For.: Stefán Thordersen alþm. og k. h. Sigríður Ólafsdóttir Stephensen, sem áður var 2. kona Péturs föður Hannesar. Börn: Sigurður (1891), Kristjana (1892), Ástríður (1893), Þórunn (1895), Sigríður (1896), Sofía Lára (1899), Elín Jóhanna Guðrún (1900), Ragnheiður (1903), Kristjana (1911), Sigurður Tryggvi (1913).

      Stúdentspróf Lsk. 1880. Lögfræðipróf Hafnarháskóla 1886.

      Settur sýslumaður í Dalasýslu 1886, sat að Staðarfelli. Málaflutningsmaður við landsyfirréttinn 1887. Sinnti síðan lögfræðistörfum um hríð. Landshöfðingjaritari frá 1889 og jafnframt að nýju málaflutningsmaður við landsyfirréttinn 1890—1893. Sýslumaður í Ísafjarðarsýslu og bæjarfógeti á Ísafirði 1896—1904. Skip. 31. jan. 1904 ráðherra Íslands frá 1. febr. að telja, lausn 31. mars 1909. Bankastjóri við Íslandsbanka 1909—1912. Skip. 24. júlí 1912 ráðherra Íslands að nýju frá 25. júlí, lausn 21. júlí 1914. Varð aftur bankastjóri við Íslandsbanka 1914 og gegndi því starfi til 1917, er hann varð að láta af því vegna vanheilsu.

      Endurskoðandi Landsbankans 1890—1896. Átti sæti í millilandanefndinni 1907, varaformaður hennar og formaður íslenska hlutans. Skip. 1911 í mþn. um rannsókn á fjármálum landsins og í aðra um skattamál, skip. 1914 í velferðarnefnd. Foringi Heimastjórnarflokksins 1901—1912.

      Alþm. Ísf. 1900—1901, alþm. Eyf. 1903—1915, landsk. alþm. 1916—1922, sat síðast á þingi 1917 (Heimastjfl., Sambfl., Heimastjfl.).
      Ráðherra Íslands 1904—1909 og 1912—1914.
      Forseti Sþ. 1912.

      Kvæði hans hafa birst í mörgum útgáfum.       

Ritstjóri: Verðandi (1882).

 

 

Hannes Hafstein við Stjórnarráðið í Reykjavik. Ljósm.: BIB




Skráð af Menningar-Staður

04.12.2016 06:57

Merkir Íslendingar - Sigurður J. Ólafsson

 

 

Sigurður J. Ólafgsson (1916 - 1993)

 

Merkir Íslendingar - Sigurður J. Ólafsson

 

Sigurður J. Ólafsson fæddist í Reykjavík 4. desember 1916, sonur Ólafs Jónatanssonar frá Kolbeinsstöðum, verkamanns í Reykjavík, og Þuríðar Jónsdóttur frá Elliða í Staðarsveit.
 

Albræður Sigurðar voru Erling söngvari og Jónatan, píanóleikari og tónskáld, en hálfsystkini hans voru Sigmundur Halldórsson, arkitekt og byggingafulltrúi; Guðmundur Halldórsson forstjóri; Sigurborg Halldórsdóttir húsfreyja og Jóhanna Halldórsdóttir, húsfreyja á Eiðhúsum í Miklaholtshreppi.
 

Eiginkona Sigurðar var Inga Valfríður Einarsdóttir, sjúkraliði frá Miðdal, systir Guðmundar listamanns, föður Errós, Ara Trausta og Egils arkitekts, en börn Sigurðar og Ingu Valfríðar: Valgerður meinatæknir sem er látin; Erling tamningamaður; Ævar bílamálari; Þuríður, söngkona og myndlistarmaður, Gunnþór, lengi hjá Sjónvarpinu, en dóttir Sigurðar frá því áður er Elsa húsfreyja.
 

Sigurður stundaði bifreiðaakstur á yngri árum, var rannsóknarmaður á Rannsóknarstofu HÍ og á Keldum, gærumatsmaður hjá SÍS, kjötmatsmaður á vegum yfirdýralæknis og sá um talningu búfjár í borgarlandinu á vegum Reykjavíkurborgar.
 

Sigurður sótti ungur söngtíma hjá Sigurði Birkis og Guðmundi Jónssyni, söng með Karlakór Reykjavíkur frá 23 ára aldri og síðar með eldri félögum kórsins. Hann söng í Rigoletto, fyrstu óperunni sem hér var færð upp, í óperettunum Leðurblökunni og Bláu kápunni og lék og söng í fjölda leikrita, hélt fjölda tónleika, var söngvari með ýmsum danshljómsveitum og söng dægurlög inn á fjölda hljómplatna.
 

Þá var Sigurður einn þekktasti hestamaður sinnar kynslóðar hér á landi. Hann stundaði hestamennsku frá fermingaraldri og átti fjölda hrossa sem mörg gerðu garðinn frægan, en þekktasta skeiðhross hans var Gletta sem átti Íslandsmet í skeiði í samtals 28 ár.

 

Sigurður lést 13. júlí 1993.

 

Morgunblaðið - Dagar Íslands - Jónas Ragnarsson.


Skráð af Menningar-Staður

03.12.2016 21:05

Aðventuhátíð í Eyrarbakkakirkju 4. des. 2016

 

Image result for eyrarbakkakirkja

 

Aðventuhátíð í Eyrarbakkakirkju

sunnudaginn 4. desember 2016 kl.17:00


Munum aðventukvöldið í Eyrarbakkakirkju á morgun, sunnudag 4. des. 2016 kl. 17:00 

 

Kór kirkjunnar syngur og organisti er Haukur Arnarr Gíslason. Jóhanna Ýr Jóhannsdóttir stýrir barnastund.

 

Barnasöngur undir handleiðslu Kolbrúnar Huldu Tryggvadóttur.

 

Hugvekja og kynning sr. Kristján Björnsson.

 

Kveikt verður á aðventukertinu og kransinn skýrður út.

 

Allir velkominir úr öllum sóknum.

Eyrarbakkaprestakall.

Image result for eyrarbakkakirkja kristján björnsson


Skráð af Menningar-Staður